បុគ្គលិកមីក្រូហិរញ្ញវត្ថុ ប្រាសាក់ ត្រូវបានកម្លាំងសមត្ថកិច្ច ឃាត់ខ្លួនពីបទ រួមភេទជាមួយក្មេងស្រីអាយុ ១២ឆ្នាំ
ខេត្ដកំពត ៖ ជនសង្ស័យម្នាក់ជាបុគ្គលិកមីក្រូហិរញ្ញវត្ថុប្រាសាក់ត្រូវបាន សមត្ថកិច្ចឃាត់ខ្លួនដើម្បីសាកសួរនិង កសាងសំណុំរឿងបញ្ជូនទៅសាលាដំបូង នៅព្រឹកថ្ងៃទី២៦ ខែមីនា ឆ្នាំ២០១៤ ដោយយោងតាមដីការបស់ព្រះរាជអាជ្ញា ក្រោមបទចោទប្រកាន់ពីការរួមភេទជាមួយអនីតិជន កាលពីថ្ងៃទី២៤ ខែមីនា ឆ្នាំ២០១៤ បន្ទាប់ពីមានពាក្យបណ្ដឹង របស់ម្ដាយក្មេក ។
ជនសង្ស័យ ឈ្មោះ មៀច លាងហុង អាយុ២៨ឆ្នាំ ជាបុគ្គលិកមីក្រូហិរញ្ញវត្ថុ ប្រាសាក់ ស្នាក់នៅភូមិក្រាំង សង្កាត់ ក្រាំងអំពិល ក្រុងកំពត ខេត្ដកំពត មាន ស្រុកកំណើតនៅភូមិបន្ទាយ ឃុំជីខ្មា ស្រុកទ្រាំង ខេត្ដតាកែវ។ កាលពីថ្ងៃទី២០ ខែមីនា ឆ្នាំ២០១៤ សមត្ថកិច្ចបាន ទទួលពាក្យបណ្ដឹងពីស្ដ្រីឈ្មោះ មាស ស៊ីណា មានទីលំនៅភូមិទ្វីខាងត្បូង សង្កាត់អណ្ដូងខ្មែរ ក្រុងកំពត ខេត្ដកំពត បានចោទប្រកាន់ថា ជនសង្ស័យឈ្មោះ មៀច លាងហុង នេះបានរួមភេទជាមួយ កូនស្រីរបស់ខ្លួនដែលស្ថិតក្នុងវ័យជា អនីតិជន ។
គួរបញ្ជាក់ថា បណ្ដឹងស្ដីពីបទរួមភេទ ជាមួយអនីតិជននោះកើតឡើងដោយ សារស្ដ្រីជាម្ដាយក្មេករបស់ជនសង្ស័យ ខឹងកូនប្រសាចុះចោលប្រពន្ធដែលជា កូនរបស់គាត់បន្ទាប់ពីរៀបការកាលពី ថ្ងៃទី១៥ ខែមីនា ឆ្នាំ២០១៤ ។ ក្រោយ ពេលរៀបការបានមួយថ្ងៃឈ្មោះ មៀច លាងហុង បានយកខោអាវចាកចេញពី ផ្ទះប្រពន្ធ ទើបបង្កឱ្យម្ដាយក្មេកខឹង និង ឈានទៅដាក់ពាក្យបណ្ដឹង។គួររំលឹកថា ក្នុងអំឡុងឆ្នាំ២០១២ ឈ្មោះ មៀច លាងហុង បានមកធ្វើការងារនៅរមណីយ ដ្ឋានភ្នំបូកគោដោយហូបបាយខែរបស់ ស្ដ្រី មាស ស៊ីណា រហូតមានទំនាក់ ទំនងជាមួយកូនស្រីអ្នកលក់បាយរូបនេះ ដែលមានអាយុទើបតែ១២ឆ្នាំ ។
ក្រោយមក ឈ្មោះ មៀច លាងហុង ក៏ប្ដូរការងារទៅមីក្រូហិរញ្ញវត្ថុប្រាសាក់វិញ ហើយឈប់ហូបបាយខែរបស់ស្ដ្រី នោះតែការទាក់ទងជាមួយកូនស្រីនៅតែបន្ដ ។ នៅយប់ថ្ងៃទី១០ ខែមេសា ឆ្នាំ ២០១៣ ឈ្មោះ មៀច លាងហុង បាន បង្កើតកម្មវិធីហូបបាយនៅផ្ទះស្ដ្រី ឈ្មោះ មាស ស៊ីណា មានទាំងផឹកគ្រឿង ស្រវឹង ផង។ ពេលស្រវឹងទាំងស្ដ្រីម្ចាស់ផ្ទះទាំង ភ្ញៀវ ទើបការហូបចុកបានបញ្ឈប់ ហើយឈ្មោះ មៀច លាងហុង បានសុំ សម្រាកនៅផ្ទះនោះ ព្រោះខ្លាចមាន គ្រោះថ្នាក់តាមផ្លូវដែលឱកាសល្អដល់ ឈ្មោះ មៀច លាងហុង បានចាប់រំលោក កូនស្រីម្ចាស់ផ្ទះរហូតបានសម្រេច ។
ក្រោយមករឿងចាប់រំលោភបាន បែកធ្លាយ ទើបស្ដ្រីជាម្ដាយទូរស័ព្ទហៅ ឈ្មោះ មៀច លាងហុង មកសួរនាំក៏ កើតជាការសន្យាថា រូបគេនឹងចូលស្ដី ដណ្ដឹងនាងរៀបការតាមប្រពៃណីដោយ ឱ្យម្ដាយខាងស្រីកែអាយុកូនរហូតដល់ ១៨ឆ្នាំ។ ដូចការសន្យាភាគីខាងប្រុសបាន នាំឪពុកម្ដាយចូលស្ដីដណ្ដឹងនិងដាក់ថ្ងៃ រៀបការ គឺថ្ងៃទី១៥ ខែមីនា ឆ្នាំ២០១៤។ ប៉ុន្ដែមិនដឹងថាមានការគិតឃើញយ៉ាងណា ស្រាប់តែមួយថ្ងៃបន្ទាប់បែរជាកូន កំលោះដែលបានរៀបការថ្មីថ្មោងយកខោអាវចុះចោលប្រពន្ធធ្វើឱ្យស្ដ្រីជាម្ដាយខឹង ក៏ប្ដឹងពីបទរួមភេទជាមួយអនីតិជនឱ្យ សមត្ថកិច្ចចាប់ខ្លួនតែម្ដង ។
បើតាមប្រភពពីមន្ដ្រីតុលាការខេត្ដ កំពតឱ្យដឹងថា ជនសង្ស័យជាបុគ្គលិក ធនាគារប្រាសាក់ដែលបានរំលោភក្មេង ស្រីជាអនីតិជនត្រូវបានតុលាការសម្រេច ឱ្យនៅក្រៅឃុំនៅល្ងាចថ្ងៃទី២៦ ខែមីនា។ ការសម្រេចឱ្យនៅក្រៅឃុំនេះ មិនថា ក្រុមគ្រួសារក្មេងស្រីរងគ្រោះប៉ុណ្ណោះទេ សូម្បីសមត្ថកិច្ចដែលខំចំណាយពេល អត់បាយក្រហាយទឹកឃាត់ខ្លួនជនសង្ស័យ មកកសាងសំណុំរឿងបញ្ជូនទៅតុលាការក៏ក្ដៅក្រហាយទៅនឹងការដោះលែង ជន សង្ស័យម្នាក់នេះឱ្យនៅក្រៅឃុំនោះដែរ ។
តាមប្រភពពីអ្នកភូមិកន្លែងកើត ហេតុឱ្យដឹងថា ក្មេងស្រីរងគ្រោះនៅក្នុង បញ្ជីជាតិនាងទើបតែមានអាយុ១២ឆ្នាំ ប៉ុណ្ណោះ ក៏ប៉ុន្ដែដើម្បីឱ្យដំណើរការនៃ ការរៀបអាពាហ៍ពិពាហ៍បានជនសង្ស័យ បានរួមដៃជាមួយនឹងមេភូមិ មេឃុំ កែ អាយុដាក់ដល់១៨ឆ្នាំ ។ សកម្មភាពបែប នេះអាចនិយាយបានថា ជនសង្ស័យមាន ការគ្រោងទុកប្រព្រឹត្ដទង្វើខុសច្បាប់រួច បាត់ទៅហើយ ព្រោះក្រោយពីជនសង្ស័យ រៀបអាពាហ៍ពិពាហ៍ជាមួយនឹងក្មេងស្រី រងគ្រោះនោះគេបាននាំនាងទៅផ្សំដំណេក នៅខាងក្រៅផ្ទះ ។ លុះបានរយៈពេល៤ថ្ងៃ ប៉ុណ្ណោះក៏ដឹកក្មេងស្រីរងគ្រោះ មក ប្រគល់ឱ្យម្ដាយវិញក្រោមល្បិច កល មិនអាចរស់នៅជាមួយគ្នាបាន ។ ដូច្នេះ នេះជាចេតនានិងជាការគ្រោងទុករបស់ជនសង្ស័យ ។ បញ្ហានិងសកម្មភាពនេះ ក្រុមគ្រួសារក្មេងស្រីរងគ្រោះក៏ដូចជា សមត្ថកិច្ចគ្រប់គ្រងសំណុំរឿងនេះបាន ប្រតិកម្មទៅនឹងការដោះលែងឱ្យជន សង្ស័យនៅក្រៅឃុំនេះដែរ ។
ពាក់ព័ន្ធករណី ដោះលែងជនសង្ស័យ រួមភេទជាមួយអនីតិជននៅក្រៅឃុំ បណ្ដោះអាសន្ន នគរវត្ដមិនអាចទាក់ទង បានទេពីលោក ស៊ុន សុង ចៅក្រម ស៊ើបសួរសាលាដំបូងខេត្ដកំពត កាល ពីរសៀល ថ្ងៃទី២៧ ខែមីនា ឆ្នាំ២០១៤ ដោយទូរស័ព្ទចូលគ្មានអ្នកលើក ៕
ប្រភពព័ត៌មានពី៖ នគវត្ត
