ផ្តល់សិទ្ទិដោយ៖ looking today.com

ភ្នំពេញ ៖ គិតត្រឹមវេលាម៉ោង១១និង ១០នាទីព្រឹកថ្ងៃទី១២ ខែវិច្ឆិកា ឆ្នាំ២០១៣ នេះ ក្រុមកម្មករជាច្រើននាក់ របស់រោងចក្រ អេសអិល មិនទាន់ចុះចាញ់នោះឡើយ ផ្ទុយទៅវិញ មានតែប្រមូលផ្ដុំគ្នាសារជាថ្មី ដើម្បីតតាំងជាមួយក្រុមសមត្ថកិច្ចជាច្រើននាក់ ដែលទប់ស្កាត់នៅទីនោះ ។

សមត្ថកិច្ច៤នាក់ ដែលត្រូវក្រុមកម្មករ ចាប់យកទៅឃុំនៅក្នុងកុដិព្រះសង្ឃ ក្នុងវត្ដ 

ស្ទឹងមានជ័យ ត្រូវបានជួយសង្គ្រោះត្រឡប់ មកវិញ ហើយ ដោយពុំមានរងគ្រោះថ្នាក់ នោះទេ ខណៈដែលអ្នកកាសែតពីរនាក់ ម្នាក់ មកពីទូរទស្សន៍ប៉ុស្ដិ៍លេខ៩ និងម្នាក់ទៀត កាសែតបរទេស មិនទាន់ដឹងអង្គភាពណា បានរងរបួស និងសន្លប់នៅនឹងកន្លែងកើតហេតុ ត្រូវបានដឹកបញ្ជូនទៅកាន់មន្ទីរពេទ្យភ្លាមៗ។

សេចក្ដីរាយការណ៍ពីកន្លែងកើតហេតុ បានឱ្យដឹងថា នៅពេលនេះ ក្រុមកម្មករមិនទាន់ចុះចាញ់នោះ ឡើយ ហើយមានបំណងចង់ដុតរថយន្ដរបស់សមត្ថកិច្ចថែមទៀតផង។

ជាមួយគ្នានេះ បើតាមសេចក្ដីរាយការណ៍ខាងលើ ពេលផ្ទុះអំពើហិង្សារវាងក្រុមសមត្ថកិច្ចនិងក្រុមកម្មករកើតឡើងភ្លាម ស្រាប់តែលេចមុខក្រុមក្មេងៗបងតូចបងធំ នៅម្ដុំវត្ដស្ទឹងមានជ័យ មកតវ៉ានិងគប់ដុំមក លើក្រុមសមត្ថកិច្ច បណ្ដាលឱ្យរងរបួសទៀត ផង ។