លោក សម រង្ស៊ី៖ ប្រជុំរដ្ឋសភាបានលុះត្រាតែមានការធានាបោះឆ្នោតឡើងវិញ
ការប្រកាសនេះគឺធ្វើឡើងបន្ចាប់ពីបញ្ចប់ ជំនួបពិភាក្សាការងារ រវាងលោកនាយករដ្ឋមន្រ្តី ហ៊ុន សែន ជាមួយនិងលោក សុរិយា ប្រាសាទ ស៊ូប៊ែឌី អ្នក រាយការណ៍ពិសេស អង្គការសហប្រជាជាតិ(អ.ស.ប)ទទួលសិទ្ធិមនុស្សប្រចាំកម្ពុជាកាលពីព្រឹក ថ្ងៃទី១៥ ខែមករា នៅវិមានសន្តិភាព។
លោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជាបានបព្ជាក់នៅមុខ តំណាងពិសេស អ.ស.ប ថា លោកនៅតែរក្សាបើកជំហរទ្វារចចរចាជាមួយគណបក្សសង្គ្រោះជាតិ ដើម្បីដោះស្រាយភាពទល់ច្រក។ នាយករដ្ឋមន្ត្រីបានលើកឡើងថា ការដោះស្រាយភាពទាល់ច្រកគ្មានអ្វីក្រៅពីការចូលសភាដើម្បីដោះស្រាយទេ។
ជាការឆ្លើយតបលោក សម រង្ស៊ី ប្រធានគណបក្សសង្គ្រោះជាតិ បានសរសេរលើបណ្ដាញសង្គមហ្វេសប៊ុក របស់លោក នៅថ្ងៃម្សិលមិញនេះ ថា គណបក្សសង្គ្រោះជាតិ ស្វាគមន៍នូវតួនាទី របស់អង្គការសហប្រជាជាតិ ដើម្បីដោះស្រាយ វិបត្តិនយោបាយ ក្រោយការបោះឆ្នោត។ លោកបញ្ជាក់ថា “ប៉ុន្តែការចូលរួមប្រជុំរដ្ឋសភាអាចធ្វើទៅបាន លុះត្រាតែមានការធានាឲ្យមានការកែទម្រង់ប្រព័ន្ធ បោះឆ្នោត(មុនគេផ្លាស់ គ.ជ.ប.) ដើម្បីឈានទៅរកការបោះឆ្នោតឡើងវិញក្នុងពេលឆាប់ៗនេះ”។
គួរជម្រាបដែរ ថា ចាប់តាំងពីរដ្ឋសភាបានបើកដំណើរ ក្រោយការបោះឆ្នោតជ្រើសតាំង តំណាងរាស្ដ្រ នីតិកាលទី៥ កាលពីខែកក្កដា មក តំណាងរាស្ដ្រជាប់ឆ្នោតរបស់គណបក្សសង្គ្រោះជាតិទាំង៥៥រូប មិនដែលបានទៅចូលរួមប្រជុំម្ដងណាឡើយ។ តំណាងរាស្ដ្របក្សប្រឆាំង ចាត់ទុករដ្ឋាភិបាល និងរដ្ឋសភាក្នុងអណ្ណត្ដិទី៥នេះ គឺបង្កើតឡើងដោយ មិនស្របច្បាប់ តែគណបក្សកាន់អំណាច ថាស្របច្បាប់ ព្រោះអ្វី គឺបានធ្វើទៅតាមច្បាប់តម្រូវហើយ ៕
ប្រភពពី Free Press Magazine
