បាតុករគណបក្សសង្គ្រោះជាតិ វាយបុរសម្នាក់បាក់អស់ធ្មេញបីចោទថាជា«យួន»
ប្រភពពីគេហទំព័រAvatar news បានផ្សាយថា លោកអន រ៉ា ដែលមានមុខរបរជាកម្មករ និងមានទីលំនៅនៅភូមិស្លែរលើង សង្កាត់ទឹកថ្លា ខណ្ឌសែនសុខ រាជធានីភ្នំពេញ ត្រូវបានសន្តិសុខគណបក្សសង្រ្គោះជាតិ ព្រួតគ្នាចាប់វាយបាក់ធ្មេញមុខអស់៣ នៅទីលានប្រជាធិបតេយ្យ កាលពីយប់ថ្ងៃទី២៣ខែធ្នូឆ្នាំ២០១៣ ដោយសន្តិសុខចោទលោកអន រ៉ា ជាដំបូងថា ជាយួន…ប៉ុន្តែក្រោយមកទៀត បានចោទថាជាចោរលួចទូរស័ព្ទដៃបាតុករ។
ក្រោយពីចាប់វាយអោយរបួសបាក់ធ្មេញហើយ សន្តិសុខបក្សសង្រ្គោះជាតិបានយក លោក អន រ៉ា ទៅប្រគល់អោយនគរបាលប៉ុស្តិ៍វត្តភ្នំ។ ប៉ុន្តែនៅពេលទៅដល់ប៉ុស្តិ៍នគរបាលវត្តភ្នំ សមត្ថកិច្ចបានសួររកជនរងគ្រោះជាម្ចាស់ទូរស័ព្ទ និងទូរស័ព្ទជាវត្ថុតាង ដើម្បីដាក់ទោស លោកអន រ៉ា នោះ ក្រុមសន្តិសុខរបស់គណបក្សសមរង្ស៊ី បានឆ្លើយថា អត់មានអ្វីទាំងអស់។ លោកអន រ៉ា ត្រូវគេរាយការណ៍ថា បានដាក់ពាក្យបណ្ដឹង ដើម្បីប្ដឹងសន្តិសុខគណបក្សសង្រ្គោះជាតិ ពីបទប្រើហឹង្សាដោយចេតនា។
ដោយផ្អែកលើប្រវត្តិសាស្រ្តពីអតីតកាល បញ្ហាជនជាតិវៀតណាមត្រូវបានបក្សនយោបាយមួយចំនួននៅកម្ពុជា ប្រើប្រាស់ជាសន្លឹកបៀរដើម្បីដណ្ដើមប្រជាប្រិយភាពនិងការគាំទ្រពី ប្រជាពលរដ្ឋខ្មែរជាម្ចាស់ឆ្នោតរៀងរាល់ពេលបោះឆ្នោតម្ដងៗ។
យ៉ាងនេះក្ដី ក្រុមអ្នកវិភាគនានាយល់ថា លទ្ធផលនៃការប្រើសន្លឹកបៀរស្ដីពីបញ្ហាជនជាតិវៀតណាមមិនទទួលបាន លទ្ធផលធំដុំនោះទេ ដោយសារការវិវត្តន៍ផ្នែកនយោបាយលើពិភពលោកក៏ដូចជាក្នុងតំបន់ដែរ។
គួរបញ្ជាក់ថា ថ្មីៗនេះ លោក អ៊ូ វីរៈ ត្រូវបានក្រុមអ្នកគាំទ្របក្សសង្រ្គោះជាតិ វាយប្រហារយ៉ាងចាស់ ដៃតាមហ្វេសប៊ុកនិងតាមប្រព័ន្ធផ្សព្វផ្សាយនានាដែលមាននិន្នាការគាំ ទ្របក្សប្រឆាំងដោយសារតែលោក បានរិះគន់លោក សម រង្ស៊ី ប្រធានគណបក្សសង្គ្រោះជាតិថា មាននិន្នាការនយោបាយរើសអើងពូជ សាសន៍ជាពិសេសគឺជនជាតិវៀតណាម៕
ប្រភពពី Free Press Magazine
