ប្រហែលធ្វើបាបប្រជាពលរដ្ឋទើបមានជនខិលខូចលួចដុតស្នាក់ការរដ្ឋបាលជលផលអង្គរបុរីខេត្ដតាកែវ
ខេត្ដតាកែវ ៖ ស្នាក់ការជលផលអង្គរបុរីស្ថិតនៅភូមិភ្នំបាទេព ឃុំព្រែកផ្ទេល ស្រុកអង្គរបុរី ត្រូវបានអគ្គិភ័យឆេះអស់ ទាំងស្រុង ។ ហេតុការណ៍នេះបានកើត ឡើងកាលពីវេលាម៉ោង៩ព្រឹកថ្ងៃទី៤ ខែធ្នូ ឆ្នាំ២០១៣ នៅភូមិ-ឃុំកើតហេតុ ខាងលើ ។
បើតាមការអះអាងរបស់សមត្ថកិច្ច បានឱ្យដឹងថា ស្នាក់ការជលផលអង្គរ បុរីនេះមានទទឹង៩ម៉ែត្របណ្ដោយ១២ ម៉ែត្រ កម្ពស់១០ម៉ែត្រ ប្រក់ក្បឿង ជញ្ជាំងឈើ ។
ប្រភពដដែលបានបន្ដថា សម្ភារ ដែលខូចខាតរួមមានស្នាក់ការទាំងស្រុង ម៉ាស៊ីនទូក ទូកស្មាច់មួយគ្រឿង ឯកសារ ពាក់ព័ន្ធមួយចំនួន គ្រាប់កាំភ្លើង ទូដែក ដាក់ឯកសារ សម្ភារប្រើប្រាស់មួយចំនួន ដែលសរុបទឹកប្រាក់ជាង២៨លានរៀល ។
សមត្ថកិច្ចបានឱ្យដឹងទៀតថា ក្រោយ ពីចុះស៊ើបអង្កេតបន្ថែមទៀតឃើញថា មុនពេលកើតហេតុមានមន្ដ្រីជលផល ម្នាក់នៅចាំកន្លែងនិងកម្មករម្នាក់ទៀត ។
បើតាមការបំភ្លឺពីកម្មករបានឱ្យដឹង ថា មុនពេលកើតហេតុរូបគាត់បានដាំ បាយ ក្រោយដាំរួចគាត់ក៏បានពន្លត់ភ្លើង រួចរាល់ ។ ចំណែកមន្ដ្រីជលផលម្នាក់ ដែលនៅចាំស្នាក់ការបានបំភ្លឺប្រាប់ថា រូប គាត់នៅចាំកន្លែងមែន តែលោកបានមក ទិញអង្ករនៅផ្សារអង្គរបុរី អត់បានដឹងរឿង ភ្លើងឆេះនោះទេ ។
លោកនួន និត នាយសង្កាត់រដ្ឋបាល ជលផលអង្គរបុរីបានឱ្យដឹងថា រឿងនេះ លោកមិនបានដឹងពីមូលហេតុនៃការឆេះ នេះឡើយ ព្រោះលោកជាប់ប្រជុំនៅសាលា ស្រុកអង្គរបុរី ។
ប្រភពពីប្រជាពលរដ្ឋបានឱ្យដឹងថា ជុំវិញការឆេះនេះ ពួកគាត់ឃើញភ្លើង ឆេះចេញពីក្នុងបន្ទប់របស់លោកខឹម បុនថន នាយផ្នែករដ្ឋបាលជលផលអង្គរបុរី ពុំមែនចេញពីចង្ក្រានបាយឡើយ ហើយ ការឆេះនេះពួកគាត់សង្ស័យថាមានគេលួចដុត ។
ក្រោយពីស៊ើបអង្កេតរបស់សមត្ថកិច្ច បានសន្និដ្ឋានថា ភ្លើងឆេះនេះចេញពីមុខ ហើយចង្ក្រាននៅខាងក្រោយ ទំនងជាមាន ជនខិលខូចលួចដុតមែន ។ ប៉ុន្ដែបច្ចុប្បន្ន កម្លាំងជំនាញកំពុងស្រាវជ្រាវពាក់ព័ន្ធ ទៅនឹងការឆេះស្នាក់ការជលផលស្រុកអង្គរបុរីនេះ៕
ប្រភពពី នគរវត្ត
