តូចចិត្តប្រពន្ធជាស្ត្រីខារ៉ាអូខេចុះចោល ចងកសម្លាប់ខ្លួន បន្សល់ទុកបណ្តាំគួរឲ្យសង្វេគ
រាជធានីភ្នំពេញ ៖ ដោយអស់សង្ឃឹមក្នុងឆាកជីវិត បុរសម្នាក់បានសំរេចចិត្ត យកក្រម៉ានិងអាវយឺត ចងបញ្ចូលគ្នា ចងភ្ជាប់នឹងចំរឹងដែកជញ្ជាំងផ្ទះ ចងកសម្លាប់ខ្លួនស្លាប់ដូចបំណង បន្ទាប់ពីប្រពន្ធដែល បំរើការងារជា ស្រីខារ៉ាអូខេ មានហួរចុះចោលពីផ្ទះជាងមួយខែ តាមរកមិនឃើញ បង្កឲ្យមានការភ្ញាក់ផ្អើល កាលពីរាត្រីទៀបភ្លឺ ឆ្លងចូលថ្ងៃទី៥ ខែធ្នូ វេលាម៉ោង ៤និង៣០ នាទីនៅចំណុចផ្ទះជួល លេខ៣៧E2 ផ្លូវ ២២៣កែង ផ្លូវ២៣០ សង្កាត់ផ្សារដើមគរ ខណ្ឌទួលគោក។
ជនរងគ្រោះដែលគិតខ្លីមានឈ្មោះ ថាន វីរះ ភេទប្រុស អាយុ ៣១ឆ្នាំមុខរបរមិនពិតប្រាកដ ស្នាក់នៅជាមួយបងប្អូនធម៌។ នៅមុនពេលកើតហេតុ ជនរងគ្រោះបានស្នាក់នៅ ក្នុងផ្ទះខាងលើតែម្នាក់ឯង លុះមកដល់ម៉ោង ៤និង៣០នាទីឆ្លងចូលថ្ងៃទី៥ ខែធ្នូ បុរសម្នាក់ឈ្មោះ អេង សុគន្ធារ៉ា អាយុ ២២ឆ្នាំ មានមុខរបរជា បុគ្គលិកខារ៉ាអូខេ ត្រូវជាប្អូនធម៌ របស់ជនរងគ្រោះ បានត្រឡប់មកពីធ្វើការងារវិញ បើកទ្វារឡើង ក៏បានឃើញជនរងគ្រោះ ចងកសម្លាប់ខ្លួន ស្លាប់បាត់ទៅហើយ ទើបរាយការណ៍មកអោយប៉ូលិសមូលដ្ឋាន ទៅធ្វើកោសលវិច័យ។
មានការបង្ហើបអោយដឹងថា ការធ្វើអត្តឃាតនេះ ផ្តើមចេញពីការតូចចិត្ត រឿងដែលប្រពន្ធរត់ចោល រយៈពេលមួយខែមកហើយ តាមរកមិនឃើញសោះ ទើបធ្វើអោយជនរងគ្រោះ អស់សង្ឃឹមក្នុងឆាកជីវិត ក៏សំរេចចិត្តធ្វើអត្តឃាត ដោយចងកសម្លាប់ខ្លួន តែម្តងទៅ។ ក្រោយការធ្វើអត្តឃាត ប៉ូលិសបានរកឃើញសំបុត្រ បណ្តាំចំនួន២ ច្បាប់ គឺផ្ញើជូនប្រពន្ធមួយច្បាប់ និងជូនបងប្រុសមួយច្បាប់។
សំបុត្រដែលជនរងគ្រោះ ផ្តាំផ្ញើជូនប្រពន្ធនោះ មានអត្ថន័យ ទាំងស្រុងថា «ចូលមកដល់ ប្រពន្ធសម្លាញ់ បងពិតជាស្រលាញ់ អូនខ្លាំងណាស់ បងពិតជារស់នៅ ដោយគ្មានអូនពុំបានឡើយ ពេលដែលអូនចាកចេញពីបង ជីវិតបងរស់ដូចជាមនុស្សស្លាប់ យ៉ាងអញ្ចឹងដែរ តើអោយបងរស់នៅ លើលោកនេះធ្វើអ្វី បងមិនចង់រស់នៅលើ លោកនេះទៀតទេ បងសុំលាអូនហើយ ប្រពន្ធសម្លាញ់ លារហូត លាដោយគ្មានវិលត្រឡប់មកវិញ ពីបងវីរះ»។ សំបុត្រទី២ ជនរងគ្រោះបានផ្ញើទៅបងប្រុស ដែលមានខ្លឹមសារថា «ចូល មកដល់បងប្រុស ជាទីគោរពរបស់ប្អូន ប្អូនសុំអរគុណគ្រប់យ៉ាង មួយរយៈពេលដែលប្អូន រស់នៅជាមួយបង ប្អូនពិតជាមានភាពកក់ក្តៅខ្លាំងណាស់ ប្អូនសុំលាបងរហូតហើយ ពីប្អូនវីរះ»៕
______________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
