ដូច​ប្រិយមិត្ត​ធ្លាប់​បាន​ដឹង​​ហើយ​ថា​ Apple បាន​បញ្ចេញ​រួច​ហើយ​នូវ​ទូរស័ព្ទទំនើប​ iPhone 5S ដែល​បំពាក់​ដោយ​ CPU A7 64-bit បន្តិច​ក្រោយ​មក​ក៏​មាន​សេចក្ដីរាយការណ៍​មួយ​ថាក្រុមហ៊ុន​​ Samsung បាន​អះអាង​ថា​ទូរស័ព្ទទំនើប​ជំនាន់​ថ្មី​របស់ខ្លួន​នឹង​មាន CPU 64-bit ។

សូម​រំលឹក​ដែរថា​ លោក JK Shin ដែល​ជា​នាយកប្រតិបត្តិ (CEO) របស់​ Samsung មិន​បាន​បញ្ជាក់ថា​ Samsung នឹង​បំពាក់ CPU 64-bit ទៅ​លើ​ទូរស័ព្ទទំនើប​ខ្សែស្រលាយមួយ​ណា​នោះ​ទេ ប៉ុន្តែ​គេ​រំពឹងថា​ទូរស័ព្ទទំនើប​ដំបូង​របស់​ Samsung ដែល​នឹង​ត្រូវ​បំពាក់ដោយ​ CPU 64-bit នោះ​គឺ ប្រហែល​ជា Galaxy S 5 ហើយ​ CPU នោះ​គឹ​អាច​ជា CPU ​របស់​ក្រុមហ៊ុន ARM គឺ​ CPU ARMv8 64-bit ។ ដោយឡែក​​បើ​យោង​តាម​ប្រភព​ពី​គេហទំព័រ SamMobile បាន​ឲ្យ​ដឹង​ថា​ពេល​នេះ​ក្រុមហ៊ុន​ ARM បាន​បញ្ជាក់​យ៉ាងច្បាស់​ហើយ​ថា​​​ទូរស័ព្ទទំនើប​​របស់​ក្រុមហ៊ុន​ Samsung ដែល​នឹង​បំពាក់ដោយ​ CPU 64-bit របស់​ខ្លួន​នឹង​ត្រូវ​បញ្ចេញ​ក្នុង​ឆ្នាំ២០១៤ ប៉ុន្តែ​ទោះ​ជា​យ៉ាង​ណា​ ARM ក៏​មិន​បាន​បញ្ជាក់​ឲ្យ​ច្បាស់​​ថាទូរស័ព្ទទំនើប​របស់ Samsung មួយ​ណា​ទេ​ដែល​នឹង​ត្រូវ​បំពាក់ដោយ​ CPU 64-bit នោះ ។ ដូច្នេះ​សូម​ប្រិយមិត្ត​រង់ចាំ​តាម​ដាន​ទាំង​អស់​គ្នា​ថា​តើ​ទូរស័ព្ទទំនើប Galaxy S5 ឬ Galaxy Note 4 ដែល​នឹង​ត្រូវ​បាន​បំពាក់​ដោយ​ CPU 64-bit ឬ​ក៏​នឹង​ត្រូវ​បំពាក់ទាំង​ពីរ ។

ប្រភព​ពី​ ARM បាន​បន្ថែម​ទៀត​ដែរ​ថា​​ក្រុមហ៊ុន​របស់​ខ្លួន​នឹង​បញ្ចេញ​​ CPU 128-bit ក្នុង​រយៈពេល​ពីរ​ឆ្នាំ​ក្រោយ​មក​ទៀត​ ។ សូម​បញ្ជាក់ថា​ ARM ឬ ARM Holdings គឺ​ជា​ក្រុមហ៊ុន​អេឡិចត្រូនិក​​ដ៏​ល្បី​របស់ចក្រភពអង់គ្លេស​ដែល​ផលិត​ CPU និង chip ឧបករណ៍​អេឡិចត្រូនិច​ផ្សេងៗ​ ។ សម្រាប់​ព័ត៌មាន​បន្ថែម​ទាក់ទង​នឹង​លក្ខណសម្បត្តិបច្ចេកទេស​​នៃ​ទូរស័ព្ទទំនើប​ជំនាន់​ថ្មី​​របស់​ក្រុមហ៊ុន​ Samsung សូម​ប្រិយមិត្ត​រង់ចាំ​តាមដាន​ជា​មួយ​ពពក ៕

ដោយសាតែ​រូបរាង​ពិត​ប្រាកដ​របស់​ទូរស័ព្ទទំនើប Galaxy S5 មិន​ទាន់​ត្រូវ​បាន​បញ្ចេញ​នៅ​ឡើយ​នោះ​ យើង​ខ្ញុំ​សូម​បង្ហាញ​ជូន​ប្រិយមិត្ត​នូវ​រូបភាព​គំរូ (concepts) មួយ​ចំនួន​របស់​ Galaxy S5 ដែល​មាន​ដូច​ខាងក្រោម៖

តើ​ប្រិយមិត្ត​ពេញ​ចិត្ត​និង​ចង់​ឲ្យ​ Galaxy S5 មាន​រូបរាង​ដូច​គំរូ​មួយណា ? សូម​បញ្ចេញ​មតិ​ក្នុង​ប្រអប់​ខាង​ក្រោម៖