ព្រះឆាយាលក្ខណ៍ព្រះមហាក្សត្រលែងឋិតនៅក្នុងកែវភ្នែករបស់មន្ត្រីគណបក្សនយោបាយកាន់អំណាចហើយ
មាត្រា៤នៃរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា បានចែងថា “បាវចនានៃព្រះរាជាណាចក្រកម្ពុជា គឺ ៖ ជាតិ សាសនា ព្រះមហាក្សត្រ ។ “ និងមាត្រា៥នៃរដ្ឋធម្មនុញ្ញដដែលបានចែងថា “ភាសា និងអក្សរដែលប្រើជាផ្លូវការ គឺ ភាសា និងអក្សរខ្មែរ ។” ព្រមទាំងមាត្រា២៣នៃរដ្ឋធម្មនុញ្ញដដែលបានចែងដែរថា “ព្រះមហាក្សត្រទ្រង់ជាមេបញ្ជាការកំពូលនៃកងយោធពលខេមភូមិន្ទ ។
កម្លាំងគ្រប់ជាន់ថ្នាក់នៃកងរាជអាវុធហត្ថ គឺឋិតនៅក្នុងក្របខ័ណ្ឌនៃកងយោធពលខេមរភូមិន្ទ ដែលមានព្រះមហាក្សត្រជាមេបញ្ជាការកំពូល ។
ព័ស្តុតាងជាក់ស្តែងមួយក្នុងចំណោមព័ស្តុតាងជាច្រើនទៀត បានបង្ហាញថា ការិយាល័យធ្វើការនៃមន្ទីរព័ត៌មាននិងសន្តិសុខកងរាជអាវុធហត្ថខេត្តស្ទឹងត្រែង ដែលមានលោកស័ក្តិ៥ អៀង វ៉ាន់ឌី ជាមេបញ្ជាការ មិនបានយកចិត្តទុកដាក់ទៅលើបាវចនានៃព្រះរាជាណាចក្រកម្ពុជា និងអក្សរខ្មែរនោះទេ គឺសរសេរអក្សរ”ព្រះមហាក្សត្រ”ខុសឆ្គងទៅជា”ព្រះមហាក្សត” និងម្យ៉ាងទៀត ក្រោមបាវចនានៃព្រះរាជាណាចក្រកម្ពុជានោះ មិនបានដាក់តាំងព្រះឆាយាលក្ខណ៍ព្រះមហាក្សត្រដែលជាមេបញ្ជាការកំពូលនៃកងយោធពលខេមរភូមិន្ទឡើយ ហើយបែរជាដាក់តាំងរូបថតសម្តេចអគ្គមហាសេនាបតីតេជានាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជាភរិយារបស់នាយករដ្ឋមន្ត្រី បម្រើការងារនៅក្នុងស្ថាប័នមនុស្សធម៌ទៅវិញ ។
ដូច្នេះ មានន័យថា ព្រះឆាយាលក្ខណ៍អង្គព្រះមហាក្សត្រនៃព្រះរាជាណាចក្រកម្ពុជាលែងឋិតនៅក្នុងកែវភ្នែក ឬយកចិត្តទុកដាក់របស់មន្ត្រីគណបក្សនយោបាយកាន់អំណាចទៀតហើយៗបាវចនានៃព្រះរាជាណាចក្រកម្ពុជា ដែលក្នុងរដ្ឋធម្មនុញ្ញចែងថា “ជាតិ សាសនា ព្រះមហាក្សត្រ”នោះ ទំនងជាមន្ត្រីគណបក្សកាន់អំណាចរំលេចសំគាល់ថា “ជាតិ សាសនា នាយករដ្ឋមន្ត្រី និងភរិយានាយករដ្ឋមន្ត្រី” វិញមើលទៅ ៕
ប្រភពពី ដើមត្នោត
Read more: http://www.cambodiapage.info/?p=4742#ixzz2lHTR2K7K
