បុរស​ម្នាក់​និង​ស្ត្រី​ម្នាក់​បាន​របួសធ្ងន់​ខណៈ​កំពុង​ជិះ​ម៉ូតូ​ក្នុង​ហេតុការណ៍​គ្រោះថ្នាក់​ចរាចរណ៍​មួយ​បង្កឡើង​ដោយ​រថយន្ត​ទំនើប​ម៉ាក ​Lexus570​ ពណ៌​ខ្មៅ មួយគ្រឿង ជិះ​ដោយ​ឯកឧត្តម​អ្នកតំណាងរាស្ត្រ​ម្នាក់ កាលពី​វេលា​ម៉ោង​០៩​និង​៣០​នាទី​ព្រឹក នា​ថ្ងៃទី​២២ ខែវិច្ឆិកា ឆ្នាំ​២០១៣​នេះ នៅលើ​កំណាត់​ផ្លូវជាតិ​លេខ​១ ចន្លោះ​គីឡូម៉ែត្រ​លេខ​៣៦-៣៧ ភូមិ​ជ័យ​ឧ​ត្ត​ម​២ ឃុំ​សំរោង​ធំ ស្រុក​កៀនស្វាយ ខេត្តកណ្តាល ។​

សមត្ថកិច្ច​បាន​ឲ្យ​ដឹងថា ជនរងគ្រោះ​ទាំងពីរ​នាក់​ដែល​ជិះ​ម៉ូតូឌុប​គ្នា​ម៉ាក​ Scoopy មានឈ្មោះ ភិន សោភា ភេទ​ស្រី អាយុ​២០​ឆ្នាំ មាន​ស្រុ​កំណើត​នៅ​ភូមិ​ពោធិ៍ ឃុំ​ស្លា ស្រុក​សំរោង ខេត្តតាកែវ រងរបួស​ធ្ងន់​បាក់ជើង បាក់ដៃ​និង​រយះ​ស្បែកក្បាល ព្រមទាំង​ម្នាក់ទៀត​មានឈ្មោះ ភឿន ខា ភេទ​ប្រុស អាយុ​៣១​ឆ្នាំ មាន​ទីលំនៅ​ភូមិ​ពងទឹក ឃុំ​ក្រាំង​តា​យ៉ូ​វ ស្រុក​ពាម​រក៍ ខេត្តព្រៃវែង ។​

ប្រភពពី​សមត្ថកិច្ច​បា​ន​ឲ្យ​ដឹងថា រថយន្ត​បង្ក​ម៉ាក​ Lexus570 ពណ៌​ខ្មៅ​នោះ ក្រោយពី​កើតហេតុ​ភ្លាមៗ​អ្នកបើកបរ​រថយន្ត​បាន​ឈប់​ដោះ​ស្លាក​លេខ​ចេញ​ដើម្បី​កុំ​ឲ្យ​គេ​ស្គាល់ ។ ប៉ុន្តែ បើតាម​សាក្សី ដែល​បាន​ជិះ​ប្រដេញ​តាម​ពីក្រោយ​បាន​ប្រាប់​ឲ្យ​ដឹងថា រថយន្ត​បង្ក​នោះ​មាន​ពាក់​ស្លាក​លេខ រដ្ឋ​02.2-0007 ជិះ​ដោយ​ឯកឧត្តម​អ្នកតំណាងរាស្ត្រ​មួយរូប​ដែល​សមត្ថកិច្ច​ព្យាយាម​លាក់​បិទបាំង​ឈ្មោះ ។​

ព័ត៌មាន​ពី​កន្លែងកើតហេតុ​បាន​ឲ្យ​ដឹងថា មុនពេល​ជួប​ហេតុការណ៍​គ្រោះថ្នាក់​ចរាចរណ៍​នេះ រថយន្ត​បង្ក​បាន​បើកបរ​យ៉ាង​លឿន​ពី​អ្នក​លឿង​មក​រាជធានី​ភ្នំពេញ រីឯ​ម៉ូតូ​ជនរងគ្រោះ​បើកបរ​ក្នុងទិសដៅ​ពី​រាជធានី​ភ្នំពេញ​ទៅ​អ្នក​លឿង ក៏​ស្រាប់តែ​រថយន្ត​បង្ក​ជាន់​ហ្វ្រាំង​មិនទាន់បាន​បុក​ម៉ូតូ​ជនរងគ្រោះ​ចំ​ពី​ចំហៀង​ខាងស្តាំ​ផ្នែក​ខាងមុខ បណ្តាល​ឲ្យ​បែក​ចង្កៀង​ខ្ទេច​និង​ធ្លាក់​កញ្ចក់​និង​អ្នកជិះ​រងរបួស​ធ្ងន់ ។​

ក្រោយ​ហេតុការណ៍​នេះដែរ បន្ទាប់ពី​រថយន្ត​បង្ក​បាន​បើក​ចូលមក​រាជធានី​ភ្នំពេញ​បាន​ចម្ងាយ​ប្រមាណ​៣០​គីឡូម៉ែត្រ ក៏មាន​រថយន្ត​តាក់ស៊ី​មួយគ្រឿង ខំ​តាម​ព្យាយាម​ដេញ​ពីក្រោយ​ហើយ​ផ្តល់ព័ត៌មាន​ឲ្យ​សមត្ថកិច្ច​តាម​គោលដៅ​ស្ទាក់ចាប់ ប៉ុន្តែ​គ្មាន​សមត្ថកិច្ច​ណា​ចេញមុខ​ស្ទាក់ចាប់​ឃាត់​រថយន្ត​បង្ក​នេះ​ទេ ពីព្រោះ​ខ្លាច​អំណាច​ឯកឧត្តម​តំណាងរាស្ត្រ​ដែល​ជិះ​នៅក្នុង​រថយន្ត​នោះ ។​

បច្ចុប្បន្ន ជនរងគ្រោះ​ទាំងពីរ​នាក់​ដែល​រងរបួស​ក្នុង​ហេតុការណ៍​គ្រោះថ្នាក់​ចរាចរណ៍​នេះ ត្រូវបាន​ដឹកយក​ទៅ​សង្គ្រោះ​នៅ​មន្ទីរពេទ្យ​កាល់ម៉ែ​ត្រ ចំណែក​ម៉ូតូ​ជនរងគ្រោះ​កំពុង​រក្សាទុក​នៅ​អធិការដ្ឋាន​នគរបាល​ស្រុក​កៀនស្វាយ ខណៈដែល​រថយន្ត​បង្ក​ជិះ​ដោយ​ឯកឧត្តម​អ្នកតំណាងរាស្ត្រ​មានអំណាច​និង​មិន​ទទួលខុស​ត្រូវបាន​រួចខ្លួន​ព្រមទាំង​ទទួលបាន​ការជួយ​លាក់​ឈ្មោះ​ថែមទៀត  ។​

ទោះយ៉ាងណា​ក៏ដោយ មន្ត្រី​ស្នេហា​ជាតិ និង​ស្រឡាញ់​យុត្តិធម៌មួយចំនួន​បាន​ប្រាប់​ឲ្យ​ដឹងថា រថយន្ត​បង្ក​នោះ​គឺជា​រថយន្ត​របស់​ឯក​ឧ​ត្ត​ម​បណ្ឌិត​រដ្ឋ ជាម យៀប សមាជិក​គណៈអចិន្ត្រៃយ៍​គណបក្ស​ប្រជាជន​កម្ពុជា និង​ជា​អ្នកតំណាងរាស្ត្រ​មណ្ឌល​ខេត្តព្រៃវែង ព្រមទាំង​ជា​ប្រធាន​គណៈកម្មការ​សេដ្ឋកិច្ច និង​ហិរញ្ញ​វ​ត្ថុ​រដ្ឋសភា​៕​

ប្រភពពី DTN7