លោកអាត់ ធន់ ច្រានចោលការចោទប្រកាន់ថា បានកិបកេងប្រាក់រំលឹក របស់កម្មករជាង៩ម៉ឺនដុល្លារ
រាជធានីភ្នំពេញ
៖ លោកអាត់ ធន់
ប្រធានប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(ស៊ី
ខៅឌូ) ដែលរងការចោទប្រកាន់ថា
កិបកេងប្រាក់រំលឹករបស់កម្មករជាង៩ម៉ឺនដុល្លារអាមេរិក ។លោក
បានច្រានចោលថាលោកមិនបានកិបកេងប្រាក់ រំលឹករបស់កម្មករ
ដូចដែលជាការចោទប្រកាន់នោះទេ។ការច្រានចោលនេះ បានធ្វើឡើងបន្ទាប់ពីបែកធ្លាយនូវពាក្យបណ្តឹងរបស់កម្មករចំនួន២៩ នាក់ បានប្តឹងលោកអាត់ ធន់ និងមន្ត្រីសហជីពពីរនាក់ទៀត ទៅតុលាការ ដោយប្តឹងពីបទថា កិបកេងប្រាក់ចំនួន៩២៩២៩ដុល្លារ។
លោកអាត់ ធន់ បានអះអាងថា កម្មករទាំងអស់នោះបានបើកលុយគ្រប់ចំនួនរួចរាល់អស់ហើយ ហើយនេះជាការធ្វើដើម្បីបង្ខូចកេរ្តិ៍ឈ្មោះរបស់លោក។ ហើយតាមពិតរឿងនេះ គឺលោកអ៊ំ វិសាល បង្ខូចកេរ្តិ៍ឈ្មោះរបស់លោក។ ហើយលោកអ៊ំ វិសាល រាល់ឆ្នាំគាត់ធ្វើកិច្ចសន្យាជាមួយសហជីព ហើយឆ្នាំនេះគាត់អត់ចុះកិច្ចសន្យាទេ ហើយបើអត់ចុះកិច្ចសន្យា លោកក៏បានចេញលិខិតបញ្ឈប់គាត់។
លោកបានបញ្ចាក់ថា “ក្រោយមកលោកអ៊ំ វិសាល បានទៅហៅពួកនឹងមកប្តឹងខ្ញុំ ពួកនឹងសុទ្ធតែបើកលុយអស់ហើយនឹង កម្មករនឹងបើកលុយអស់ហើយនឹង ខ្ញុំមានឯកសារគ្រប់គ្រាន់ ប៉ុន្តែគេយកមកប្តឹងដើម្បីធ្វើម៉េចឲ្យបង្ខូចកេរ្តិ៍របស់ខ្ញុំ”។
លោកបានលើកឡើងថា លោកនឹងរៀបចំពាក្យបណ្តឹងប្តឹងលោកអ៊ំ វិសាល និងអ្នកស្រី រឿនចាន់ថន ទៅតុលាការពីបទបរិហាកេរ្តិ៍។
យោងតាមពាក្យបណ្តឹងរបស់កម្មកររោងចក្រ អ៊ីហ្គាមេន ស្ថិតនៅឃុំស្វាយរលំ ស្រុកស្អាង ខេត្តកណ្តាល ដែលជាសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដាក់ជូនលោកព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ កាលពីថ្ងៃទី៣ ខែមិនា ឆ្នាំ២០១៤ ដែលទទួលបាននៅថ្ងៃទី១៤ ខែមិនា បានសរសេរថា សុំប្តឹងពីថ្នាក់ដឹកនាំសហជីពចំនួន៣នាក់ មានឈ្មោះដូចជា ១.លោកអាត់ ធន់ , ២.លោកគង់ អាទិត្យ , ៣.លោកឯក សុភក្តី ដែលជាថ្នាក់ដឹកនាំសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និងជាថ្នាក់ដឹកនាំសហភាពការងារកម្ពុជា (CLC) ពីបទកេងបំបាត់ប្រាក់អស់ចំនួន ៩២៩២៩ដុល្លារអាមេរិក៕
ប្រភពពី Free Press Magazine
