រញ្ជួយដីផ្ទុះចេញទឹកក្ដៅដូចទឹកពុះនៅខេត្តបន្ទាយមានជ័យ
មានរឿងចម្លែកមួយកើតឡើងនៅឯខេត្តបន្ទាយមានជ័យ ដោយប្រជាពលរដ្ឋជាច្រើននាំគ្នាផ្អើលឆោឡោចំពោះបាតុភូតដ៏ចម្លែកមួយគឺការរញ្ជួយពើងដីនឹងផ្ទុះចេញជាទឹក ពុះនៅក្នុងវាលស្រែមួយកន្លែង។បាតុភូតនេះបានកើតមានឡើងរយៈពេលជាង១ខែមកហើយៗអាជ្ញាធរមូលដ្ឋានបានហាម ប្រជាពលរដ្ឋមិនអោយទៅក្បែរទីតាំងកើតហេតុនោះឡើយ។ការភ្ញាក់ផ្អើលនេះ បានកើតឡើងកាលពីពាក់កណ្ដាលខែតុលា នៅចំនុចដីស្រែមួយកន្លែងស្ថិតនៅចម្ងាយប្រមាណ១៥ម៉ែត្រពីភ្នំតាដុង ភូមិ ព្រេចកី ឃុំតាភូរ ស្រុកស្វាយចេក ខេត្តបន្ទាយមានជ័យ។
ស្ត្រីអ្នកភូមិជាម្ចាស់ស្រែកន្លែងកើតហេតុ ឈ្មោះ កៀត ផល បានឲ្យដឹងថា ដំបូងគាត់ឃើញដីស្រែនៅទីតាំងនោះមានសភាពប៉ោងខ្ពស់ម្តងបន្តិចៗរួចវាក៏ រញ្ជួយផ្ទុះចេញទឹកហើយទឹកនោះក្តៅដូចទឹកដាំពុះអញ្ចឹង។ស្រ្តីរូបនេះបន្តថា ដំបូងឡើយគាត់មិនបានរាយការណ៍ជូនអាជ្ញាធរទេ ប៉ុន្តែក្រោយមកទីតាំងនោះ កាន់តែក្តៅទៅៗទើបនាងសម្រេចចិត្តប្រាប់អាជ្ញាធរភូមិឃុំ។
ប្រធានក្រុមប្រឹក្សាឃុំតាភូរ លោក មាន ឆីញ បានបញ្ជាក់ថា លោកមិនដឹងថាហេតុការណ៍នោះកើតឡើងដោយសារបាតុភូតអ្វីអោយពិតប្រាកដ នោះទេគ្រាន់តែដឹងថា ទីតាំងកើតហេតុនោះមានទំហំ៩០ម៉ែត្រគុណនឹង៥០ម៉ែត្រមានសភាពប៉ោងឡើងលើនិងហៀរចេញទឹកដូចបាយពុះហើយមានរយៈពេល ប្រមាណ១ខែហើយ។ ចាប់តាំងពីពេលកើតហេតុរហូតដល់ពេលនេះអាជ្ញាធរភូមិឃុំបាន ជូនដំណឹងដល់ពលរដ្ឋមិនអោយនាំសត្វគោក្របីទៅជិតទីតាំងនោះទេ។ម្យ៉ាងទៀត អាជ្ញាធរឃុំក៏បានរាយការណ៍ពីបាតុភូតចម្លែកនេះជូនទៅថ្នាក់លើរួចហើយដែរតែរហូតមកដល់ថ្ងៃនេះពុំទាន់ឃើញផ្នែកជំនាញណាចុះមកពិនិត្យឬធ្វើការស្រាវជ្រាវនៅឡើយ៕
ប្រភពពី Free Press Magazine ·
