កិត្យានុភាពឧកញ៉ាធ្លាក់ចុះខ្លាំងនៅក្នុងសម័យរាជាណាចក្រកម្ពុជាទី២
នៅក្នុងសម័យរាជាណាចក្រកម្ពុជាទី២ ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានផលិតចេញនូវឧកញ៉ា និងឯកឧត្តម-លោកជំទាវយ៉ាងច្រើនគគោក “ខ្លះជាសមាជិករាជរដ្ឋាភិបាល ខ្លះជាទីប្រឹក្សាថ្នាក់ដឹកនាំ ខ្លះជាទីប្រឹក្សារាជរដ្ឋាភិបាល ខ្លះជាទីប្រឹក្សាក្រសួង-ស្ថាប័ន ខ្លះបម្រើការងារនៅក្នុងស្ថាប័នព្រឹទ្ធសភា រដ្ឋសភា ក្រុមប្រឹក្សាធម្មនុញ្ញ តុលាការ គណៈកម្មាធិការរៀបចំការបោះឆ្នោត និងស្ថាប័ន-អាជ្ញាធរផ្សេងៗទៀត ដែលមានឋានៈស្មើចាប់ពីអគ្គនាយកឡើងទៅ” រហូតធ្វើឲ្យងារជាឧកញ៉ា និងងារជាឯកឧត្តមធ្លាក់កក្នុងស្ថានភាពអតិផរណាទៀតផង ។
លោកឧកញ៉ា តាន់ សេងហាក់ “តែងតាំងដោយព្រះរាជក្រឹត្យលេខនស/រកត/១២០៤/០៤៩ ចុះថ្ងៃទី០៤ ខែធ្នូ ឆ្នាំ២០០៤” កាលពីថ្ងៃទី០៨ ខែវិច្ឆិកា ឆ្នាំ២០១៣ ត្រូវបានតុលាការសាលាដំបូងរាជធានីភ្នំពេញផ្តន្ទាទោសដាក់ពន្ធនាគារកំណត់ចំនួន៨ឆ្នាំ ពីបទជួញដូរគ្រឿងញៀន ពោលគឺមានឈ្មោះជាជនជាប់ចោទនៅស្ថាប័នតុលាការ ។
លោកឧកញ៉ា លី សាយឃាង ធ្លាប់ត្រូវបានតុលាការសាលាដំបូងរាជធានីភ្នំពេញចោទប្រកាន់ពីបទក្លែងលិខិតស្នាម គៃបំបាត់សម្បត្តិទ្រព្យ និងប្រាក់ក្រុមហ៊ុនម៉េង ស្រ៊ាង តាំងពីឆ្នាំ២០០១ និងត្រូវបានតុលាការចេញដីកាចាប់ខ្លួនថែមទៀត ពោលគឺមានឈ្មោះជាជនត្រូវចោទ នៅស្ថាប័នតុលាការ ។
លោកឧកញ៉ា ឃី គឹមលន់ “តែងតាំងដោយព្រះរាជក្រឹត្យលេខនស/រកត/១០០៩/១០០៨ ចុះថ្ងៃទី១៩ ខែតុលា ឆ្នាំ២០០៩” និងជាមន្ត្រីកងរាជអាវុធហត្ថលើផ្ទៃប្រទេសផងនោះ ធ្លាប់ត្រូវបានតុលាការសាលាដំបូងរាជធានីភ្នំពេញចោទប្រកាន់ពីបទប្រើប្រាស់អាវុធខុសច្បាប់ “ផ្ទុះអាវុធទៅក្បួនហែឃោសនាគណបក្សសង្គ្រោះជាតិ” និងត្រូវបានតុលាការសម្រេចឃុំខ្លួនដាក់ពន្ធនាគារកាលពីថ្ងៃទី០៩ ខែកក្កដា ឆ្នាំ២០១៣ តែត្រូវបានសាលាឧទ្ធរណ៍សម្រេចឲ្យនៅក្រៅឃុំវិញ ពោលគឺមានឈ្មោះជាជនត្រូវចោទនៅស្ថាប័នតុលាការ ។
លោកស្រីឧកញ៉ា ឈិន សុគន្ធារី “តែងតាំងដោយព្រះរាជក្រឹត្យលេខនស/រកត/០៦១១/៦០៦ ចុះថ្ងៃទី២២ ខែមិថុនា ឆ្នាំ២០១១” និងជាអតីតទីប្រឹក្សាអគ្គលេខាធិការដ្ឋានព្រឹទ្ធសភានីតិកាលទី២ មានឋានៈស្មើរដ្ឋលេខាធិការ ធ្លាប់ត្រូវបានតុលាការសាលាដំបូងរាជធានីភ្នំពេញផ្តន្ទាទោសដាក់ពន្ធនាគារកំណត់ចំនួន៤ឆ្នាំ០៦ខែ ពីបទប៉ះពាល់ទៅលើកម្មសិទ្ធិទ្រព្យសម្បត្តិសាធារណៈ ដោយសាលក្រមព្រហ្មទណ្ឌលេខ៨៧”ខ” ចុះថ្ងៃទី២០ ខែធ្នូ ឆ្នាំ២០១២ និងក៏ត្រូវបានតុលាការចេញដីកាបង្គាប់ឲ្យចាប់ខ្លួនផងដែរ តាមដីកាលេខ៦០៣ត.ព្រ ចុះថ្ងៃទី២០ ខែធ្នូ ឆ្នាំ២០១២ ក្រោមទម្ងន់នៃបណ្តឹងរបស់ឯកឧត្តម កែប ជុតិមា អតីតទីប្រឹក្សាផ្ទាល់នាយករដ្ឋមន្ត្រី និងជាអភិបាលនៃគណៈអភិបាលរាជធានីភ្នំពេញ ។ សព្វថ្ងៃលោកស្រីឧកញ៉ា ឈិន សុគន្ធារី ហៅយាយក្រពើ កំពុងពួនសំងំលាក់ខ្លួន ដើម្បីគេចពីការចាប់ខ្លួនដោយអាជ្ញាធរកម្ពុជា ពោលគឺមានឈ្មោះជាជនជាប់ចោទនៅស្ថាប័នតុលាការ ។
លោកឧកញ៉ា ម៉ី រដ្ឋា អតីតជាទីប្រឹក្សាសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានីតិកាលទី២ មានឋានៈស្មើអនុរដ្ឋលេខាធិការ “តែងតាំងដោយព្រះរាជក្រឹត្យលេខនស/រកត/០១១០/០៧៣ ចុះថ្ងៃទី២៦ ខែមករា ឆ្នាំ២០១០” ត្រូវបានតុលាការសាលាឧទ្ធរណ៍ចេញដីកាបង្គាប់ឲ្យចាប់ខ្លួនពីបទរំលោភលើទំនុកចិត្ត តាមដីកាលេខ៥០ដកឧ/២០១១ ចុះថ្ងៃទី២៤ ខែតុលា ឆ្នាំ២០១១ និងធ្លាប់ត្រូវបានតុលាការសាលាដំបូងរាជធានីភ្នំពេញផ្តន្ទាទោសពីបទរំលោភលើសេចក្តីទុកចិត្តផងដែរ ។ សព្វថ្ងៃលោកឧកញ៉ា ម៉ី រដ្ឋា កំពុងពួនសំងំលាក់ខ្លួនដើម្បីគេចពីការចាប់ខ្លួនដោយអាជ្ញាធរកម្ពុជា ពោលគឺមានឈ្មោះជាជនជាប់ចោទនៅស្ថាប័នតុលាការ ។
នៅមានឈ្មោះជាឧកញ៉ាជាច្រើនទៀតដែលមានរឿងរ៉ាវនៅស្ថាប័នតុលាការ មានរឿងរ៉ាវរំលោភបំពានយកដីធ្លីប្រជាពលរដ្ឋ “តួយ៉ាងលោកឧកញ៉ា ជៀម ផែន ថៅកែស្រាបៀរលីអូ ជាដើម” មានរឿងបាញ់បោះសេរី…។ល។
ក្នុងរាជសារចុះថ្ងៃទី២៧ ខែមេសា ឆ្នាំ២០១៣ របស់សម្តេចឪ សម្តេចតា អតីតព្រះមហាក្សត្រនៃព្រះរាជាណាចក្រកម្ពុជា កាលព្រះអង្គនៅមានព្រះជន្មទ្រង់បានព្រះតម្រិះថា “នៅក្នុងសម័យសង្គមរាស្ត្រនិយមគ្មានមហាសេដ្ឋីរាប់មិនអស់ដូចសព្វថ្ងៃនេះទេ … ។ នៅក្នុងសម័យសង្គមរាស្ត្រនិយមមានមហាសេដ្ឋីតែមួយគត់ គឺលោក តាន់ ប៉ា ដែលគាត់មានមហាសម្បត្តិតាំងតែពីសម័យបារាំងត្រួតត្រាកម្ពុជា ។ ក្រៅពីលោកឧកញ៉ា តាន់ ប៉ា មានឧកញ៉ាចំនួនតិចជាង១០នាក់ គឺលោក ស ហី, លោក អុងប៉ាង ខោល និងលោក២ឬ៣នាក់ទៀតដែលខ្ញុំមិនចាំឈ្មោះ ។ ឥឡូវនេះវិញមានឧកញ៉ាមហាសេដ្ឋីរាប់មិនអស់ទេដែលអាចជួយរាជរដ្ឋាភិបាលបាន ។ “
មន្ត្រីចាស់ៗដែលស្និទ្ធនឹងព្រះបរមរាជវាំង ធ្លាប់បានមានប្រសាសន៍ថា កាលពីសម័យមុនអ្នកដែលមានងារជាឧកញ៉ាដែលប្រទានតែងតាំងដោយព្រះមហាក្សត្រ គឺមានវិន័យ មានរបៀបរបប និងមានកិត្តិយសណាស់ ដោយសារអ្នកទទួលបានងារជាឧកញ៉ាគឺជាអ្នកមានគុណសម្បត្តិចំពោះជាតិ មិនមែនពឹងផ្អែកលើលុយនោះទេ ហើយរយៈពេលមួយឆ្នាំត្រូវចូលគាល់ព្រះមហាក្សត្រចំនួន២ដង ដើម្បីទូលថ្វាយអំពីអំពើរបស់ខ្លួន ។
ផ្ទុយទៅវិញ តាមការកត់សម្គាល់របស់មជ្ឈដ្ឋានជាច្រើននាសម័យរាជាណាចក្រកម្ពុជាទី២នេះ គឺបង្ហាញថា កិត្យានុភាពឧកញ៉ាបានធ្លាក់ដាំក្បាលចុះយ៉ាងខ្លាំង ដោយសារគ្មានប្រព័ន្ធអ្វីច្បាស់លាស់សម្រាប់គ្រប់គ្រង ត្រួតពិនិត្យ ឬវាយតម្លៃឧកញ៉ាក្រៅតែពីលុយ ទើបលេចមានអំពើផ្តេសផ្តាសជាច្រើនចេញពីស្រទាប់ឧកញ៉ា ។ ទន្ទឹមនឹងនេះ ក៏មានឧកញ៉ាមួយចំនួនបានទទួលរងគ្រោះដោយសារសង្គមមិនអនុវត្តន៍ច្បាប់ជាមូលដ្ឋាននេះដែរ ៕
ប្រភពពី DTN7
