ក្រុមប្រឹក្សារាជធានី អនុម័តជាឯកច្ឆ័ន្ទលើសំណើសុំបំបែកខណ្ឌថ្មី ៥ របស់គណៈអភិបាលរាជធានីភ្នំពេញ
ភ្នំពេញ: នៅក្នុងកិច្ចប្រជុំសាមញ្ញលើកទី៥៤ របស់ខ្លួន ក្រុមប្រឹក្សារាជធានីភ្នំពេញ បានអនុម័តជាឯកច្ឆ័ន្ទ កាលពីព្រឹកថ្ងៃទី២៥ខែវិច្ឆិកាឆ្នាំ២០១៣នេះ លើសំណើរបស់រដ្ឋបាលរាជធានីភ្នំពេញ ក្នុងការសុំបំបែកខណ្ឌថ្មីបន្ថែមចំនួន៥ ក្នុងរាជធានីភ្នំពេញ។ ភូមិសាស្ត្រខណ្ឌ ដែលត្រូវបំបែកជា២ រួមមាន ខណ្ឌមានជ័យ, ខណ្ឌចំការមន, ខណ្ឌទួលគោក, ខណ្ឌប្ញស្សីកែវ, ខណ្ឌពោធិសែនជ័យ, និងខណ្ឌសែនសុខ។ ក្រោយពីការអនុម័តដោយក្រុមប្រឹក្សារាជធានីភ្នំពេញរួច សំណើនេះ នឹងត្រូវដាក់ឆ្លងក្រសួងមហាផ្ទៃ ដើម្បីពិនិត្យសំរេចជាផ្លូវការ។
កិច្ចប្រជុំសាមញ្ញលើកទី៥៤ របស់ក្រុមប្រឹក្សារាជធានីភ្នំពេញ អាណត្តិទី១នេះ បានប្រព្រឹត្តទៅក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកប៉ា សុជាតិវង្ស អភិបាលរាជធានីភ្នំពេញ។
លោក ប៉ា សុជាតិវង្ស បានមានប្រសាសន៍ថា ការបំបែកខណ្ឌថ្មី៥បន្ថែមទៀតនេះ ទី១) គឺយើងចង់រៀបចំដែនដីនេះ ឱ្យស្របតាមការរីកចំរើនរបស់រាជធានីភ្នំពេញ។ ទី២) ទាក់ទងនឹងប្រជាពលរដ្ឋ កាន់តែមានចំនួនច្រើនឡើងៗ ពិសេសនៅតំបន់ជាយក្រុង។ ទី៣) ដើម្បីសម្របទៅតាមសមត្ថភាពមន្ត្រីរបស់យើងដែលមិនទាន់មានលក្ខណៈវិទ្យាសាស្ត្រនៅឡើយ។ ទន្ទឹមនឹងនេះ សង្កាត់មួយចំនួនដែលមានប្រជាពលរដ្ឋច្រើន និងមានផ្ទៃដីធំ អាចនឹងត្រូវបំបែកចេញបន្ថែមទៀតផងដែរ។ ទី៤) ការបំបែកនេះ ដើម្បីឱ្យស្របទៅតាមថវិកា ដោយខណ្ឌខ្លះតូច ក៏ទទួលថវិកាដើម្បីអភិវឌ្ឍន៍មូលដ្ឋានដូចគ្នានឹងខណ្ឌដែលមានទំហំធំដែរ។ តាមស្ថិតិអ្នកនៅក្នុងទីក្រុងភ្នំពេញ មានប្រជាពលរដ្ឋចំនួនមួយលានពីរសែននាក់ ប៉ុន្តែធាតុពិតមិនមែនចំនួនប៉ុណ្ណឹងនោះទេ កម្មករ-កម្មការិនី រាប់សែននាក់ និងអ្នកចំណាកស្រុក មករកស៊ីនៅភ្នំពេញជាច្រើនទៀត មិនស្ថិតក្នុងស្ថិតិនោះទេ។
លោកបានបញ្ជាក់ថា គោលការណ៍បំបែកខណ្ឌថ្មីនេះ គឺធ្វើឡើងក្នុងគោលដៅរដ្ឋបាលសុទ្ធសាធ ហើយក៏មិនមែនជាការកេងចំណេញនយោបាយណាមួយនោះដែរ។ ដោយផ្អែកលើភាពចាំបាច់ខាងលើនេះ ទើបសាលារាជធានីភ្នំពេញ ត្រូវធ្វើការរៀបចំឲ្យមានការបំបែកខណ្ឌថ្មីចំនួន៥ទៀត ដែលធ្វើយ៉ាងណាឲ្យបានមុនការបោះឆ្នោតជ្រើសរើសក្រុមប្រឹក្សាខណ្ឌ ដែលគ្រោងធ្វើឡើងនៅថ្ងៃទី១៨ ខែឧសភា ឆ្នាំ២០១៤ ខាងមុខ។
លោកប៉ា សុជាតិវង្ស អភិបាលរាជធានីភ្នំពេញ បានលើកឡើងពីកត្តាចាំបាច់ជាច្រើនដែលតម្រូវឲ្យសាលារាជធានីភ្នំពេញ ធ្វើការរៀបចំផែនទីរដ្ឋបាលឲ្យបានសមស្របតាមការអភិវឌ្ឍរបស់រាជធានីភ្នំពេញ, ស្របតាមកំណើនប្រជាពលរដ្ឋ និងងាយស្រួលបង្ខិតសេវារដ្ឋបាលឲ្យដល់កៀកនឹងប្រជាពលរដ្ឋនិងកំពុងរកឈ្មោះដាក់ខណ្ឌថ្មី។
គួរកត់សម្គាល់ថា ក្នុងចំណោមខណ្ឌទាំង៩ ដែលមានស្រាប់គឺ មានខណ្ឌពោធិ៍សែនជ័យ ខណ្ឌសែនសុខ ខណ្ឌទួលគោក ខណ្ឌប្ញស្សីកែវ ខណ្ឌដូនពេញ ខណ្ឌ៧មករា ខណ្ឌចំកាមន ខណ្ឌមានជ័យ និងខណ្ឌដង្កោ ក្នុងនោះ មានខណ្ឌ៦ត្រូវបានបំបែកចេញជា៥ខណ្ឌទៀត ហើយនៅពេលដ៏ខ្លីខាងមុខនេះ រាជធានីភ្នំពេញ ត្រូវមានខណ្ឌទាំងអស់ រហូតដល់១៤ខណ្ឌ។ បើតាមគម្រោងដែលរដ្ឋបាលសាលារាជធានីភ្នំពេញ យកមកដាក់ក្នុងកិច្ចប្រជុំក្រុមប្រឹក្សា ដើម្បីធ្វើការអនុម័ត ហើយត្រូវបានក្រុមប្រឹក្សារាជធានី សម្រេចឯកភាពជាស្ថាពរដែរហើយនោះ មានខណ្ឌចំនួន៦ ត្រូវបានបំបែក។
ក្នុងគម្រោងខណ្ឌចំការមន ត្រូវបានបំបែកជា២ គឺ ខណ្ឌចំការមនទី១ និងខណ្ឌចំការមនទី២ ក្នុងនោះខណ្ឌចំការមន១ មានចំនួន៧សង្កាត់ គឺសង្កាត់បឹងកេងកង១ បឹងកេងកង២ បឹងកេងកង៣ អូឡាំពិក ទួលស្វាយព្រៃទី១ ទួលស្វាយព្រៃទី២ និងសង្កាត់ទំនប់ទឹក ដែលក្នុង៧សង្កាត់ មានប្រជាពលរដ្ឋចំនួន១៨.២៨៦គ្រួសារ ស្មើនឹងចំនួន៩៨.០៣៥នាក់។ ខណ្ឌចំការមន២ មានចំនួន៥ សង្កាត់ គឺសង្កាត់ទួលទំពួងទី១ សង្កាត់ទួលទំពួងទី២ សង្កាត់បឹងត្របែក សង្កាត់ទន្លេបាសាក់ និងសង្កាត់ផ្សារដើមថ្កូវ ដែលក្នុង៥សង្កាត់ មានប្រជាពលរដ្ឋចំនួន ១៦.៣៨០គ្រួសារ ស្មើនឹងចំនួ៨៣.៩៦៩នាក់។
ខណ្ឌទួលគោក បំបែកជា២ខណ្ឌដែរគឺ ខណ្ឌទួលគោក១ និងខណ្ឌទួល គោក២ ក្នុងនោះ ខណ្ឌទួលគោក១ មានចំនួន៦សង្កាត់ គឺសង្កាត់ផ្សារដេប៉ូទី១ សង្កាត់ផ្សារដេប៉ូទី២ សង្កាត់ទឹកល្អក់ទី២ សង្កាត់ទឹកល្អក់ទី៣ សង្កាត់ផ្សារដើមគរ និងសង្កាត់បឹងសាឡាង ដែលមានប្រជាពលរដ្ឋចំនួន២០.៣៨៥គ្រួសារ ស្មើ នឹង ១០៥.១៣៥នាក់។ ខណ្ឌទួលគោកទី២ មានចំនួន៤សង្កាត់ គឺសង្កាត់បឹងកក់ទី១ សង្កាត់បឹងកក់ទី២ សង្កាត់ទឹកល្អក់ទី១ និងសង្កាត់ផ្សារដេប៉ូទី៣ ដែលមាន ប្រជាពលរដ្ឋស្នាក់នៅ ១២.៧១១គ្រួសារ ស្មើនឹង ៦៦.០៦៥នាក់។
ចំពោះខណ្ឌមានជ័យ ក៏បំបែកជា២ដែរ គឺខណ្ឌមានជ័យទី១ ខណ្ឌមានជ័យទី២ ក្នុងនោះខណ្ឌមានជ័យទី១ មានចំនួន៨សង្កាត់គឺ សង្កាត់ច្បារអំពៅទី១ សង្កាត់ច្បារអំពៅទី២ សង្កាត់និរោធ សង្កាត់ព្រែកប្រា សង្កាត់វាលស្បូវ សង្កាត់ ព្រែកឯង សង្កាត់ក្បាលកោះ និងសង្កាត់ព្រែកថ្មី មានប្រជាពលរដ្ឋស្នាក់នៅ ២៦.៤៥៥គ្រួសារ ស្មើនឹង ១៣៣.១៦៥នាក់។ ខណ្ឌមានជ័យទី២ មានចំនួន៤ សង្កាត់គឺ សង្កាត់បឹងទំពុន សង្កាត់ស្ទឹងមានជ័យ សង្កាត់ចាក់អង្រែលើ និងសង្កាត់ចាក់អង្រែក្រោម មានប្រជាពលរដ្ឋស្នាក់នៅ ៣៨.៩៧៨គ្រួសារ ស្មើនឹ ង ១៩៤.៦៣៦នាក់។
ខណ្ឌឫស្សីកែវ ត្រូវបានបំបែកជា២ដែរ គឺខណ្ឌឫស្សីកែវ១ និងខណ្ឌឫស្សីកែវ២ ក្នុងនោះខណ្ឌឫស្សីកែវ១ មានចំនួន៦សង្កាត់គឺ សង្កាត់ទួលសង្កែ សង្កាត់ឫស្សីកែវ សង្កាត់គីឡូម៉ែត្រលេខ៦ សង្កាត់ច្រាំងចំរេះទី១ សង្កាត់ច្រាំងចំរេះទី២ និងសង្កាត់ស្វាយប៉ាក មានប្រជាពលរដ្ឋស្នាក់នៅ ២៦.៤៨៨គ្រួសារ ស្មើនឹង ១៣៥.៤៧០នាក់។ ខណ្ឌឫស្សីកែវ២ មានចំនួន៥សង្កាត់គឺ សង្កាត់ជ្រោយចង្វារសង្កាត់ព្រែកលាប សង្កាត់ព្រែកតាសេក សង្កាត់កោះដាច់ និងសង្កាត់បាក់ខែង មានប្រជាពលរដ្ឋស្នាក់នៅ ១២.៤៥២គ្រួសារ ស្មើនឹង ៦១.២១៤នាក់។
ចំណែកខណ្ឌសែនសុខ និងខណ្ឌពោធិសែនជ័យ ក្នុងខណ្ឌទាំង២នេះ បំបែកមួយផ្នែកម្នាក់ បង្កើតឱ្យមានជាខណ្ឌថ្មីមួយទៀត ក្នុងនោះមានខណ្ឌសែនសុខទី១ មានចំនួន៤សង្កាត់គឺ សង្កាត់ទឹកថ្លា សង្កាត់ភ្នំពេញថ្មី សង្កាត់ឃ្មួញ និងសង្កាត់ក្រាំងធ្នង់ មានប្រជាពលរដ្ឋស្នាក់នៅ ២៥.១៤២គ្រួសារ ស្មើនឹង ១២៥.៥៣៦នាក់។ ខណ្ឌពោធិសែនជ័យទី១ មានចំនួន១០សង្កាត់គឺ សង្កាត់ចោមចៅ សង្កាត់ភ្លើងឆេះរទេះ សង្កាត់បឹងធំ សង្កាត់កន្ទោក សង្កាត់កំបូល សង្កាត់ត្រពាំងក្រសាំង សង្កាត់ឱឡោក សង្កាត់ស្នោរ សង្កាត់សំរោងក្រោម និងសង្កាត់កាកាប មានប្រជាពលរដ្ឋស្នាក់នៅចំនួន ៣០.៩៥៥គ្រួសារ ស្មើនឹង១៥៩.៤៥៥នាក់។ ខណ្ឌសែនសុខ២ និងខណ្ឌពោធិសែនជ័យ២ មានចំនួន៥សង្កាត់គឺ សង្កាត់គោករកា សង្កាត់ពន្សាំង សង្កាត់ពញាពន់ សង្កាត់សំរោង និងសង្កាត់ព្រែកព្នៅ មានប្រជាពលរដ្ឋស្នាក់នៅចំនួន ៩.៦១៤គ្រួសារ ស្មើនឹង ៤៧.៣១៣នាក់។
ពាក់ព័ន្ធនឹងខណ្ឌ៥នេះ ត្រូវដាក់ឈ្មោះជាខណ្ឌដែលមានឈ្មោះអ្វីនោះ មិនទាន់ត្រូវបានដាក់នូវឡើយទេ រង់ចាំការសំរេចពីក្រសួងមហាផ្ទៃជាមុនសិន។ តែតាមប្រភពក្រៅផ្លូវការខ្លះថា ខណ្ឌថ្មីនោះ មានខណ្ឌច្បារអំពៅ ខណ្ឌជ្រោយចង្វារ ខណ្ឌទន្លេបាសាក់ ខណ្ឌចោមចៅ ឬពោធិចិនតុង និងខណ្ឌបឹងសាឡាង។ ក្រៅពីការបំបែកខណ្ឌថ្មីទាំង៥នេះដែរ លេចឮថា មានមន្ត្រីមួយចំនួន កំពុងរត់ការធ្វើចៅហ្វាយខណ្ឌ និងចៅហ្វាយរងខណ្ឌ ឆ្វេកឆ្វាច ខ្លះថាអ្នកនេះត្រូវធ្វើជាអភិបាលខណ្ឌ និងអ្នកនោះត្រូវធ្វើជាអភិបាលខណ្ឌ រួមមានទាំងមន្ត្រីអេឡេកូនិងមន្ត្រីប៊ូអ៊ីង សុទ្ធតែជាកូននិងក្មួយអ្នកធំ។
បើស្តាប់មិនច្រឡំទេ កាលពីថ្ងៃប្រកាសលោក ព្រុំ សំខាន់ ជាអភិបាលខណ្ឌចំកាមននោះ លោកប៉ា សុជាតិវង្ស អភិបាលរាជធានីភ្នំពេញ បានអះអាងថា លោកនឹងខិតខំតស៊ូដាក់មន្ត្រី នៅក្នុងខណ្ឌ និងក្នុងរាជធានីភ្នំពេញ ដែលមានស្រាប់ មិនចង់បានមន្ត្រីដែលធ្លាក់ពីលើមេឃមកធ្វើជាអភិបាលខណ្ឌ ដោយមិនបានឆ្លងកាត់ជាអភិបាលរងខណ្ឌ គឺជាមន្ត្រីអេឡេកូនោះទេ៕
ប្រភពពី CEN
