ផ្ទុះមីននៅបាត់ដំបងបុរសម្នាក់រងរបួសធ្ងន់និងដាច់ជើងផ្ទុះមីននៅបាត់ដំបងបុរសម្នាក់រងរបួសធ្ងន់និងដាច់ជើង
អធិការស្រុក គាស់ក្រឡ លោក សៀក ភា បានឲ្យដឹងថា ចំណុចភូមិគោករកា ឃុំដូនបាន ស្រុកគាស់ក្រឡ ខេត្តបាត់ដំបងនេះដើម គឺជាទីតាំងសមរភូមិក្តៅក្នុងការប្រយុទ្ធជាមួយខ្មែរក្រហម។
លោកអធិការបានបន្តថា ជនរងគ្រោះបានច្រូតឆ្វែលជុំវិញទួលមួយកន្លែង ហើយកិនទៅលើគ្រាប់មីនតោនដែល សល់ពីសម័យសង្គ្រាមបណ្តាលអោយផ្ទុះឡើងនិងធ្វើអោយអ្នកបើកបរដាច់ជើង ខាងស្តាំ។ឯម៉ាស៊ីនច្រូតស្រូវបានខូចខាតយ៉ាងដំណំដែលមិនអាចជួសជុល ប្រើការបានឡើយ។
លោក ឆេង វី ម្ចាស់ម៉ាស៊ីនច្រូតបានឲ្យដឹងថា អ្នកបើកបរម៉ាស៊ីនច្រូតនោះឈ្មោះយន រស់ ភេទប្រុស អាយុ២៣ឆ្នាំ រស់នៅឯភូមិកំពង់ព្រះ ឃុំកំពង់ព្រះ ស្រុកសង្កែ ត្រូវបានប្រជាកសិករជួលមកច្រូតស្រូវនៅចំណុចកើតហេតុខាងលើ។
មន្ត្រីCMAC ប្រចាំ ខេត្ត បាត់ដំបង បានអះអាងថា បើពិនិត្យលើវិជ្ឈមាត្រនិងជម្រៅនៃរណ្ដៅគេអាចសន្និដ្ឋានបានថា គ្រាប់មីនតោន ដែលផ្ទុះនេះអាចដាក់ត្រួតគ្នាចំនួន២គ្រាប់។លោកថា តំបន់ខ្លះក្នុងស្រុកនេះកំលាំង CMAC មិនទាន់ធ្វើការរុករកនៅឡើយទេ។ម្យ៉ាងទៀត ដោយគ្រាប់មីនតោនខ្លះត្រូវបានគេកប់ក្នុងដីជម្រៅជ្រៅដែលជាហេតុ នាំឲ្យលំបាកក្នុងការរុករកផងដែរ៕
ប្រភពពី Free Press Magazine
