ម៉ូតូ២គ្រឿងបុកគ្នានៅកណ្តាលទ្រូងថ្នល់ស្លាប់ម្នាក់ របួសធ្ងន់៣នាក់
រាជធានីភ្នំពេញ ៖ បុរសម្នាក់ស្លាប់ និងមនុស្សប្រុស ស្រី៣នាក់ទៀតបែកក្បាលផុងលលាដ៏រងរបួសធ្ងន់ ខណៈជិះម៉ូតូបុកគ្នានៅកណ្តាលទ្រូងផ្លូវកាលពីវេលាម៉ោង៥ និង៣០នាទីទៀបភ្លឺ ថ្ងៃទី៦ ធ្នូ នៅលើកំណាត់ផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ។
ប្រភពព័ត៌មានពីកន្លែងកើតហេតុបានឱ្យដឹងថា ម៉ូតូវីវ៉ា ស៊េរី២០០៧ ពណ៌ខ្មៅ ពាក់ស្លាកលេខភ្នំពេញ កណ្តាល១C៧៧៥៧ ជិះ២នាក់ប្តីដឹកប្រពន្ធទៅធ្វើការរោងចក្រកាត់ដេរក្នុងទិសដៅពីត្បូងទៅជើង ចំណែកម៉ូតូ១គ្រឿងទៀតម៉ាកស្ទែប ពណ៌ខ្មៅ ពាក់ស្លាកលេខភ្នំពេញ១AJ៦១៩២ ជិះគ្នា២នាក់ក្នុងទិសដៅពីជើងទៅត្បូង ខណៈមកដល់ចំណុចកើតហេតុម៉ូតូទាំង២គ្រឿងជិះលឿនដូចគ្នាបានបុកគ្នាយ៉ាងពេញទំហឹងលាន់ដូចរន្ទះដួលកណ្តាលទ្រូងថ្នល់បណ្តាលឱ្យអ្នកបើកម៉ូតូវីវ៉ាខ្ទាតមួកសុវត្ថិភាពចេញពីក្បាលបោកនឹងថ្នល់ហូរឈាមស្លាប់ភ្លាមៗ ចំណែកស្ត្រីជាប្រពន្ធបែកក្បាលរបួសធ្ងន់ ដោយឡែកអ្នកបើកម៉ូតូម៉ាកស្ទែបមិនមានពាក់មួកសុវត្ថិភាពដួលបោកក្បាលផុងលលាដ៏ទាំង២នាក់របួសធ្ងន់។
ជនរងគ្រោះដែលស្លាប់ឈ្មោះលី សុវណ្ណារ៉ា អាយុ៤០ឆ្នាំ ជាកម្មករសំណង់ ចំណែកប្រពន្ធឈ្មោះគី សុភាព អាយុ៣២ឆ្នាំ ជាកម្មកររោងចក្រដុងដូភិចស្តាយ មានទីលំនៅភូមិធ្លក ឃុំត្រពាំងក្រសាំង ស្រុកបាទី ខេត្តតាកែវ ចំណែកអ្នកបើកម៉ូតូស្ទែបឈ្មោះស៊ុន ម៉ាឡែន ភេទប្រុស អាយុ២៩ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ និងអ្នករួមដំណើរម្នាក់ទៀតមិនត្រូវបានស្គាល់ឈ្មោះទេ៕
