បាត់បង់ប្រាក់ជាងបីម៉ឺនដុល្លារ បន្ទាប់ពីចោរប្លន់ចំនួនពីរដង
អ្នកស្រី វឹក ស៊ីចាន់ វ័យ ៤៩ ឆ្នាំដែលទើបបានងើបពីសន្លប់បាត់ស្មារតីកំពុងសម្រាកលើគ្រែខាងក្រោម ផ្ទះកើតហេតុក្នុងភូមិរកាក្រោម សង្កាត់សំបួរមាស ក្រុងកំពង់ចាមដោយសារចោរវាយបានប្រាប់ CEN ថា នៅពេលអ្នកស្រីកំពុងលាងត្រីនៅចង្ក្រានបាយខាងក្រោយមានមនុស្សប្រុស មាឌធំកម្ពស់ប្រហែល ១,៧០ ម៉ែត្រពាក់ម៉ាស់មុខដូចនិនចា ស្រែកគំរាមនៅឲ្យស្ងៀមហើយយកដៃខ្ទប់មាត់ និង ក្រមាចងបិទភ្នែកជិត បណ្តើរឡើងលើផ្ទះ។ ស្របពេលនោះអ្នកភ្ជង់ និងបណ្តើរគាត់បានប្រាប់គ្នាគេម្នាក់ទៀតឲ្យទៅបិទទ្វាររបងខាងមុខ។
ស្ត្រីរងគ្រោះបានឲ្យដឹងទៀតថា “ ក្រោយពីប្រមូលបានលុយបីលានរៀល , ជាងមួយម៉ឺនដុល្លារ ជាលុយលក់ឡានបងប្អូនផ្ញើនិង ខ្សែកប្លាទីនចំនួន ពីរ ខ្សែ ប្រាំមួយជី។ពួកចោរបានសួររកប្រាក់ថែមទៀត។ ពួកគេបានទាត់ធាក់ និង វាយដោយដៃពីខាងក្រោយបណ្តាលឲ្យសន្លប់បាត់ស្មារតី ។
សាច់ញាតិស្ត្រីជាជនរងគ្រោះបាននិយាយថា ករណីប្លន់លើកទីពីរនេះសង្ស័យថា ជាក្រុមដដែលបានធ្វើសកម្មភាពលួចក្នុងផ្ទះនេះអស់ប្រាក់ចំនួនជាង ពីរម៉ឺនដុល្លារកាលពីខែមករា ដើមឆ្នាំ២០១៣ ក្នុងខណៈដែលស្ត្រីម្ចាស់ផ្ទះបានទៅផ្សារ ប្តីជាគ្រូពេទ្យទៅធ្វើការ និង កូនៗបានទៅរៀនអស់ គឺលើកនេះបានចូលធ្វើសកម្មភាពនៅម៉ោងនិងពេល វេលាប្រហាក់ប្រហែលគ្នា។
ពេលនេះសមត្ថកិច្ចបានចុះមកពិនិត្យដល់ផ្ទះកើតហេតុ និង ទទួលពាក្យបណ្តឹងរួចរាល់ហើយ និងកំពុងធ្វើការស៊ើបអង្កេតស្វែងរកមុខសញ្ញាជនសង្ស័យ៕M/s
ជនរងគ្រោះ វឹក ស៊ីចាន់ ក្រោយពីចោរប្លន់វាយសន្លប់យកលុយអស់ជាងមួយម៉ឺនដុល្លារ និង កាលពីលើកទីមួយអស់ជាងពីរម៉ឺនដុល្លារសង្ស័យជាក្រុមដដែល
ផ្ទះកើតហេតុរបស់អ្នកស្រី វឹក ស៊ីចាន់ ភូមិរកាក្រោម សង្កាត់សំបួរមាស ក្រុងកំពង់ចាម
ប្រភពពី CEN
