ឆែកឆេរផ្ទះប្រធានក្រុមឆ្មាំ ព្រះសក្យមុនីចេតិយ រកឃើញវត្ថុមានតម្លៃ
មកដល់ថ្ងៃ ១៣ ធ្នូ គឺមានរយៈពេល៥ថ្ងៃហើយជុំវិញការភ្ញាក់ផ្អើលថា ព្រះសុវណ្ណកោដ្ឋតម្កល់ ព្រះ បរមសារីរិកធាតុ ត្រូវបានចោរទមិឡលួចយកចេញពីក្នុងព្រះបរមសក្យមុនីចេតិយ ស្ថិតលើ កំពូល ភ្នំព្រះរាជទ្រព្យ។បញ្ហាដែលធ្វើឱ្យមានការភ្ញាក់ផ្អើលនេះ ក៏នៅតែមិនមានប្រភពផ្លូវការណាមួយ ប្រ កាសឱ្យដឹងជាសាធារណៈនោះទេ និងស្ថិតក្នុងសភាពអាថ៌កំបាំងដដែល ទោះបីអ្នកសារព័ត៌មាន ប្រឹងប្រែងក្នុងការស្វែងរកព័ត៌មានពិត ឬគួរជឿជាក់ខ្លះៗដើម្បីផ្សព្វផ្សាយឱ្យសាធារណជន បានដឹង ក្តីក៏លំបាកក្នុងការយកព័ត៌មាននេះដែរ និងអាចនិយាយបានថា ព័ត៌មានដែលបានផ្សព្វផ្សាយ កន្លង មក ជាប្រភពក្រៅផ្លូវការទាំងអស់ ដោយសារមន្ត្រីនានាបានបិទមាត់និងសុំសិទ្ធិមិនធ្វើអត្ថាធិប្បាយ ជុំវិញព័ត៌មាននេះទេ។ទោះបីជាផ្ទៃទឹកស្ងប់ ក្តីតែក្នុងទឹកពិតជាមានត្រី ដែលនោះគឺការស៊ើបអង្កេត ស្រាវជ្រាវយ៉ាងក្តៅគគុកពីសំណាក់សមត្ថកិច្ច។តាមប្រភពព័ត៌មាននៅរសៀលថ្ងៃទី១៣ធ្នូបានឱ្យ ដឹងថា មនុស្សចំនួន៥នាក់ដែលសង្ស័យថាមានការពាក់ព័ន្ធខ្លាំងត្រូវបាននាំមកកាន់ស្នងការដ្ឋាន នគរបាលខេត្តកណ្តាលដើម្បីធ្វើការសាកសួរ ហើយក៏បាននាំខ្លួនជនសង្ស័យ៤នាក់ មកកាន់ក្រសួង មហាផ្ទៃ ។មិនទាន់មានប្រភពព័ត៌មានណាមួយជាផ្លូវការអះអាងថា អ្នកទាំង៤នាក់ដែលនាំខ្លួនមកសាកសួរនៅ ក្រសួងមហាផ្ទៃនេះ ពាក់ព័ន្ធដល់កម្រិតណានោះទេ ដោយព័ត៌មានមិនត្រូវបានទម្លាយឱ្យដឹង។
ប្រភពដដែលបានឱ្យដឹងថា ក្នុងចំណោមមនុស្ស៥នាក់ដែលជាប់ពាក់ព័ន្ធសំខាន់នោះ មានម្នាក់ជា ប្រធានក្រុមអ្នកយាមនៅភ្នំព្រះរាជទ្រព្យក្នុងចំណោមបុគ្គលិកជាង២០នាក់។ រហូតមកដល់ល្ងាចថ្ងៃទី១៣ ធ្នូ ក្រោយពីបញ្ជូនមនុស្ស៤នាក់ទៅសាកសួរនៅក្រសួងមហាផ្ទៃគេនៅមិនទាន់ដឹងថាអ្នកទាំងនោះមានជាប់ពាក់ព័ន្ធដល់កម្រិតណាទេ ព្រោះព័ត៌មាននេះត្រូវបានរក្សាជាការសម្ងាត់បំផុត។តែមានប្រភពខ្លះថា សមត្ថកិច្ចបានឈានកាន់តែកៀកក្នុងការកំណត់មុខសញ្ញាជនសង្ស័យហើយ។
ប្រភពព័ត៌មានដាច់ដោយឡែកមួយបានឱ្យដឹងថា នៅវេលាម៉ោងជាង១០ព្រឹកថ្ងៃទី១៣ ធ្នូលំនៅឋាន របស់ប្រធានឆ្មាំព្រះបរមសក្យមុនីចេតិយនៅផ្លូវលេខ១៥១ ភូមិព្រែកព្នៅ សង្កាត់ព្រែកព្នៅ ខណ្ឌសែន សុខ ត្រូវបានសមត្ថកិច្ចចម្រុះធ្វើការឆែកឆេរអស់រយៈ ពេលជាង២ម៉ោងបានរកឃើញព្រះបដិមា និង វត្ថុបុរាណមួយចំនួនដែលតាមប្រភពថា មានច្រើនប្រភេទរហូត២៨មុខបានលាក់ក្នុងផ្ទះនិង ក្នុងរថយន្តដែលគាត់ជិះ។ ប្រធានឆ្មាំ និងជាម្ចាស់ផ្ទះនេះឈ្មោះ ផា សុខែម អាយុ៥៦ឆ្នាំ។ មិនមានការផ្តល់ព័ត៌មានណាមួយថាការរកឃើញនេះមានទាក់ទិន នឹងការលួចព្រះសុវណ្ណកោដ្ឋ តម្កល់ព្រះបរមសារីរិកធាតុនោះ ឬបែបណាទេ តែក៏ជាសញ្ញានៃការតាមស្វែងរក ដោយគ្រាន់តែ មន្ត្រីនានាមិនបានបង្ហើបប្រាប់ដល់អ្នកកាសែតតែប៉ុណ្ណោះ។មន្ត្រីប៉ូលិសមួយរូបបង្ហើបថាបានឈានទៅដល់ការកំណត់មុខសញ្ញាហើយ គ្រាន់តែការរកភស្ដុតាងមិនទាន់ឃើញនៅឡើយ។ អ្នកតាមដានជុំវិញហេតុការណ៍ចោរទមិឡលួចព្រះសុវណ្ណកោដ្ឋតម្កល់ព្រះបរមសារីរិកធាតុនេះ បាននិយាយថា ដោយអានុភាពនៃព្រះបារមីនេះពួកចោរទមិឡទាំងនោះនឹងត្រូវវែកមុខមិនខានឡើយ ដើម្បីឱ្យទទួលទោសចំពោះការឆោតល្ងង់របស់ពួកគេដែលបានបំផ្លាញបេះដូងពុទ្ធសាសនិកជន ខ្មែរព្រោះតែលួចកោដ្ឋមាស។ដោយសារព័ត៌មានត្រូវសមត្ថកិច្ចបិទជិតពេក ទើបមិនអាចដឹងថា វត្ថុទាំង២៨មុខនេះត្រូវគេលួចចេញពីព្រះសក្យមុនីចេតិយជាមួយព្រះសុវណ្ណកោដ្ឋមែនឬលួចពីប្រភពណាមកឡើយ។
ប៉ុន្តែតាមការតាមប្រមាញ់ចោរទមិឡដ៏មមាញឹកទោះក្នុងតម្លៃណាក៏ដោយក៏សង្ឃឹមថា អាចនឹងរកឃើញព្រះសុវណ្ណកោដ្ឋនៃព្រះសារីរិកធាតុមិនខានឡើយ៕
(វត្ថុបុរាណដែលរកឃើញនៅក្នុងផ្ទះនិងក្នុងរថយន្តរបស់ប្រធានឆ្មាំព្រះសក្យមុនីចេតិយ)
ប្រភពពី Free Press Magazine
