ERA ជម្រុញឲ្យរំសាយ គ.ជ.ប
សម្ព័ន្ធកំណែទម្រង់ការបោះឆ្នោត ERA ដែលជាបណ្ដុំ នៃអង្គការសង្គមស៊ីវិល ចំនួន២០ កាលពីថ្ងៃ សុក្រ ម្សិលមិញ បានដាក់ការជម្រុញឲ្យរដ្ឋាភិបាល រំសាយគណៈកម្មាធិការជាតិ រៀបចំការបោះឆ្នោត (គ.ជ.ប) ។ ការទាមទារបន្ទាប់ពី ERA បានរកឃើញថា ការរៀបចំការបោះឆ្នោតនៅកម្ពុជា ដោយ គ.ជ.ប កាលពីថ្ងៃទី ២៨ កក្កដា កន្លងទៅ គ្មានតម្លាភាព។
ERA បានលើកឡើង នៅក្នុងរបាយការណ៏មួយរបស់ខ្លួនថា ត្រូវតែរំសាយ គ.ជ.ប បច្ចុប្បន្ន ដោយបង្កើតគណៈកម្មាធិការថ្មីមួយ ដែលឯករាជ្យ និងមានធម្មនុញ្ញភាពពេញលេញ ប្រកបដោយអំណាច និងយុត្តាធិការធំទូលាយ មិនស្ថិតក្រោមសម្ពាធរបស់គណបក្សនយោបាយ ។
លោកស្រី ឡូរ៉ា ថមធុន (Laura thornton) នាយិកា វិទ្យាស្ថានជាតិ ដើម្បីលិទ្ធិប្រជាធិបតេយ្យ (NDI) ដែលជាសមាជិកមួយរបស់ ERA បានឲ្យដឹងតាមរយៈអ្នកបកប្រែថា ភាពមិនប្រក្រតីជាច្រើន បានកើតមានអំឡុងការបោះឆ្នោត កម្ពុជា ឆ្នាំ២០១៣ រួមមាន ការបដិសេធពលរដ្ឋ ដែលមានសិទ្ធិបោះឆ្នោត ពីបញ្ជីបោះឆ្នោត ការបញ្ចូលអ្នកគ្មានសិទ្ធិបោះឆ្នោត ឬមានឈ្មោះស្ទួន ក្នុងបញ្ជីបោះឆ្នោត ការចែកចាយឯកសារ ដូចជាលិខិតបញ្ជាក់អត្តសញ្ញាណ សម្រាប់ការបោះឆ្នោតច្រើន និងការមិនកែប្រែចំនួនអាសនៈសម្រាប់មណ្ឌលបោះឆ្នោតនីមួយៗ តាមច្បាប់បានកំណត់ ជាដើម ។
ភាពមិនប្រក្រតីនេះ ក៏ត្រូវបានមើលឃើញ ដោយគណបក្សសង្គ្រោះជាតិផងដែរ ។ ហើយគណបក្សប្រឆាំងនេះ បានប្រកាសរួចហើយថា បាតុកម្មដែលគ្រោងធ្វើ នៅថ្ងៃអាទិត្យស្អែក គឺទាមទារឲ្យមានការបោះឆ្នោតឡើងវិញ ។ ជាការទាមទារដែលត្រូវបានច្រានចោលរួចហើយ ដោយលោក ស ខេង រដ្ឋមន្ត្រីក្រសួងមហាផ្ទៃ ៕
ប្រភពពី Free Press Magazine
