ត្រីប្រហុកមិនទាន់សំបូរទេនៅកំពង់ឆ្នាំង តែសំបូរត្រីឆ្កោក និងត្រីច្រកែងទៅវិញ
ខេត្តកំពង់ឆ្នាំង ៖ គិតមកត្រឹមថ្ងៃទី០៨ ខែធ្នូ នេះ គឺជាថ្ងៃ០៤កើត ខែមិគសិរទៅហើយ ប៉ុន្តែត្រីសម្រាប់ធ្វើប្រហុកនៅមិនទាន់សំបូរទេ ដែលខុសពីឆ្នាំមុនៗ ក្នុងខ្នើតខែនេះ គឺមានត្រូវជាបណ្តើរៗហើយ ផ្ទុយទៅវិញអ្វីគួរកត់សំគាល់នោះ គឺត្រីធំៗមានដូចជាត្រីឆ្កោក និងត្រីច្រកែង បែរជាសំបូរគួរឲ្យកត់សម្គាល់។
ទាក់ទងនិងផលនេសាទឆ្នាំនេះលោក សោម ភិរុណ នាយរងខណ្ឌរដ្ឋបាលជលផលកំពង់ឆ្នាំង បានមានប្រសាសន៍ថា តាមពិតទៅក្នុងខែខ្នើត នៃខែធ្នូនេះ ជារៀងរាល់ឆ្នាំ អាចនឹងមានត្រីប្រហុកត្រូវជាបណ្តើរហើយ ផ្ទុយទៅវិញសម្រាប់ឆ្នាំនេះ គេនៅមិនទាន់ឃើញត្រីប្រហុកត្រូវនៅឡើយទេ។
តែទោះជាយ៉ាងណាក៏ដោយ នាយរងខណ្ឌរដ្ឋបាលជលផលកំពង់ឆ្នាំងរូបនេះបានបញ្ជាក់ថា ប្រសិនបើខ្នើតខែនេះត្រីមិនទាន់ចុះ នោះគឺនៅខ្នើតខែក្រោយ ពោលគឺខែមករា ឆ្នាំ២០១៤ ត្រីប្រហុកប្រាកដជាត្រូវជាក់ជាពុំខាន។
បើតាមលោក សោម ភិរុណ ការមិនទាន់សំបូរត្រីប្រហុកនៅពេលនេះ គឺបណ្តាលមកពីធម្មជាតិ និងអាកាសធាតុ ដូចជាឆ្នាំនេះទឹកស្រកយឺត និងអាកាសធាតុត្រជាក់ខុសធម្មតាជាដើមនោះ។
គួរកត់សម្គាល់ដែរថា ថ្វីត្បិតត្រីប្រហុកមិនទាន់ត្រូវ តែគេកត់សម្គាល់ឃើញថា ត្រីប្រភេទធំៗមួយចំនួនដូចជាត្រីឆ្កោក ត្រីចង្កែងជាដើម បែរជាត្រូវនិងសំបូរទៅវិញ ប៉ុន្តែតម្លៃរបស់វានៅតែថ្លៃដដែល ពោលគឺក្នុងមួយគីឡូក្រាម ថ្លៃដល់១ម៉ឺន៩ពាន់រៀលឯណ្ណោះ។
បើតាមការឲ្យដឹងរបស់ឯកឧត្តម ណៅ ធួក ប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ សម្រាប់ឆ្នាំនេះ ត្រីប្រហុកអាចនឹងត្រូវនៅថ្ងៃទី១០ ខែធ្នូ ខាងមុខ ប្រសិនបើអាកាសធាតុអំណោយផល៕
ប្រភពពី ANN
