ចាប់ខ្លួនប្តីប្រពន្ធឡាវពីរនាក់ជួញដូរគ្រឿងញៀនជិត១គីឡូក្រាម
ស្ទឹងត្រែង: ជនជាតិឡាវពីរនាក់ ត្រូវកម្លាំងនគរបាល ចាប់ខ្លួនជាមួយសារធាតុញៀន មានទម្ងន់ជិតមួយគីឡូក្រាម កាលពីវេលាម៉ោង១០និង៥០នាទីព្រឹកថ្ងៃទី១៤ខែមករាឆ្នាំ២០១៤។
មន្ត្រីនគរបាលប្រឆាំងគ្រឿងញៀនទំនាក់ទំនងព្រំដែនច្រកត្រពាំងក្រៀល បានឱ្យដឹងថា ជនសង្ស័យត្រូវបានចាប់ខ្លួននៅលើផ្លូវលំ ស្ថិតក្នុងភូមិណាអូងឃុំស្រែសំបូរស្រុកសៀមប៉ាង។ ប្តីឈ្មោះខាំ ផេងណយ អាយុ៣៥ឆ្នាំ មានមុខរបរជាកសិករ រស់នៅ ភូមិណាម៉ាកង៉ូក ស្រុកស៊ុឃូម៉ា ខេត្តចម្ប៉ាសាក់ ប្រទេសឡាវ រីឯប្រពន្ធឈ្មោះសៃ ញ៉ាសេតផែង អាយុ៣១ឆ្នាំ។
បច្ចុប្បន្នវត្ថុតាងសារធាតុញៀនទម្ងន់ ៩៥៣,២ ក្រាម និងម៉ូតូមួយគ្រឿង ត្រូវបានជំនាញការិយាល័យប្រឆាំងគ្រឿងញៀន ខេត្តស្ទឹងត្រែង កសាងសំណុំរឿង បញ្ជូនជនសង្ស័យទៅតុលាការបន្ត៕
