ស្ដ្រីម្នាក់រងគ្រោះព្រោះទិញស្ករសចោរ២២បាវ
ភ្នំពេញ ៖ ស្ដ្រីម្នាក់បានអង្គុយយំហើមភ្នែក ហើយបានដាក់ពាក្យបណ្ដឹងទាមទារប្រាក់ដែលបាត់បង់មកវិញ បន្ទាប់ពី ទិញស្ករសចំនួន២២បាវពីកម្មករ២នាក់ ដែលលួចពីឃ្លាំងយកមកលក់ឱ្យ ហើយត្រូវម្ចាស់ស្ករសមកយកវិញ ដោយឱ្យបង់ខាតជាទឹកប្រាក់ចំនួន១៥០ដុល្លារ ដោយចោទថាទទួលទិញផលចោរកម្ម រហូតមានការតវ៉ាទាមទារពីភាគីម្ខាងដែលអះអាងជាជនរងគ្រោះក្នុងករណីនេះ ឈានដល់ការប្ដឹងផ្ដល់គ្នាទៀតផង ។ ហេតុការណ៍នេះបានកើតឡើងនាវេលាម៉ោង១២ថ្ងៃត្រង់ ថ្ងៃទី៤ ខែធ្នូ ឆ្នាំ២០១៣ នៅផ្ទះលេខ៦៩ ផ្លូវលេខ៤៣០ សង្កាត់ផ្សារដើមថ្កូវ ខណ្ឌចំការមន ។
ភាគីម្ខាងដែលអះអាងថាខ្លួនជាជនរងគ្រោះក្នុងករណីនេះ ត្រូវបានគេស្គាល់ឈ្មោះ អ៊ិត ណៃហេង អាយុ៣៩ឆ្នាំ មានទីលំនៅកន្លែងកើតហេតុ និងភាគីម្ខាងទៀតដែលអះអាងថាជាម្ចាស់ស្ករសដែលកម្មករលួចយកមកលក់ មានឈ្មោះ ស៊ិន យូហួរ អាយុ៥៥ឆ្នាំ មានទីលំនៅជិតសាលាទួលស្វាយព្រៃ ក្នុងសង្កាត់ទួលស្វាយព្រៃ២ ខណ្ឌចំការមន ។
តាមសម្ដីអ្នកស្រី អ៊ិត ណៃហេង បាននិយាយថា អ្នកស្រីបានទិញស្ករសចំនួន២២បាវពីយុវជន២នាក់ ដោយមិនបានដឹង ថា ពួកគេបានស្ករសមកពីណាទេ ក្នុង១បាវតម្លៃ២៥ដុល្លារ សរុបជាទឹកប្រាក់ចំនួន៥៥០ដុល្លារ ។ អ្នកស្រីបន្ដថា បន្ទាប់ពីឱ្យលុយទៅ យុវជន២នាក់នោះរួចហើយ ស្រាប់តែស្ដ្រីឈ្មោះ ស៊ិន យូហួរ មកផ្ទះរបស់គាត់ ហើយអះអាងថា ស្ករសដែលអ្នកស្រីបាន ទិញគឺកម្មករនៅឃ្លាំងស្ករសរបស់គាត់លួចយកមកលក់ឱ្យទេ ហើយបានទាមទារយកស្ករសទាំងនោះទៅវិញ និងបានចោទអ្នកស្រីថាទទួលផលចោរកម្ម ។ ប៉ុន្ដែអ្នកស្រីមិនព្រម ព្រោះគាត់បានចំណាយលុយអស់ចំនួន៥០០ដុល្លារទិញស្ករសទាំងនេះ មិនអាចខាតទទេៗនោះឡើយ ហើយរូបគាត់ក៏បានដាក់ពាក្យបណ្ដឹងនៅប៉ុស្ដិ៍នគរបាល រដ្ឋបាលផ្សារដើមថ្កូវដើម្បីឱ្យជួយអន្ដរាគមន៍ ។
តាមសេចក្ដីរាយការណ៍បានឱ្យដឹងថា ក្នុងការជជែកតវ៉ាទាមទារនោះ អ្នកស្រី ស៊ិន យូហួរ បានយល់ព្រមសងលុយមកអ្នកស្រី តឹក ណៃអេង វិញ ប៉ុន្ដែមិនសងគ្រប់ចំនួនទេ ដោយឱ្យអ្នកស្រីបង់ខាតចំនួន១៥០ដុល្លារ ។ ចំណែក អ្នកស្រី អ៊ិត ណៃហេង មិនព្រមទេនៅតែទាមទារប្រាក់គ្រប់ចំនួន៥០០ដុល្លារដដែល ហើយអ្នកស្រីនិយាយថា បើមិនសងគ្រប់ចំនួនទេ គាត់មិនព្រមប្រគល់ស្ករសទៅអ្នកស្រី ស៊ិន យូហួរ ទេ បើមិនដូច្នេះត្រូវនាំខ្លួនកម្មករ២នាក់ដែលលក់ស្ករសឱ្យអ្នកមកសិន ទើបគាត់ប្រគល់ឱ្យ ៕
ប្រភពពី នគរវត្ត
Read more: http://www.cambodiapage.info/?p=6776#ixzz2mVvWH8Be
