តុលាការកំពុងតែ ស៊ើបអង្កេតបឋមរឿង យុវជនប្តឹងនាយករដ្ឋមន្ត្រី
ភ្នំពេញ: សាលាដំបូង
រាជធានីភ្នំពេញបានកំពុងតែស៊ើបអង្កេតបឋមទៅលើសំណុំរឿងយុវជនម្នាក់
ដែលបានដាក់ពាក្យបណ្តឹងប្តឹងប្រមុខដឹកនាំរាជរដ្ឋាភិបាល
ទាក់ទងការបង់កោះត្រល់ និងកោះត្រចកសេះ។
ប៉ុន្តែតុលាការនៅមិនទាន់ចាត់ការបណ្តឹងនោះយ៉ាងណានៅឡើយទេ
ដោយរង់ចាំការផ្តល់ឯកសារបន្ថែមពីម្ចាស់ដើមបណ្តឹង។យុវជនឈ្មោះ នាង សុឃុន បានចូលខ្លួនទៅបំភ្លឺនៅសាលាដំបូងរាជធានីភ្នំពេញ កាលពីព្រឹកថ្ងៃទី២៧ ខែកុម្ភៈ ឆ្នាំ២០១៤ តាមការកោះហៅរបស់លោកមាស ច័ន្ទពិសិដ្ឋ ព្រះរាជអាជា្ញរង។លោក ច័ន្ទពិសិដ្ឋ បានប្រាប់ឲ្យដឹងថានីតិវិធីកំពុងតែស៊ើបអង្កេតបឋមតទៅទៀតអត់ទាន់បាន ចាត់ការអ្វីនៅឡើយទេហើយគាត់(នាងសុឃុន)ចូលមកឆ្លើយបំភ្លឺអត់មាន ឯកសារអ្វីបញ្ជាក់ទេ។
លោកបញ្ជាក់ថា “ខ្ញុំទុកពេលឲ្យគាត់ផ្តល់ឯកសារ បើគាត់អត់ផ្តល់ទេ ចាំយើងចាត់ការបន្តទៀត ហើយគាត់សន្យាថា នឹងផ្តល់ឲ្យខ្ញុំនៅសប្តាហ៍ក្រោយ”។
សូមរម្លឹកថា យុវជនឈ្មោះ នាង សុឃុន បានយកពាក្យបណ្តឹងដាក់ប្តឹងសម្តេចតេជោ ហ៊ុន សែន នាយករដ្ឋមន្ត្រី ទៅសាលាដំបូងរាជធានីភ្នំពេញ កាលពីថ្ងៃទី៣ ខែកុម្ភៈ ឆ្នាំ២០១៤ ពីបទកាត់ទឹកដីកោះត្រល់ និងកោះត្រចកសេះទៅឲ្យវៀតណាម ធ្វើឲ្យបាត់បង់អធិបតេយ្យភាពរបស់ខ្មែរ៕
ប្រភពពី CEN
