គយចល័តបង្ក្រាបស្រាគេចពន្ធនាំចូលតាមច្រកទ្វារព្រៃវល្លិ៍
ការបង្ក្រាបធ្វើឡើងកាលពីដើមសប្តាហ៍កន្លងទៅថ្មីនេះបើតាមលោក មួង រិទ្ធីអនុប្រធានការិយាល័យស្រាវជ្រាវ បង្ក្រាបអំពើរត់ពន្ធ ប្រចាំការតាមបណ្តោយផ្លូវ ជាតិលេខ១ បានឲ្យដឹងថា ស្រាដែលរឹបអូសបានពីក្រុមឈ្មួញមានចំនួនជាង១៥០កេះជាប្រភេទស្រា ដែលមានតម្លៃខ្ពស់ ត្រូវក្រុមជនខិលខូចលួចនាំចូលតាមច្រកទ្វារអន្តរជាតិព្រៃវល្លិ៍ បង្កប់តាមរថយន្តធន់ធំ ពាក់ស្លាកលេខ ភ្នំពេញ 3A-5758 ជាប្រភេទយីឌុបដឹកស្រូវ យកទៅលក់នៅប្រទេសវៀតណាម។
លោកមួង រិទ្ធី បានលើកឡើងបន្តថា ប្រភេទស្រាទាំងនេះ ប្រសិនបើសមត្ថកិច្ចមិនបង្ក្រាបបានទេហើយឈ្មួញនាំយកទៅចែកចាយ តាមទីផ្សារវាពិតជាមានការខាតបង់ចំណូលពន្ធ យ៉ាងក្រាសក្រែល។
រីឯប្រតិបត្តិការបង្ក្រាបនេះ សមត្ថកិច្ចគយចល័តបានការសហការជាមួយកងរាជអាវុធហត្ថលើផ្ទៃប្រទេស និងកងរាជអាវុធហត្ថខេត្តស្វាយរៀង ធ្វើការឃាត់រថយន្តមុខសញ្ញានៅតាមដងផ្លូវជាតិលេខ១ ចម្ងាយពីច្រកទ្វារព្រៃវល្លិ៍ប្រមាណជាង៣០គីឡូម៉ែត្រ ហើយអ្នកនៅពីក្រោយខ្នងអំពើរត់ពន្ធមួយនេះ គឺជាឈ្មួញមួយរូបរស់នៅខេត្តស្វាយរៀង ។
លោក ព្រាប គារ៉ាត់ ប្រធានការិយាល័យបង្ការនិងបង្ក្រាបអំពើរត់ពន្ធប្រចាំការនៅផ្លូវជាតិ លេខ១ បានលើកឡើងពីការខិតខំទប់ស្កាត់ អំពើរត់ពន្ធយ៉ាងមមាញឹក ដោយបានការចង្អុលបង្ហាញពីលោក កើត សុធារ៉ា ប្រធាននាយកដ្ឋានស្រាវជ្រាវនិងបង្ក្រាបបទល្មើស គេចពន្ធទូទាំងប្រទេស ទើបទទួលបានលទ្ធផលផ្លែផ្កាជាបន្តបន្ទាប់ជាពិសេសមន្ត្រីគយចល័តគ្រប់ លំដាប់ថ្នាក់ ទទួលបានការតម្រង់ទិស ចំគោលដៅ យ៉ាងសាកសមបំផុតតាំងតែពីលោកប្រធាននាយកដ្ឋានបង្ការបង្ក្រាបចូលកាន់ តំណែងថ្មី ធ្វើឲ្យក្រុមចល័តទាំងអស់អនុវត្តផែនការ ទទួលបានជោគជ័យគ្រប់ពេលវេលាគួរជាទីមោទនៈ។
លោក ព្រាប គារ៉ាត ក៏បានបង្ហាញពីការសហការល្អជាមួយសមត្ថកិច្ចតាមព្រំដែន ក៏ដូចជាអាជ្ញាធរមូលដ្ឋាន ដើម្បីឈានទៅបំបាត់រាល់ភាពអសកម្ម ស្របតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាល ក៏ដូចជាការរក្សាបាននូវសន្តិសុខ សុវត្ថិភាពល្អពិសេសបង្ការ និងបង្ក្រាបអំពើរត់ពន្ធគ្រប់ប្រភេទឆ្ពោះទៅបង្កើនចំណូលពន្ធរដ្ឋ ឲ្យមានប្រសិទ្ធិភាពខ្ពស់៕
ប្រភពពី CEN
