នាយកនិងគ្រូបង្រៀននៅឆ្នុកទ្រូរងការចោទថាមិនខ្វល់ពីការបង្រៀនសិស្ស
ប្រជាពលរដ្ឋ និងអាជ្ញាធរមួយចំនួននៅឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង បានចោទប្រកាន់នាយក និងគ្រូបង្រៀននៅសាលាបឋមសិក្សា ឆ្នុកទ្រូ ថាមិនខ្វល់ខ្វាយនឹងការបង្រៀនសិស្ស។
ក្រៅពីមិនបង្រៀនសិស្ស នាយកសាលាបានប្រើប្រាស់កាណូតចំនួន ២គ្រឿង គឺកាណូតប្រើប្រេងម៉ាស៊ូត ១គ្រឿង និងប្រើសាំង ១គ្រឿង ជាជំនួយរបស់ក្រសួងអប់រំ សម្រាប់ដឹកជញ្ជូនសិស្ស និងគ្រូទៅសាលារៀន ឆ្លៀតយកទៅធ្វើអាជីវកម្មផ្ទាល់ខ្លួន។
កត្តានេះ បណ្ដាលឲ្យកាណូតខូចជាប្រចាំ ហើយសិស្សានុសិស្សជាច្រើននាក់តែងតែខកខានមិនបានទៅរៀនសូត្រ។
អាជ្ញាធរ និងប្រជាពលរដ្ឋរស់នៅភូមិឆ្នុកទ្រូ ឃុំឆ្នុកទ្រូ បានឲ្យដឹងនៅថ្ងៃទី២៤ ខែវិច្ឆិកា ថា ពួកគាត់កំពុងតែព្រួយបារម្ភអំពីអនាគត និងការមិនចេះអក្សររបស់កូនចៅ ដោយសារតែទង្វើខុសឆ្គងរបស់ថ្នាក់ដឹកនាំសាលា និងមានគ្រូបង្រៀនខ្លះបានសរសេរអក្សរនៅលើក្ដារខៀនចោល រួចដើរផឹកស្រាមិនយកចិត្តទុកដាក់នឹងការបង្រៀនសិស្សឡើយ។
ប្រជាពលរដ្ឋរស់នៅភូមិឆ្នុកទ្រូ លោក សូរ ហ៊ឺយ មានប្រសាសន៍ថា បច្ចុប្បន្នលោកមានកូនចំនួន ៤នាក់ រៀននៅសាលាបឋមសិក្សាឆ្នុកទ្រូ ហើយលោកចង់ប្ដូរសាលាឲ្យកូនទៅរៀននៅសាលាផ្សេងវិញ ដោយសារតែគ្រូមិនបានបង្រៀនកូនរបស់គាត់ឲ្យបានជាប់លាប់។ ម្យ៉ាង មានការលំបាកធ្វើដំណើរទៅសាលារៀន៖ «ពិបាកតាំងពីទូកឆ្លងទៅ។ កាលពីកន្លងមក យើងទៅរៀនវាមានទូក ឥឡូវដល់ពេលទូកគេយកធ្វើអាជីវកម្មក្រៅផង យកមកដឹកសិស្សផង ដល់ពេលខូចទៅវាអត់មានទូកចម្លងសិស្សទៅ។ ទើបតែរយៈពេលប្រហែលជា ៤ ទៅ ៥នេះ សិស្សបើអ្នកណារកទូកបានជិះចាំទៅ បើអ្នកណាមិនបានទៅទេ ឲ្យរកទូកជិះខ្លួនឯងទៅ តែគ្រូទេអត់ឲ្យសិស្សទៅទេ»។
សមាជិកក្រុមប្រឹក្សាឃុំឆ្នុកទ្រូ ម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះ បន្ថែមថា ប្រសិនបើមន្ត្រីថ្នាក់លើ ឬសមត្ថកិច្ចពាក់ព័ន្ធនៅតែបណ្ដែតបណ្ដោយឲ្យសកម្មភាពខុសឆ្គងរបស់នាយក និងគ្រូបង្រៀននេះបន្តកើតមានទៀតនោះ បញ្ហាអនក្ខរភាពនៅទូទាំងស្រុកបរិបូរណ៍ មានតែនៅឃុំឆ្នុកទ្រូ ទេដែលប្រឈមខ្លាំងជាងគេ។
ទាក់ទងនឹងបញ្ហានេះ នាយកសាលាបឋមសិក្សា ឆ្នុកទ្រូ លោក យង់ គឹមសេង បានច្រានចោលរាល់ការចោទប្រកាន់ទាំងអស់មកលើរូបលោក និងគ្រូបង្រៀនផ្សេងទៀត ហើយលោកពន្យល់ថា បញ្ហាអាក់ខាន ឬគ្រូបង្រៀនមិនទាន់កម្មវិធីសិក្សារបស់រដ្ឋ ក៏ព្រោះតែសិស្សានុសិស្សអវត្ដមានជាប្រចាំ ដើម្បីទៅជួយការងារនេសាទរបស់ឪពុកម្ដាយ ឬអាណាព្យាបាល គឺមិនបណ្ដាលមកពីកាណូតធ្វើដំណើរ ឬគ្រូបង្រៀននោះទេ៖ «បាទ! ទើបតែខូចប្រហែលជា ១អាទិត្យ (១សប្ដាហ៍) ទេក្មួយ ហើយខ្ញុំកំពុងតែដាក់នៅផ្ទះជាង មិនទាន់អូសចេញពីផ្ទះជាងទេ ព្រោះជាងគេថា ប្រហែលជាម៉ាហើយអស់ ៥០ដុល្លារ ព្រោះគ្រឿងនៅឆ្នុកទ្រូ នេះ អត់មានទេ ទាល់តែនៅភ្នំពេញ។ ហើយខ្ញុំវាអត់មានលុយនៅក្នុងសាលាទេ នេះកំពុងគិតគូររាប់លុយក្នុងទូរខ្លួនឯងណេះ ដើម្បីយកទៅឲ្យជាងយកទៅទិញ ដើម្បីបានដំណើរការ ហើយអាតូចខ្ញុំហ្នឹង ខ្ញុំទៅដឹកគ្រូសព្វថ្ងៃនេះ ប្រសិនបើសិស្សអត់បានដឹកទេ ខ្ញុំឲ្យគេដោះស្រាយរៀងខ្លួន»។
លោកបញ្ជាក់ថា នៅសាលាបឋមសិក្សា ឆ្នុកទ្រូ មានគ្រូបង្រៀនចំនួន ៩នាក់ និងសិស្សានុសិស្សចំនួន ៤០០នាក់ ក៏ប៉ុន្ដែភាគច្រើននៃសិស្សទាំងនោះ មិនបានមករៀនជាប់លាប់នោះទេ។
ទោះជាយ៉ាងណា អភិបាលស្រុកបរិបូរណ៍ លោក ឃួន សៅរុំ មានប្រសាសន៍បញ្ជាក់យ៉ាងខ្លីថា លោកនឹងឲ្យប្រធានការិយាល័យអប់រំស្រុកចុះទៅត្រួតពិនិត្យបញ្ហានេះឡើងវិញ ដោយសារតែកន្លងមកមានពាក្យចចាមអារ៉ាមស្រដៀងគ្នានេះបានកើតឡើង។
យោងតាមរបាយការណ៍របស់សាលាឃុំឆ្នុកទ្រូ ដែលវិទ្យុអាស៊ីសេរី ទទួលបាននៅថ្ងៃទី២៣ ខែវិច្ឆិកា ឆ្នាំ២០១៣ បង្ហាញថា មេឃុំឆ្នុកទ្រូ លោក សំរិទ្ធិ ផេង បានចុះហត្ថលេខា និងបោះត្រានៅរបាយការណ៍មួយ ចុះថ្ងៃទី៧ ខែមិថុនា ឆ្នាំ២០១២ យល់ស្របទៅលើកិច្ចប្រជុំក្រុមប្រឹក្សាឃុំ និងស្នើសុំឲ្យមានការផ្លាស់ប្ដូរនាយកសាលាបឋមសិក្សាឆ្នុកទ្រូ ឈ្មោះ យង់ គឹមសេង ដោយបានលើកឡើងនូវចំណុចខុសឆ្គងរបស់នាយកសាលារូបនោះជាច្រើន ដូចជា ការនាំក្រុមគ្រួសារទៅរស់នៅ និងលក់ដូរនំចំណីផ្ដាច់មុខនៅក្នុងសាលារៀន និងការគ្រប់គ្រងគ្រូបង្រៀនមិនបានត្រឹមត្រូវជាដើម។
ប្រភពព័ត៌មានពីប្រជាពលរដ្ឋ ឲ្យដឹងថា ក្រោយពីមានការស្នើសុំផ្លាស់ប្ដូរនាយកសាលារូបនេះចេញមិនបានសម្រេច ក៏កើតមានការប្ដឹងផ្ដល់គ្នារវាងនាយកសាលា និងជំទប់ទី១ ឃុំឆ្នុកទ្រូ ពីបទបរិហារកេរ្តិ៍ទៅដល់តុលាការទៀតផង៕
ប្រភពពី វិទ្យុអាស៊ីសេរី
