កម្មការិនី៣នាក់ចេញពីក្លិប ត្រូវយុវជនមួយក្រុមប៉ងរំលោភតែមិនបានសម្រេច
រាជធានីភ្នំពេញ ៖ កម្មការិនីរោងចក្រ៣នាក់ទើបចេញពីក្លិបម៉ូណាកូ ត្រូវយុវជន២នាក់លេបខាយហើយសុំមួយ តែពួកនាងមិនព្រមទើបយុវជន២នាក់នោះទូរស័ព្ទហៅមិត្តភក្តិជាង១០នាក់មកដល់ស្ទាក់ចាប់ទះកំផ្លៀងម្នាក់មួយដៃប៉ុនប៉ងចាប់រំលោភ តែត្រូវបានគេជួយស្រែកទាន់ពេលវេលា ។
ហេតុការណ៍នេះកើតឡើងកាលពីវេលាម៉ោង៣ និង៥០នាទីទៀបភ្លឺថ្ងៃទី១៧ ធ្នូ ២០១៣ នេះ ស្ថិតនៅចំណុចសួចច្បារកុមារពោធិ៍ចិនតុង តាមមហាវិថីសហព័ន្ធរុស្ស៊ី ក្នុងភូមិតាងួន សង្កាត់កាកាប ខណ្ឌពោធិ៍សែនជ័យ ។
ប្រភពបានឱ្យដឹងថា នារីរងគ្រោះទាំង៣នាក់នោះមាន១-ឈ្មោះយាន អ៊ឹងហួយ អាយុ២០ឆ្នាំ ជាកម្មការិនីរោងចក្រកាត់ដេរ មានស្រុកកំណើតនៅខេត្តកំពង់ឆ្នាំង បច្ចុប្បន្នស្នាក់នៅបន្ទប់ជួលក្នុងភូមិចម្ការឪឡឹក សង្កាត់កាកាប ខណ្ឌពោធិ៍សែនជ័យ ២-ឈ្មោះញឹក ស្រីអូន អាយុ១៩ឆ្នាំ និង៣-ឈ្មោះជឿន ថារី ត្រូវជាប្អូនរបស់ឈ្មោះញឹក ស្រីអូន មានស្រុកកំណើតនៅភូមិសំណាញ ឃុំសំណាញ់ ស្រុកអង្គរជ័យ ខេត្តកំពត ។
ប្រភពពីនារីរងគ្រោះបានបន្តថា យុវជនទាំង២នាក់បានទូរស័ព្ទហៅគ្នាមក១០នាក់ជិះកង់២គ្រឿង និងខ្លះទៀតទៀតដើរមកស្ទាក់ពីខាងមុខ ហើយយុវជនម្នាក់បានអោនទៅចាប់ទាញខ្សែជើងរបស់ឈ្មោះស្រីអូន ដែលទិញក្នុងតម្លៃ៥០ដុល្លារនោះ ហើយនិយាយថា សុំមួយ ពួកនាងមិនព្រមទើបត្រូវយុវជនមួយក្រុមនោះនាំគ្នាចាប់ទះកំផ្លៀងម្នាក់មួយដៃ ធ្វើឱ្យមានការភ្ញាក់ផ្ងើលដល់សន្តិសុខ និងអ្នកលក់ដូរនៅជិតនោះស្រែកម្នាក់មួយម៉ាត់ទៀត ធ្វើឱ្យជនបង្កទាំងនោះនាំគ្នារត់គេចខ្លួនអស់ទៅ ។
