ភ្នំពេញ: ​ប្រធាន IRI បាន​ជំរុញ​ឲ្យ​គណបក្ស​ប្រជាជន​កម្ពុជា ដែល​កំពុង​គ្រប់គ្រង​អំណាច នៃ​រាជរដ្ឋាភិបាល នីតិកាល​ទី​៥ នៃ​រដ្ឋសភា បន្ត​ការស្វែងរក​ដំណោះស្រាយ​ចរចា ជាមួយ​មេដឹកនាំ​គណបក្ស​សង្គ្រោះ​ជាតិ ដែលជា​គណបក្សប្រឆាំង ឲ្យ​បាន​ឆាប់​តាមរយៈ​ការស្រុះស្រួល​គ្នា ដើរចូល​តុ​ចរចា​បន្តទៀត ដើម្បី​បន្ត​ដោះស្រាយ​បញ្ហា ដែល​នៅសល់​ជាមួយគ្នា ដោយ​ឈរលើ​គោលការណ៍​ប្រជាធិបតេយ្យ សេរី​ពហុបក្ស និង​ការគោរព​សិទ្ធិមនុស្ស​។​

​កាលពី​ព្រឹក​ថ្ងៃទី​១៤ ខែវិច្ឆិកា​នេះ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ បានទទួល​ជួប​លោក Richard S. Williamson ជា​សមាជិក​ក្រុមប្រឹក្សា​វិទ្យាស្ថាន​សាធារណ រដ្ឋ​អន្តរជាតិ (IRI)​។

​នៅក្នុង​ជំនួប​នោះ លោក Richard S. Williamson បាន​ជំរាប​ប្រា​ប់លោក​ឧបនាយករដ្ឋមន្ត្រី ស ខេង ថា លោក​សង្ឃឹម​ជឿជាក់ថា ការខ្វែងគំនិត​គ្នា​នៅក្នុង​បញ្ហានយោបាយ​នៅ​កម្ពុជា គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ នឹង​អាច​ដោះស្រាយបាន ប្រកបដោយ​ភាពជោគជ័យ នាពេលខាងមុខ​។​

​លោក Richard បាន​បញ្ជាក់ថា បញ្ហាសំខាន់​នៃ​ការចរចា ដែល​អាច​ទទួលបាន​ជោគជ័យ គឺ​គណបក្ស​ទាំងពីរ គួរប្រកាន់​គោលការណ៍​មួយ​ច្បាស់លាស់ ហើយ​ត្រូវ​បោះជំហាន​ទៅមុខ​។

​លោក​បាន​បញ្ជាក់ទៀតថា ចំពោះ​ដំណើរការ​បោះឆ្នោត​នៅ​កម្ពុជា មានការ​វិវឌ្ឍន៍​រីកចំរើន​បានល្អ ពី​ដំណាក់កាល​មួយ ទៅ​ដំណាក់កាល​មួយទៀត ហើយ​កម្ពុជា នឹង​ដោះស្រាយ​រាល់​បញ្ហា ដែល​កើតមានឡើង​បាន​យ៉ាង​ល្អ​។​

​លោក​ឧបនាយករដ្ឋមន្ត្រី ស ខេង មានប្រសាសន៍​ឆ្លើយតប​ថា ទាំង​រាជរដ្ឋាភិបាល ក៏ដូចជា​ថ្នាក់ដឹកនាំ​គណបក្ស​ប្រជាជន ចង់​ឲ្យ​មានការ​ដោះស្រាយ​បញ្ហានយោបាយ​ប្រកប ដោយ​សន្តិវិធី ហើយ​គណបក្ស​ប្រជាជន នឹង​ដោះស្រាយ​បញ្ហា ដែល​នៅ​សេសសល់​នេះ ឲ្យ​អស់ពី​លទ្ធភាព​។​

​លោក​ឧបនាយករដ្ឋមន្ត្រី ក៏បាន​ជម្រាបជូន លោក Richard ថា ចំពោះ​ការបោះឆ្នោត នៅក្នុង​ឆ្នាំ​២០១៣ អាណត្តិ​ទី​៥​នេះ ដំណើរ​ល្អ​ជាង​ពេលមុន​។

​លោក Richard ក៏បាន​កោតសរសើរ ដល់​គណបក្ស​ប្រជាជន​កម្ពុជា ដែលមាន​ភាពចាស់ទុំ​ជាងគេ ក្នុងចំណោម​គណបក្សនយោបាយ​នៅ​កម្ពុជា ដែល​បាន​ដឹកនាំ​ប្រទេស ប្រកបដោយ​ភាព​រីកចំរើន​៕​

ប្រភពពី CEN