អភិបាលរាជធានីភ្នំពេញ៖ ការគោរពវិញ្ញាណក្ខន្ធអ្នកស្លាប់នៅកោះពេជ្រ នឹងត្រូវប្រារព្ធធ្វើជារៀងរាល់ឆ្នាំ និងជារៀងរហូត
នៅក្នុងពិធីបុណ្យសាសនាមួយ នៅស្តូបក្បែរស្ពាននាគកោះពេជ្រ នៅព្រឹកថ្ងៃទី២២វិច្ឆិកានេះ លោកប៉ា សុជាតិវង្ស អភិបាលសាលារាជធានីភ្នំពេញ បានថ្លែងនៅចំពោះមុខអ្នកចូលរួមជាង៥០០នាក់ថា ពិធីគោរព្ធវិញ្ញាណក្ខន្ធ អ្នកស្លាប់ដោយឧបទ្ទវហេតុរត់ជាន់គ្នាលើស្ពានកោះពេជ្រនៅឆ្នាំ២០១០ នឹងត្រូវប្រារព្ធធ្វើឡើងជារៀងរាល់ឆ្នាំ និងជារៀងរហូត។ គិតមកដល់ថ្ងៃទី២២វិច្ឆិកា ឆ្នាំ២០១៣ នេះ ជាគម្រប់ខួប៣ឆ្នាំគត់ នៃព្រឹត្តិការណ៍សោកនាដកម្មជាន់គ្នាស្លាប់ លើស្ពានកោះពេជ្រ នៅយប់បង្ហើយថ្ងៃបុណ្យអុំទូក។
លោកប៉ា សុជាតិវង្ស អភិបាលសាលារាជធានីភ្នំពេញ បានថ្លែងនៅព្រឹកថ្ងៃទី២២វិច្ឆិកានេះថា ពិធីគោរពវិញ្ញាណក្ខន្ធ អ្នកស្លាប់ដោយឧបទ្ទវហេតុរត់ជាន់គ្នាលើស្ពានកោះពេជ្រនៅឆ្នាំ២០១០ នឹងត្រូវប្រារព្ធធ្វើឡើងជារៀងរាល់ឆ្នាំ និងជារៀងរហូត។ លោកបានថ្លែងដូច្នេះ នៅក្នុងពិធីគោរពវិញ្ញាណក្ខន្ធអ្នកស្លាប់ក្នុងព្រឹត្តិការណ៍រត់ជាន់គ្នាលើស្ពានកោះពេជ្រ ដោយមានអ្នកចូលរួមជាង៥០០នាក់ និងព្រះសង្ឃជិត១០០អង្គផង។ លោកបានបញ្ជាក់ថែមដូច្នេះថា ពិធីគោរពវិញ្ញាណក្ខន្ធ នឹងប្រព្រឹត្តទៅតាមបែបសាសនា ដោយមិនមែនដើម្បីផលប្រយោជន៍នយោបាយណាមួយឡើយ។
ពិធីគោរពវិញ្ញាណក្ខន្ធអ្នកស្លាប់ក្នុងព្រឹត្តិការណ៍ផ្អើលជាន់គ្នានៅលើស្ពានពេជ្រ កាលពីឆ្នាំ២០១០ ត្រូវបានគណបក្សសង្គ្រោះជាតិប្រារព្ធធ្វើដែរ កាលពីរសៀលថ្ងៃព្រហស្បតិ៍ ទី២១វិច្ឆិកាដោយមានអ្នកចូលរួមប្រមាណ២០០នាក់។ លោកសម រង្ស៊ី ប្រធានគណបក្សសង្គ្រោះជាតិ ថ្វីត្បិតតែមិនបានចូលរួមក្នុងពិធីគោរពវិញ្ញាណក្ខន្ធនោះ បានថ្លែងតាមទូរស័ព្ទ ទៅក្នុងពិធីជួបជុំថា ព្រឹត្តិការណ៍ផ្អើលជាន់គ្នាស្លាប់លើស្ពានកោះពេជ្រនោះ មិនអាចបំភ្លេចបានទេ ហើយត្រូវចងចាំថា រដ្ឋាភិបាល និងសាលារាជធានីភ្នំពេញ ជាអ្នកទទួលខុសត្រូវ។ លោកបានទាមទារឲ្យមានការស៊ើបអង្កេតរកមូលហេតុនៃឧបទ្ទវហេតុនោះ និងយកអ្នកទទួលខុសត្រូវមកផ្ដន្ទាទោសតាមច្បាប់។
ហេតុការណ៍នៅយប់បង្ហើយនៃពិធីបុណ្យអុំទូក កាលពី៣ឆ្នាំមុន នៅលើស្ពានកោះពេជ្រ បណ្ដាលឲ្យមនុស្សស្លាប់ ៣៥៣នាក់ និងរបួសជាង៥០០នាក់ផ្សេងទៀត។ ជាព្រឹត្តិការណ៍ដែលលោកនាយករដ្ឋមន្ដ្រីហ៊ុន សែន ទទួលស្គាល់ថា ជាចំណុចខ្វះខាតរបស់រដ្ឋាភិបាល និងបានបញ្ជាក់ថា វាជាការទទួលខុសត្រូវរួម និងជាឧបទ្ទវហេតុ។ រាជរដ្ឋាភិបាល កាលណោះ ក៏បានបង្កើតគណៈកម្មការស៊ើបអង្កេតមួយ ហើយរកឃើញថា ការស្លាប់នោះ បណ្ដាលមកពីផ្អើលជាន់គ្នា។
ឧបទ្ទវហេតុនេះ ក៏ត្រូវបានមជ្ឈមណ្ឌលសិទ្ធិមនុស្សកម្ពុជា បើកការស្រាវជ្រាវ ចងក្រងជារបាយការណ៍មួយដែរ។ ប៉ុន្តែរបាយការណ៍នោះ មកដល់ពេលនេះ មិនត្រូវបានបង្ហាញទេ ព្រោះតែជនរងគ្រោះដែលបានផ្ដល់សម្ភាស បានប្ដូរជំហរ លែងនិយាយស្ដី ហាក់ដូចជាព្រមព្រៀងទទួលយកសំណងពីរដ្ឋាភិបាល សម្រាប់ការបាត់បង់សមាជិកគ្រួសារ និងការព្យាបាលជំងឺជាដើម៕
ប្រភពពី វិទ្យុបារាំងអន្តរជាតិ
