ឃាត់ខ្លួនបុរសម្នាក់ចាប់ រំលោភកុមារីអាយុ១២ឆ្នាំ បានសម្រេច៣លើក
ខេត្តកំពង់ឆ្នាំង
៖ សមត្ថកិច្ចនគរបាលប៉ុស្តិ៍ បានចាប់ឃាត់បុរសម្នាក់
បន្ទាប់ពីចាប់រំលោភកុមារីអាយុ១២ឆ្នាំ
បានសម្រេច៣លើកត្រូវបានម្តាយនាងមកទាន់កាលពីវេលាម៉ោង១១ថ្ងៃទី
២៥ ខែមីនា ឆ្នាំ២០១៤ នៅក្នុងឃុំតាជេស ស្រុកកំពង់ត្រឡាច
បើទោះបីជាមានការសម្របសម្រួលបង់លុយឲ្យគ្រួសារក្មេងស្រីរងគ្រោះមួយ
ចំនួនរួចហើយក៏ដោយ ។ ជនសង្ស័យឈ្មោះ ព្រុំ ចិន្តា អាយុ២៧ឆ្នាំ មានទីលំនៅភូមិឡពាង ឃុំតាជេស ស្រុកកំពង់ត្រឡាច និងកុមារីរងគ្រោះអាយុ១២ឆ្នាំ រស់នៅក្នុងស្រុកកំពង់ត្រឡាច ។
តាមការបំភ្លឺរបស់ជនរងគ្រោះបានឲ្យដឹងថា លើកទី១នៅវេលាម៉ោង១១ព្រឹកថ្ងៃ ទី២០ ខែមីនា ជនសង្ស័យបានចាប់រំលោភនាងនៅក្នុងព្រៃក្រោយផ្ទះរបស់នាង ហើយបានអោយលុយនាង៥០០រៀល លើកទី២ថ្ងៃទី២៣ ខែមីនា បានចាប់នាងរំលោភនៅក្រោយផ្ទះកន្លែងដដែលនិងលើកទី៣ ចាប់រំលោភនៅក្នុងផ្ទះរបស់នាង ហើយត្រូវម្តាយនាងមកទាន់ពេលនោះជនសង្ស័យបានចុះរត់គេចខ្លួនបាត់ ។
បន្ទាប់មកក្រុមគ្រួសារជនសង្ស័យបានចរចាសម្របសម្រួលបង់លុយឲ្យ គ្រួសារកុមារីរងគ្រោះចំនួន២៥០ម៉ឺនរៀល ដើម្បីកុំឲ្យប្តឹងផ្តល់ ។ តែរឿងនេះបានបែកការណ៍ ដល់សមត្ថកិច្ច ឈានដល់ការឃាត់ជនសង្ស័យ នៅព្រឹកថ្ងៃទី២៨ ខែមីនា បញ្ជូនខ្លួនទៅកាន់អធិការដ្ឋាននគរបាល ស្រុកកំពង់ត្រឡាច កសាងសំណុំរឿងបញ្ជូន ដើម្បីចាត់ការបន្តតាមនីតិវិធី ។
នៅចំពោះមុខសមត្ថកិច្ចឈ្មោះ ព្រុំ ចិន្តា បានសារភាពថា ខ្លួនពិតជាបានដេកជាមួយកុមារីរងគ្រោះពិតប្រាកដមែន ប៉ុន្តែមិនមានការចាប់បង្ខំឡើយ៕
