ធនាគារអេស៊ីលីដា សម្ពោធដាក់ឲ្យប្រើប្រាស់ ប័ណ្ណឥណទានវីសា
ភ្នំពេញៈ ធនាគារអេស៊ីលីដា ដែលជាធនាគារពាណិជ្ជនាំមុខគេនៅកម្ពុជា បានប្រកាស និងដាក់ឲ្យដំណើរការប្រើប្រាស់ជាផ្លូវការនូវផលិតផលថ្មីមួយទៀត គឺ «ប័ណ្ណឥណទានវីសាអេស៊ីលីដា» នៅល្ងាចថ្ងៃសុក្រនេះ ដើម្បីផ្តល់ភាពងាយស្រួល ក្នុងការទូទាត់ដោយចាប់តាំងពីការបញ្ជារទិញទំនិញ-សេវាកម្មប្រចាំថ្ងៃ រហូតឈានដល់ការទូទាត់តាមប្រព័ន្ធអ៊ីនធឺណែត។
ប័ណ្ណឥណទានវីសាអេស៊ីលីដា ដែលត្រូវបានទទួលស្គាល់ជាបទដ្ឋានទិន្នន័យសុវត្ថិភាព នៃឧស្សាហកម្មប័ណ្ណទូទាត់ (PCI DSS) នឹងមានលក្ខណៈប្រកបដោយសុវត្ថិភាព ងាយស្រួលក្នុងការធ្វើប្រតិបត្តិការទូទាំងសាកលលោក និងអាចធ្វើប្រតិបត្តិការធនាគារបានតាមកម្រិតបន្ទាត់ឥណទានដែលមានស្រាប់ ឬបានអនុម័តដោយធនាគារ អេស៊ីលីដា។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានមានប្រសាសន៍ថា «ប័ណ្ណឥណទានវីសាអេស៊ីលីដា គឺជាជម្រើសមួយដ៏អស្ចារ្យ សម្រាប់ការបង្កើនសុវត្ថិភាពប្រតិបត្តិការហិរញ្ញវត្ថុជាសកល និងផ្តល់ភាពងាយស្រួលជូនដល់អតិថិជន។ ការប្រើប្រាស់ ប័ណ្ណឥណទានវីសាអេស៊ីលីដា អតិថិជនអាចធ្វើប្រតិបត្តិការបានកាន់តែងាយស្រួល ដោយមិនចាំបាច់កាន់សាច់ប្រាក់សុទ្ធ នៅពេលដែលពួកគាត់ធ្វើដំណើរទេសចរណ៍ទាំងនៅក្នុងប្រទេស និងសកលលោក។
អ្នកស្រី Lorijon Bacchi នាយិកាគ្រប់គ្រងវីសាប្រចាំឥណ្ឌូចិន បានមានប្រសាសន៍ដែរថា «ប័ណ្ណឥណទានវីសាជាប័ណ្ណមួយអាចជួយលោកអ្នកក្នុងការទិញទំនិញ និងសេវាកម្ម បាននាពេលឥឡូវនេះ ហើយនិងធ្វើការទូទាត់វិញនៅពេលក្រោយ»។
អ្នកស្រីបន្តថា ប័ណ្ណឥណទានវីសានេះអាចប្រើប្រាស់បានជាមួយម៉ាស៊ីន ឆូតកាតចំនួន ១០លានគ្រឿង នៅតាមបណ្តាហាងលក់ទំនិញ-សេវាកម្មនៅជុំវិញពិភពលោក ហើយប័ណ្ណឥណទានវីសានេះ ធានាបាននូវសុវត្ថិភាពល្អប្រសើរ ជាងការកាន់សាច់ប្រាក់សុទ្ធ គឺមានន័យថា ប័ណ្ណឥណទានវីសាដែលបានបាត់ហើយ គឺយើងអាចជំនួសថ្មីវិញបាន ប៉ុន្តែបើសាច់ប្រាក់បានបាត់ ឬត្រូវបានគេលួចនោះ គឺបាត់រហូត។
យោងតាមសេចក្តីប្រកាសព័ត៌មានរបស់ធនាគារអេស៊ីលីដា ប័ណ្ណឥណទានវីសាអេស៊ីលីដានេះ អាចប្រតិបត្តិការតាមរយៈម៉ាស៊ីនអេធីអឹម (ATM) ម៉ាស៊ីនឆូតកាត (POS) ឬប្រព័ន្ធអ៊ីធឺណែត (E-commerce)។ អ្នកប្រើប្រាស់ អាចដកសាច់ប្រាក់បានដោយឆាប់រហ័ស និងធ្វើការទូទាត់ថ្លៃទំនិញ សេវាកម្មផ្សេងៗ បានគ្រប់ពេលវេលា គ្រប់ទីកន្លែងដែលមានស្លាកសញ្ញាវីសា Visa ឬ Visa Plus នៅក្នុងប្រទេសកម្ពុជា និងជុំវិញសកលលោក។
ប្រភពពី ភ្នំពេញប៉ុស្តិ៍
