លោក សម រង្ស៊ី នឹងដឹកនាំ ការដង្ហែក្បួន ទោះបីក្រសួងមហាផ្ទៃ មិនអនុញ្ញាត
ភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ (CNRP) ក្នុងដំណើរត្រឡប់ មកពីសហរដ្ឋអាម៉េ រិកដល់ព្រលានយន្តហោះអន្តរជាតិភ្នំពេញ បានប្រកាសថា លោកនឹងដឹកនាំសកម្មជន ធ្វើមហាបាតុកម្ម នៅថ្ងៃទី១០ ខែធ្នូ ឆ្នាំ២០១៣ ស្អែកនេះ បើទោះបីជាក្រសួងមហាផ្ទៃ មិនអនុញ្ញាតឲ្យដង្ហែក្បួន យ៉ាងណាក៏ ដោយ ។
លោក សម រង្ស៊ី បានមានប្រសាសន៍ ប្រាប់ក្រុមអ្នកសារព័ត៌មាន នៅព្រលានយន្តហោះអន្តរជាតិភ្នំពេញ នៅព្រឹកថ្ងៃទី០៩ ខែធ្នូ ឆ្នាំ២០១៣ថា “ខ្ញុំនឹងធ្វើបាតុកម្មនៅថ្ងៃស្អែក ពេលព្រឹកនៅភ្នំពេញ ហើយពេល រសៀលនៅសៀមរាប”។
ក្នុងករណីក្រសួងមហាផ្ទៃ មិនអនុញ្ញាតឲ្យដង្ហែក្បួន និងមានតំណាងត្រឹមតែ ១០នាក់ ដាក់ញត្តិនៅតាម ស្ថាប័នពាក់ព័ន្ធនានា ត្រូវបានលោកប្រធាន សម រង្ស៊ី លើកឡើងថា រឿងទាំងអស់នេះ គឺវាស៊ីសងទៅលើ ស្ថានភាពជាក់ស្តែង ព្រោះលោកក៏មិនអាចឃាត់ប្រជាពលរដ្ឋមិនឲ្យចូលរួមបាននោះទេ ហើយក៏មិនបាន ដឹង ពីចំនួនប្រជាពលរដ្ឋចូលរួមប៉ុន្មាននាក់ផងដែរ ។
បើយោងលិខិតរបស់ CNRP ផ្ញើជូនសាលារាជធានីភ្នំពេញ កាលពីថ្ងៃទី០៤ ខែធ្នូ បានឲ្យដឹងថា កម្មវិធីធ្វើ មហាបាតុកម្ម នៅថ្ងៃទី១០ ខែធ្នូ របស់ CNRP នោះ ចែកចេញជាបីក្រុម ដោយក្រុមទី១ ដឹកនាំលោក កឹម សុខា អនុប្រធាន CNRP ចេញដំណើរពីស្នាក់ការកណ្ដាលរបស់ខ្លួន នៅផ្ទះលេខ៥៧៦ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ ។ ក្រុមទី២ ដឹកនាំដោយលោក សម រង្ស៊ី នឹងចេញដំណើរពីសួនច្បារ ខាងជើងស្ពានអាកាស មន្ទីរពេទ្យព្រះសង្ឃ ផ្លូវសហព័ន្ធរុស្ស៊ី សង្កាត់ទឹកល្អក់ទី១ ខណ្ឌទួលគោក ។ ក្រុម ទី៣ដឹកនាំ លោកស្រី មួរ សុខហួរ មន្ត្រីជាន់ខ្ពស់របស់ CNRP នឹងចេញដំណើរពីសួនច្បារទល់មុខឃ្លាំង សូគីម៉ិច ផ្លូវលេខ៥ សង្កាត់ឫស្សីកែវ ខណ្ឌឫស្សីកែវ ៕
