បុរសមានស្នេហ៍ស្ម័គ្រស្មោះ នាងខារ៉ាអូខេក្បត់រត់ចោល អស់សង្ឃឹមចងកសម្លាប់ខ្លួន
រាជធានីភ្នំពេញ ៖ បុរសម្នាក់ដែលបានស្រឡាញ់ស្ត្រីខារ៉ាអូខេម្នាក់ធ្វើជាប្រពន្ធយ៉ាងប្តូរផ្តាច់ ដោយសារតែនាងរត់ចោល ក៏បានចង.កសម្លាប់ខ្លួនធ្វើឱ្យមានការភ្ញាក់ផ្អើលកាលពីវេលាម៉ោង៤និង៣០នាទីទៀបភ្លឺថ្ងៃទី៥ ធ្នូ នៅចំណុចផ្ទះជួលលេខ37E2 ផ្លូវលេខ២២៣ សង្កាត់ផ្សារដើមគ ខណ្ឌទួលគោក ខណៈអ្នករស់នៅជាមួយគ្នាត្រឡប់មកពីធ្វើការ ហើយទៅបន្ទប់ទឹកក៏ប្រទះឃើញ ។
បុរសម្នាក់នេះឈ្មោះ ថាន វីរៈ អាយុ៣១ឆ្នាំ ជាអ្នកហៅម៉ូយឱ្យនាងៗរកស៊ីពេលយប់នៅម្តុំអាងទឹកអូឡាំពិក ស្នាក់នៅបន្ទប់ផ្ទះជួលជាមួយអ្នកស្គាល់គ្នានៅជាន់ទី២ កន្លែងកើតហេតុខាងលើ និងមានស្រុកកំណើតនៅភូមិត្រពាំងឃ្លោក ឃុំខ្វាវ ស្រុកសំរោង ខេត្តតាកែវ ។ តាមមន្ត្រីនគរបាលបុ៉ស្តិ៍រដ្ឋបាលផ្សារដើមគបានឱ្យដឹងថា បុរសរូបនេះបានចង.កធ្វើអត្តឃាតនឹងក្រមាភ្ជាប់ទៅនឹងចម្រឹងដែកប្រហោងខ្យល់ ។ នៅមុនពេលភ្ញាក់ផ្អើលគឺមានអ្នកស្នាក់នៅជាមួយគ្នាម្នាក់ឈ្មោះ កុយ កេត ភេទប្រុស អាយុ២២ឆ្នាំ ខណៈត្រឡប់មកពីធ្វើការនៅភោជនីយដ្ឋាន១០៣ វិញដើរទៅបន្ទប់ទឹក ក៏ប្រទះឃើញបុរសរូបនេះចង.កសម្លាប់ខ្លួនបាត់ទៅហើយ ក៏បាននាំគ្នាស្រាយទម្លាក់ ។ ភ្លាមនោះក៏បានធ្វើឱ្យមានការភ្ញាក់ផ្អើល ហើយសមត្ថកិច្ចបានចុះទៅកន្លែងកើតហេតុរកឃើញសំបុត្របណ្តាំចំនួន២ច្បាប់ ដែលបុរសរូបនោះទុកឱ្យស្ត្រីម្នាក់ដែលខ្លួនស្រឡាញ់យ៉ាងស្មោះស្ម័គ្រ និងផ្ញើទៅបងប្រុស ។
តាមព័ត៌មានឱ្យដឹងទៀតថា បុរសដែលមានវិបត្តិស្នេហារូបនេះបានមកសុំអ្នកស្គាល់គ្នាស្នាក់នៅទើបបានប្រមាណកន្លះខែ ហើយពេលយប់តែងតែទៅហៅម៉ូយឱ្យពួកនាងៗរកសុីផ្លូវភេទនៅតាមដងផ្លូវម្តុំអាងទឹកអូឡាំពិក ។ រយៈពេល២យប់មកហើយដែលបុរសរូបនេះពុំបានទៅហៅម៉ូយទេ គឺនៅតែផ្ទះ និងក៏មិននឹកស្មានថាចង.កសម្លាប់ខ្លួនទាំងវ័យក្មេងបែបនេះឡើយ ។ បើតាមលិខិតបណ្តាំបញ្ជាក់ថា បុរសរូបនេះបានស្រឡាញ់ស្រីម្នាក់យ៉ាងស្មោះស្ម័គ្រ ហើយរស់នៅជាមួយគ្នាជាប្តីប្រពន្ធ បុ៉ន្តែបែរជាស្ត្រីម្នាក់នោះរត់ចោលបាត់ ជាហេតុធ្វើឱ្យរូបគេពុំចង់រស់នៅចង.កសម្លាប់ខ្លួនតែម្តង ។ នៅក្នុងលិខិតបណ្តាំជូនចំពោះប្រពន្ធរៀបរាប់ថា «ចូលមកដល់ប្រពន្ធសម្លាញ់ បងពិតជាស្រឡាញ់អូនខ្លាំងណាស់ បងពិតជារស់នៅដោយគ្មានអូនពុំបានឡើយ ។ ពេលដែលអូនចាកចេញពីបង ជីវិតបងរស់ដូចជាមនុស្សស្លាប់យ៉ាងអុីចឹងដែរ តើឱ្យបងរស់នៅលើលោកនេះធ្វើអ្វី បងមិនចង់រស់នៅលើលោកនេះទៀតទេ បងសុំលាអូនហើយ ប្រពន្ធសម្លាញ់ លារហូត លាដោយគ្មានវិលត្រឡប់មកវិញ ពីបងវីរៈ» ។ នៅក្នុងលិខិតនោះ ក៏បានបញ្ជាក់ទៀតថា «ពេលដែលគ្មានបង សូមអូនថែរក្សាខ្លួនឯងផង បងមិនបាននៅមើលថែរក្សាអូនទៀតទេ ហត្ថលេខាពីបងវីរៈ» ។
ចំណែកសំបុត្រទី២ ដែលផ្ញើទៅបងប្រុសរៀបរាប់ថា «ចូលមកដល់បងប្រុសជាទីគោរពរបស់ប្អូន ប្អូនសុំអរគុណគ្រប់យ៉ាង មួយរយៈពេលដែលរស់នៅជាមួយនឹងបង ប្អូនពិតជាមានភាពកក់ក្តៅខ្លាំងណាស់ ប្អូនសុំលាបងរហូត ពីប្អូនវីរៈ» ។ បើតាមស្ត្រីជាម្តាយឈ្មោះ សឹុម ស្រីមុំ អាយុ៥៣ឆ្នាំបាននិយាយរៀបរាប់ទាំងទឹកភ្នែកថា កូនប្រុសរបស់គាត់បានរៀបការប្រពន្ធនៅឯខេត្តស្វាយរៀង តែបានលែងលះគ្នាអស់រយៈពេលប្រមាណ៤ឆ្នាំមកហើយ និងបានទៅស្រឡាញ់ស្ត្រីម្នាក់ឈ្មោះមុំ ដូចឈ្មោះគាត់ដែររយៈពេលប្រមាណ១ឆ្នាំហើយ ។ គាត់មិនដឹងថាស្ត្រីនោះធ្វើម្តេចទេ ទើបបានជាកូនប្រុសរបស់គាត់ស្រឡាញ់ងប់ងុល សូម្បីតែស្ត្រីនោះវាយនឹងស្បែកជើង ជេរម៉្រាយ ក៏នៅតែកាន់ជើងស្រឡាញ់ដែរ ។ មិនតែបុ៉ណ្ណោះ សុខចិត្តកាត់កាល់ឪពុកម្តាយ ហើយទារប្រាក់គាត់ចំនួន៥០០ដុល្លារមករស់នៅជាមួយស្ត្រី តែគាត់បានឱ្យតែ១២០ដុល្លារទេ ។
តាមព័ត៌មានបន្តទៀតថា រយៈពេលប្រមាណមួយខែកន្លងមកនេះ ស្ត្រីជាប្រពន្ធបានទៅបាត់ធ្វើឱ្យឈ្មោះវីរៈ អស់សង្ឃឹម ក៏បានចង.កសម្លាប់ខ្លួនតែម្តង ។ សព ត្រូវបានក្រុមគ្រួសារបញ្ជូនទៅកាន់ឈាបនដ្ឋានវត្តទឹកថ្លាដើម្បីធ្វើបុណ្យតាមប្រពៃណី ៕
ប្រភព ពីកោះសន្តិភាព
