បណ្ដាញសហគមន៍ព្រៃឡង់បើកយុទ្ធនាការបង្ក្រាបបទល្មើសព្រៃឈើ
បណ្ដាញសហគមន៍ព្រៃឡង់ ប្រមាណ ៥០០នាក់ ចាប់ផ្ដើមបើកយុទ្ធនាការបង្ក្រាប និងទប់ស្កាត់បទល្មើសព្រៃឈើក្នុងរយៈពេល ៥ថ្ងៃ គិតចាប់តាំងពីថ្ងៃទី២៧ វិច្ឆិកា នេះទៅដល់ថ្ងៃទី១ ធ្នូ ឆ្នាំ២០១៣។
លោក សេង សុខហេង អ្នកសម្របសម្រួលបណ្ដាញកសាងសន្តិភាពសហគមន៍ ឲ្យដឹងនៅថ្ងៃទី២៧ វិច្ឆិកា ថា មូលហេតុដែលបណ្ដាញសហគមន៍ព្រៃឡង់ ចាប់ផ្ដើមធ្វើយុទ្ធនាការនៅពេលនេះ គឺការកាប់បំផ្លាញព្រៃឈើក្នុងតំបន់ព្រៃឡង់ បានកក្រើកឡើងវិញយ៉ាងខ្លាំង ដោយអ្នកមានអំណាច និងអ្នកមានប្រាក់មួយចំនួន ឆក់ឱកាសក្នុងពេលនយោបាយជាប់គាំង លួចកាប់ឈើក្នុងព្រៃឡង់ ដើម្បីជួញដូរ។
លោក សេង សុខហេង មានប្រសាសន៍ថា៖ «យើងចេញដំណើរចូលព្រៃថ្ងៃនេះ។ ខ្ញុំក៏ចេញទៅដែរ យើងនាំគ្នាធ្វើដំណើរដោយថ្មើរជើង ខ្លះជិះម៉ូតូ យើងវេចអង្គរដាក់ស្បៀងតាមខ្លួន យប់ត្រង់ណាសម្រាកត្រង់ហ្នឹង។ យើងរកកន្លែងណាសមរម្យដែលមានទឹកដើម្បីសម្រាក។ យើងព្រួយបារម្ភពីសុវត្ថិភាពដែរ តែធ្វើម៉េច? បើយើងមិនការពារព្រៃនេះ កូនចៅយើងជំនាន់ក្រោយមិនមានអីទីពឹងទេ»។
សេចក្ដីប្រកាសព័ត៌មាននៃបណ្ដាញសហគមន៍ព្រៃឡង់ ចុះថ្ងៃទី២៧ វិច្ឆិកា ឲ្យដឹងថា ប្រជាពលរដ្ឋការពារព្រៃឡង់ទាំង ៥០០នាក់នោះ មកពីកំពង់ធំ ព្រះវិហារ ស្ទឹងត្រែង និងខេត្តក្រចេះ ដែលជាខេត្តស្ថិតនៅជុំវិញតំបន់ព្រៃឡង់។
យុទ្ធនាការបង្ក្រាប និងទប់ស្កាត់បទល្មើសព្រៃឈើក្នុងតំបន់ព្រៃឡង់ នេះ ធ្វើឡើងស្របពេលដែលបក្សសង្គ្រោះជាតិ ប្រកាសថា ថ្នាក់ដឹកនាំបក្សរបស់ខ្លួននឹងធ្វើដំណើរទៅពិនិត្យមើលការកាប់បំផ្លាញព្រៃឈើ នៃតំបន់ព្រៃឡង់ ក្នុងខេត្តកំពង់ធំ នៅថ្ងៃទី១២ ធ្នូ ខាងមុខនេះ។
សូមរង់ចាំស្ដាប់ និងអានព័ត៌មានបន្ថែម…
ប្រភពពី វិទ្យុអាស៊ីសេរី
