មន្រ្តីបរិស្ថាន បញ្ជាក់ពីទឹកកស្សិណអង្គរ ប្រែពណ៌ និងត្រីងាប់
លោក ហេង ណារ៉េត ប្រធាននាយកដ្ឋានត្រួតពិនិត្យការបំពុលបរិស្ថាន នៃក្រសួង
បរិស្ថាន បានបញ្ជាក់ឲ្យដឹងកាលពីរសៀលថ្ងៃទី២៨ ខែមករា ឆ្នាំ២០១៤នេះថា បន្ទាប់ពីមានការភ្ញាក់ផ្អើល ពីសំណាក់ប្រជាពលរដ្ឋ និងភ្ញៀវទេសចរ បានឃើញទឹកកស្សិណ ផ្នែកខាងត្បូង បានប្រែពណ៌ ពីថ្លាឈ្វេង មកជាពណ៌បៃតងស្លែរួចមក ក្រសួងបានយកគំរូទឹក មកធ្វើវិភាគ នៅមន្ទីរពិសោធន៍។ ក្រោយការពិសោធន៍ ជាលទ្ធផល បានឲ្យដឹង ថា “ទឹកកស្សិណអង្គរ មិនមានអ្វីឲ្យព្រួយបារម្ភប៉ះពាល់ដល់សុខភាពទេ”។
លោកប្រធាននាយកដ្ឋាន បានមានប្រសាសន៍ថា តាមការពិនិត្យប៉ារ៉ាម៉ែត្រ កាលពីថ្ងៃទី២៦ ខែមករា ថ្មីៗនេះ ពុំឃើញមានអ្វីទេ។ ខាងមន្ត្រីជំនាញ បានសន្និដ្ឋានទៅលើត្រីងាប់ជាបន្តបន្ទាប់នោះថា ដោយសារខ្វះអុកស៊ីហ្សែន ព្រោះសារាយដែលនៅក្នុងទឹក បានងាប់ តែសភាពទឹកគ្មានកករទេ។
លោកបានបន្ថែមថា “ត្រីស្រកា គឺងាយនឹងងាប់ជាងត្រីអត់ស្រកា (ត្រីអណ្តែង) ឲ្យតែទឹកនោះខ្វះអុកស៊ីហ្សែន។ ប៉ុន្តែដើម្បីបានទឹកនេះមានសភាពថ្លាឈ្វេងឡើងវិញ លុះ
ត្រាតែត្រូវរង់ចាំពេលវេលាច្រើនខែទៅមុខទៀត”។
អគ្គនាយកអាជ្ញាធរអប្សរា លោក ប៊ុន ណារិទ្ធ បានមានប្រសាន៍ នៅរសៀលថ្ងៃទី២៨ ខែមករានេះដែរថា “គុណភាពទឹកកស្សិណអង្គរ គឺមានសភាពធម្មតាដដែល និងគ្មានក្លិនឆ្អាប ឬស្អុយទេ។ ទឹកនេះ បើមើលពីចម្ងាយ ហាក់មានពណ៌ក្រហមប្រឿងៗ តែតាមពិតវាមានពណ៌បៃតងស្លែ។ ប៉ុន្តែ វាមានជាតិប្លុងតុងកើតឡើងនៅក្នុងផ្ទៃទឹកច្រើនខុសធម្មតា”។
លោកអគ្គនាយក បានចាត់ទុកថា “ការប្រែពណ៌ទឹកកស្សិណអង្គរ គឺជាបាតុភូត ធម្មជាតិ ដែលតែងតែកើតមានរយៈពេល ពីរ-បីឆ្នាំម្តង។ នេះជាមូលហេតុធម្មជាតិ ដែលបន្តិចទៀតវានឹងបាត់ទៅវិញ”។ ទោះជាយ៉ាងនេះក្តី លោកបានបន្តថា “យើងនឹងរង់ចាំមើលថែមទៀត”។
ប្រភពពី CEN
