បក្សសង្គ្រោះជាតិនឹងទាមទារឲ្យបោះឆ្នោតឡើងវិញបើគ្មានការស៊ើបអង្កេតលទ្ធផលឆ្នោត
លោក កឹម សុខា អនុប្រធានគណបក្សសង្គ្រោះជាតិ កាលពីថ្ងៃទី២៦ វិច្ឆិកា មានប្រសាសន៍ថា គណបក្សនឹងទាមទារឲ្យមានការបោះឆ្នោតឡើងវិញ ប្រសិនបើគណបក្សប្រជាជនកម្ពុជា មិនស៊ើបអង្កេតភាពមិនប្រក្រតីនៃការបោះឆ្នោត។
យុទ្ធសាស្ត្រថ្មីរបស់គណបក្សសង្គ្រោះជាតិ ធ្វើឡើងក្រោយពេលគណបក្សនេះ គ្រោងនឹងចាប់ផ្ដើមធ្វើមហាបាតុកម្មជាបន្តទៀតនៅពាក់កណ្ដាលខែធ្នូ៖ «ថ្ងៃទី១០ ធ្នូ នេះ ជាមហាបាតុកម្មមួយដែលយើងនឹងផ្ញើសារនយោបាយទៅរដ្ឋាភិបាល ទៅ គ.ជ.ប ឲ្យបានជ្រាបថា យើងទាមទាររកការពិត ហើយបើមិនរកការពិតឲ្យយើងទេ គឺយើងទាមទារឲ្យបោះឆ្នោតឡើងវិញ អត់មានចាំដល់ដាច់អាណត្តិទេ កែទម្រង់ដើម្បីបោះឆ្នោត។ បើសិនយើងទាមទាររកយុត្តិធម៌មិនបាន យើងទាមទារឲ្យបោះឆ្នោតឡើងវិញ ហើយបើទាមទារឲ្យបោះឆ្នោតឡើងវិញមិនបានទៀត យើងមានយុត្តិសាស្ត្រចុងក្រោយផ្សេងទៀត…»។
ប្រធានក្រុមចរចាតំណាងគណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃ លោក ព្រំ សុខា កាលពីថ្ងៃអង្គារ ទី២៦ ខែវិច្ឆិកា មានប្រសាសន៍ថា គណបក្សប្រជាជនកម្ពុជា នៅតែបន្តបើកទ្វាររង់ចាំគណបក្សសង្គ្រោះជាតិ ដើម្បីកំណត់ថ្ងៃចរចាជាថ្មី រកដំណោះស្រាយនយោបាយបន្តទៀត។ លោក ព្រំ សុខា បន្ថែមទៀតថា ការជួបចរចាជាថ្មីអាចធ្វើឡើងនៅពេលណា ឬទីកន្លែងក៏បានដែរ។
ការប្រកាសរបស់តំណាងគណបក្សប្រជាជនកម្ពុជានេះ ខណៈដែលគណបក្សសង្គ្រោះជាតិ បានប្រកាសធ្វើបាតុកម្មជាថ្មីបន្តទៀត ចាប់ពីថ្ងៃទី១៥ ខែធ្នូ តទៅ ដែលការធ្វើបាតុកម្មនេះ ធ្វើឡើងក្នុងរយៈពេល១សប្ដាហ៍ម្ដង ហើយធ្វើជាបន្តបន្ទាប់។ គណបក្សទាំងពីរបានជួបចរចារកដំណោះស្រាយនយោបាយជាច្រើនពេលមកហើយ ប៉ុន្តែនៅមិនទាន់មានដំណោះស្រាយនយោបាយណាមួយឡើយ៕
