ចាប់ខ្លួនជនសង្ស័យ២នាក់នៅប៉ោយប៉ែត ជាមួយក្រដាស់ប្រាក់ដុល្លារក្លែងក្លាយរាប់ពាន់សន្លឹក
បើតាមនគរបាលក្រុងប៉ោយប៉ែត ឲ្យដឹងថា ប្រាក់ដុល្លារក្លែងក្លាយ ដែលសមត្ថកិច្ចរឹបអូសបាន មានដូចជា សន្លឹកលុយប្រភេទ១០០ដុល្លារមានចំនួន២៣០០សន្លឹក ស្មើនឹង២៣០០០០ដុល្លារ និងសន្លឹកប្រភេទ១ដុល្លារមាន៦៦២សន្លឹក ស្មើនឹង៦៦២ដុល្លារ។
តាមសមត្ថកិច្ចជនសង្ស័យទាំង២នាក់ដែលត្រូវចាប់ខ្លួននោះមានឈ្មោះ តាំង ធារិទ្ធ ភេទប្រុស អាយុ៣៥ឆ្នាំ ជាម្ចាស់សន្លឹករូបិយប័ណ្ណ មានទីលំនៅភូមិអូរបែកក្អម សង្កាត់ទឹកថ្លា ខណ្ឌសែនសុខ រាជធានីភ្នំពេញ និងឈ្មោះ សួន ង៉ូវ ភេទប្រុស អាយុ៥៣ឆ្នាំ ជាម្ចាស់និងជាអ្នកបើករថយន្ត មានទីលំនៅភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។ មុខសញ្ញាទាំងពីរនាក់ បានធ្វើសកម្មភាពចេញពីម្ដុំរង្វង់មូលស្រីគ្រប់លក្ខណ៍ ក្រុងសិរីសោភ័ណ មកភូមិកូនដំរី សង្កាត់និមិត្ត ក្រុងប៉ោយប៉ែត។
បច្ចុប្បន្នជនសង្ស័យទាំងពីរនាក់ត្រូវសមត្ថកិច្ចបញ្ជូនទៅតុលាការ ដើម្បីធ្វើការសាកសួរបន្ធម និងកំពុងធ្វើការពិនិត្យកោសល្យវិច្ច័យទៅលើក្រដាស់ប្រាក់នោះ៕
ប្រភពពី ANN
