សំណុំរឿងក្រុម Hacker Anonymous ដ៏ល្បីល្បាញត្រូវបាន បញ្ជូនទៅតុលាការ
បើតាមប្រភពពត៌មានរបស់ theguardian និង BBC បានឲ្យដឹងថាសហរដ្ឋអាមេរិក បានបញ្ជូនសំណុំរឿងក្តីរបស់ក្រុម Hacker ដ៏ល្បីល្បាញគឺក្រុម Anonymous ឡើងទៅតុលាការនៃរដ្ឋ Virginia ហើយកាលពីថ្ងៃព្រហស្បតិ៍ថ្មីៗនេះ។ យោងទៅតាមប្រភពខាងលើដដែលនេះ សហរដ្ឋអាមេរិកបានចោទប្រកាន់ និងដាក់ពាក្យបណ្តឹងទៅលើក្រុមនោះ ពីបទបំផ្លាញប្រព័ន្ធសុវត្ថិភាពកុំព្យូទ័រ ការលួចឯកសារសំងាត់ពីរដ្ឋាភិបាល និងការវាយប្រហាររដ្ឋាភិបាល នៅលើប្រព័ន្ធអេឡិចត្រូនិចឬអ៊ីនធើណែត។
តាមសេចក្តីលំអិតបានបញ្ជាក់ផងដែរថា ជនសង្ស័យទាំង 13 នាក់ដែលជាសមាជិករបស់ក្រុម Anonymous ហើយត្រូវបានរដ្ឋាភិបាលសហរដ្ឋអាមេរិកចោទប្រកាន់នោះ រស់នៅក្នុងរដ្ឋផ្សេងគ្នាទាំងអស់នៅលើទឹកដីសហរដ្ឋអាមេរិក។ ហើយជនសង្ស័យទាំង 13 រូបនោះមានអាយុចាប់ពី 21 ឆ្នាំរហូតដល់ 65 ឆ្នាំ។
សូមរំលឹកផងដែរថាក្រុម Anonymous នេះមានវត្តមានជាយូរណាស់មកហើយ តាំងពីឆ្នាំ 2003 មកម៉្លេះ។ ហើយក្រុមនេះបានបង្កើតភាពចលាចល ដែលធ្វើឲ្យរដ្ឋាភិបាលសហរដ្ឋអាមេរិកឈឺក្បាលមិនតិចទេ។
ប្រភពព៌តមាន៖ BBC
