លោកម៉ម សូណង់ដូ ស្នើសុំធ្វើបាតុកម្ម និងដង្ហែក្បួនចាប់ពីថ្ងៃទី២៧ មករា ទាមទារហ្វ្រេកង់វិទ្យុ.ទូរទស្សន៍សំបុកឃ្មុំ
ភ្នំពេញ: បន្ទាប់ពីត្រូវលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បដិសេធអំពីការស្នើសុំហ្រេ្វកង់វិទ្យុ និងទូរទស្សន៍របស់ស្ថានីយវិទ្យុសំបុកឃ្មុំ ដោយសំអាងថា ពុំមានសល់ហ្វ្រេនោះនៅថ្ងៃទី១៤ ខែមករា ឆ្នាំ២០១៤ លោក ម៉ម សូណង់ដូ ប្រធានវិទ្យុសំបុកឃ្មុំ បានដាក់លិខិតជូនអភិបាលរាជធានីភ្នំពេញ ស្នើសុំធ្វើបាតុកម្មជារៀងរាល់សប្ដាហ៍ ចាប់ពីថ្ងៃចន្ទ ដល់ថ្ងៃសុក្រ។លិខិតដាក់ជូនអភិបាលរាជធានីភ្នំពេញ បានលើកឡើងថា ចាប់ពីថ្ងៃចន្ទ ទី២៧ ខែមករា ឆ្នាំ២០១៤ តទៅ លោក ម៉ម សូណង់ដូ នឹងដឹកនាំបាតុករ ចំនួនតិចជាង ២០០នាក់ ធ្វើបាតុកម្មជារៀងរាល់សប្ដាហ៍ ចាប់ពីថ្ងៃចន្ទ ដល់ថ្ងៃសុក្រ ដោយជួបជុំគ្នានៅទីលានប្រជាធិបតេយ្យ វេលាម៉ោង ៧ព្រឹក ហើយដង្ហែក្បួនឆ្ពោះទៅកាន់ក្រសួងព័ត៌មាន នៅវេលាម៉ោង ៨ព្រឹក ដល់ ១២ថ្ងៃត្រង់ ដើម្បីទាមទារឲ្យក្រសួងព័ត៌មាន អនុញ្ញាតឲ្យវិទ្យុសំបុកឃ្មុំ ដំឡើងកម្លាំងផ្សាយបន្តទៅតាមខេត្ត និងសុំហ្រេ្វកង់សម្រាប់បង្កើតទូរទស្សន៍។
មិនទាន់មានការឆ្លើយតបបែបណា ពីសាលារាជធានីភ្នំពេញ នៅឡើយទេ។ ប៉ុន្តែជាការកត់សម្គាល់ លិខិតស្នើសុំធ្វើបាតុកម្ម និងដង្ហែក្បួន ខាងលើនេះ បានធ្វើឡើង ខណៈដែលអាជ្ញាធរ បានដាក់ចេញនូវបម្រាម មិនឲ្យមានការជួបជុំ ហែរក្បួន ក្នុងអំឡុងពេលដែលស្ថានការណ៍នយោបាយ នៅតានតឹងនៅឡើយ៕
ប្រភពពី CEN
