សង្គមស៊ីវិល និងអ្នកកាសែត ជួបជុំគ្នានៅមុខស្តាតអូឡាំពិក ដើម្បីរកយុត្តិធម៌ដល់អ្នកកាសែត ដែលបានសម្លាប់
ភ្នំពេញ: ក្រុមអង្គការសង្គមស៊ីវិល និងក្រុមអ្នកសារព័ត៌មានជាតិ និងអន្តរជាតិ នឹងធ្វើការជួបជុំគ្នានៅពហុកីឡាដ្ឋានអូឡាំពិក នៅល្ងាចថ្ងៃទី២១ ខែវិច្ឆិកានេះ ដើម្បីស្វែងរកយុត្តិធម៌ដល់អ្នកសារព័ត៌មាន ចំនួន ១១ នាក់ ដែលត្រូវបានសម្លាប់ កាលពី ២០ ឆ្នាំមុន ហើយឃាតកមិនត្រូវបានចាប់ខ្លួនយកមកផ្តន្ទាទោសនៅឡើយ។
ពិធីនេះ ធ្វើទ្បើងពីរថ្ងៃមុន ដែលសហគមន៍អន្តរជាតិនឹងប្រារព្ធទិវាអន្តរជាតិលើកទី៣ ដើម្បីបញ្ចប់និទណ្ឌ នៅថ្ងៃទី២៣ ខែវិច្ឆិកា ឆ្នាំ២០១៣ ខាងមុខនេះ។
ជាមួយគ្នានោះ អង្គការសង្គមស៊ីវិល ក៏បានអំពាវនាវឲ្យអ្នកសារព័ត៌មានជាតិ-អន្តរជាតិ ចូលរួមការជួបជុំនេះក្នុងសាមគ្គីភាព ដើម្បីប្រារព្ធពិធីនៅកន្លែង ដែលឃាតករបានបាញ់សម្លាប់លោក ឃឹម សំបូរ អ្នកកាសែតមនសិការខ្មែរ ដែលជាកាសែតគាំទ្រគណបក្សប្រឆាំង រួមទាំកូនប្រុស នៅមុនការបោះឆ្នោតឆ្នាំ២០០៨ និងសុំឲ្យរាជរដ្ឋាភិបាលជួយផ្តល់យុត្តិធម៌ជូនជនរងគ្រោះ។
សេចក្តីប្រកាសព័ត៌មានរបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ(CCIM) អង្គការលីកាដូ មជ្ឈមណ្ឌលអប់រំច្បាប់សម្រាប់សហគមន៍(CLEC) និងមជ្ឈមណ្ឌលសិទ្ធិមនុស្សកម្ពុជា(CCHR) ចុះថ្ងៃទី២១ ខែវិច្ឆិកា បានឲ្យដឹងថា និរទណ្ឌភាពនៅកម្ពុជា នៅតែជាឧបសគ្គដ៏ធំមួយ ក្នុងការពង្រឹងនីតិរដ្ឋ និងឲ្យពលរដ្ឋកម្ពុជា ទទួលបានយុត្តិធម៌៕
ប្រភពពី CEN
