ទំព័រហ្វេសប៊ុកនាយករដ្ឋមន្ត្រីថា មន្ត្រីរាជការអាចទទួលបានប្រាក់ខែច្រើនជាងពេលបច្ចុប្បន្ននៅឆ្នាំក្រោយ
មន្ត្រីរាជការ ទំនងជានឹងទទួលបានប្រាក់បៀវត្សសមរម្យ ដែលអាចរស់នៅបានដូចមន្ត្រីរាជការនៅប្រទេសជិតខាង នៅឆ្នាំ២០១៤ ។ នេះបើយោងតាមសេចក្តីបរិយាយនៅក្នុងទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន នាថ្ងៃអង្គារទី៣ ធ្នូ នេះ ។
«រាជរដ្ឋាភិបាលកម្ពុជា បានបង្កើតក្រុមការងារកែទម្រង់ប្រព័ន្ធបៀរវត្សមន្ដ្រីរាជការ ដើម្បីធ្វើការសិក្សាអោយបានល្អិតល្អន់មុននឹងដាក់ជូនទៅរាជរដ្ឋាភិបាលដើម្បីជម្រុញការអនុវត្តផែនការកែទម្រង់ប្រព័ន្ធបៀរវត្សនេះអោយបានឆាប់ចាប់ពីឆ្នាំ២០១៤តទៅ» នេះជាសំណេរនៅក្នុងទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន ។
ក្រុមការងារធ្វើកំណែទម្រង់ប្រព័ន្ធបៀវត្សនេះ រួមមានក្រសួងមុខងារសាធារណៈ ក្រសួងសេដ្ឋកិច្ចនិងហិរញ្ញវត្ថុ ក្រសួងការពារជាតិ ក្រសួងមហាផ្ទៃ និងក្រសួងសង្គមកិច្ច អតីតយុទ្ធជន និងយុវនីតិសម្បទា។
នៅក្នុងសេចក្តីបរិយាយអំពីការធ្វើកំណែទម្រង់ប្រាក់បៀវត្សនេះ ស្មេរបានសំដែងការស្ងើចសរសើរដល់លោកនាយករដ្ឋមន្ត្រីហ៊ុន សែន ចំពោះការខ្វាយខ្វល់របស់លោកទៅលើជីវភាពរបស់មន្ត្រីរាជការ ដោយបានគូសបញ្ជាក់អំពីការបង្កើនប្រាក់បៀវត្សលើកទី១ក្នុងអាណត្តិទី៥នេះ កាលពីខែសីហា កន្លងទៅ ។
«សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាតែងតែគិតគូរយកចិត្តទុកដាក់ចំពោះជីវភាពរបស់មន្រ្តីរាជការខ្មែរ ។ រាល់កំណែទំរង់ទាំងអស់គឺចាប់ផ្តើមធ្វើដោយផ្អែកទៅលើអាទិភាពជាក់ស្តែងនៅតាមស្ថាប័នរដ្ឋនីមួយៗ។ ជាក់ស្តែងកាលពីខែសីហា ឆ្នាំ២០១៣ រាជរដ្ឋាភិបាលបានចេញអនុក្រិតមួយសម្រេចតម្លើងប្រាក់បៀរវត្សដល់បុគ្គលិកមន្ដ្រីរាជការម្តងរួចមកហើយ។»
ជារឿយៗ គណបក្សប្រឆាំង តែងលើកយកបញ្ហាជីវភាពខ្វះខាតរបស់បុគ្គលិក មន្ត្រីរាជការ គ្រូបង្រៀន កងកម្លាំងប្រដាប់អាវុធ មកធ្វើការរិះគន់រដ្ឋាភិបាលរបស់លោកនាយករដ្ឋមន្ត្រីហ៊ុន សែន ហើយបានយកបញ្ហាប្រាក់បៀវត្សនេះ ដាក់បញ្ចូលក្នុងគោលនយោបាយរបស់ខ្លួន ដោយសន្យាថានឹងតម្លើងប្រាក់បៀវត្សដល់មន្ត្រីរាជការយ៉ាងហោចណាស់អោយបាន១លានរៀលក្នងមួយខែ ។
ជារឿយៗ គណបក្សប្រឆាំង តែងលើកយកបញ្ហាជីវភាពខ្វះខាតរបស់បុគ្គលិក មន្ត្រីរាជការ គ្រូបង្រៀន កងកម្លាំងប្រដាប់អាវុធ មកធ្វើការរិះគន់រដ្ឋាភិបាលរបស់លោកនាយករដ្ឋមន្ត្រីហ៊ុន សែន ហើយបានយកបញ្ហាប្រាក់បៀវត្សនេះ ដាក់បញ្ចូលក្នុងគោលនយោបាយរបស់ខ្លួន ដោយសន្យាថានឹងតម្លើងប្រាក់បៀវត្សដល់មន្ត្រីរាជការយ៉ាងហោចណាស់អោយបាន១លានរៀលក្នងមួយខែ ។
គេនៅមិនទាន់ដឹងអំពីទំហំ ឬភាគរយ នៃការតម្លើងប្រាក់បៀវត្សមន្ត្រីរាជការ ដែលកំពុងគិតគូដោយក្រុមការងារធ្វើកំណែទម្រង់ប្រព័ន្ធបៀវត្សនេះនៅឡើយទេ ។ ទោះជាយ៉ាងនេះក្តី គេរំពឹងថា រដ្ឋាភិបាលនឹងទប់ស្កាត់ការឡើងថ្លៃនៃទំនិញសព្វសារពើអោយបាន នៅខណៈដែលប្រាក់បៀវត្សត្រូវបានតម្លើង ៕
ប្រភពពី Free Press Magazine
