ទំនប់អាងទឹកបឹងកំពីងពួយ ត្រូវបានបាក់ប្រវែង ១០០ម៉ែត្រដោយសារទឹកជំនន់
ទំនប់អាងទឹកប្រវត្តិសាស្ត្រធំមួយនៅកម្ពុជា ឈ្មោះអាងទឹកបឹងកំពីងពួយ ត្រូវបានបាក់ធ្លាយទំនប់នៅថ្ងៃទី៩ខែតុលានេះ បង្កឲ្យខូចខាតដំណាំស្រូវរាប់ពាន់ហិកតា ទ្រព្យសម្បត្តិ និងផ្ទះរបស់ប្រជាជនជាច្រើនទៀត។
អាងទឹកបឹងកំពីងពួយនេះ ស្ថិតនៅចន្លោះភ្នំពីរ គឺភ្នំគូ ឬ ភ្នំតាង៉ែន និងភ្នំកំពីងពួយ ដែលស្ថិតនៅក្នុងភូមិតាង៉ែត ឃុំតាគ្រាម ស្រុកបាណន់ មានចម្ងាយប្រហែលជា ៣៥គីឡូម៉ែត្រ នៃភាគខាងលិចទីរួមខេត្តបាត់ដំបង ។
មេឃុំតាគ្រាម លោក អ៊ឹម ប៊ុនយូ ប្រាប់ VOD ថា ទំនប់អាងទឹកបឹងកំពីងពួយ បានបាក់នៅម៉ោងប្រមាណ៤ទៀបភ្លឺ ដោយសារជំនន់ទឹកភ្លៀងកើនឡើង ហើយបានបាក់ធ្លាយ ប្រវែង១០០ម៉ែត្រ ចាប់ពីសំណង់ទី២ រហូតដល់ជើងភ្នំ ស្ថិតនៅភូមិអន្លង់ស្វាយ។ លោកបន្តថា ការបាក់ធ្លាយទំនប់នេះ មិនធ្វើឲ្យគ្រោះថ្នាក់ដល់ជីវិតមនុស្សទេ ព្រោះបានប្រកាសអាសន្នមុន ប៉ុន្តែបានខូចខាតដំណាំស្រូវ ពី៣៥០០ហិកតាទៅ ៤០០០ហិកតា សាលារៀនមួយចំនួន និងផ្ទះតូប២០ខ្នង ៖ "ហើយជម្លៀសគាត់ទៅតាមទីសុវត្ថិភាព ក៏ប៉ុន្ដែយើងប្រកាស ប្រាប់មុនហើយនៅតែមានបងប្អូនយើង នៅតែធ្វេសប្រហែស ក៏ប៉ុន្ដែយើងបានអន្ដរាគមន៍សង្គ្រោះគាត់មក ពុំមានគ្រោះថ្នាក់អីដល់អាយុជីវិតទេ " ។
អ្នកសម្របសម្រួលសមាគមអាដហុក ប្រចាំខេត្តបាត់ដំបង លោក យ៉ិន ម៉េងលី បានតាមដានបញ្ហានេះ មានប្រសាសន៍ថា ការបាក់ទំនប់អាងទឹកកំពីងពួយនេះ អាចនឹងនាំគ្រោះថ្នាក់ធ្ងន់ធ្ងរដល់អាយុជីវិតប្រជាជន ប្រសិនបើអាជ្ញាធរ មិនមានចំណាត់ការទប់ស្កាត់ ឬការពារបន្ថែម ៖ "នៅពេលកម្រិតទឹកដែលឡើង គឺមន្ត្រីពាក់ព័ន្ធ និងឧតុនិយម លោកត្រូវតែធ្វើការឃ្លាំមើលរហូត ទៅនឹងស្ថានភាពទឹកនេះ ប្រសិនជាទឹកនេះវាឡើងដល់កម្រិតមួយ ដែលយើងអាចបង្ហូរទ្វារទឹកពីរ យើងត្រូវបើកបង្ហូរចោល មិនឲ្យទឹកនេះឡើងដល់ដំណាក់កាលមួយ វាហួសពេលហើយ ទើបយើងបើក គឺមិនអាចទប់បានទេ"។
ឯកសារប្រវត្តិសាស្ត្រ បង្ហាញថា អាងទឹកបឹងកំពីងពួយ មានបណ្តោយប្រវែង ប្រមាន ៧ពាន់ម៉ែត្រ និងទទឹង ១៩០០ម៉ែត្រ។ គម្រោងវិស្វកម្មកំណង់ស៊ីវិលដ៏ធំសម្បើមនេះ មានសារសំខាន់ចំពោះផែនការខ្មែរក្រហម ដើម្បីផ្គត់ផ្គង់ទឹកដល់ទីជនបទស្រែចម្ការជុំវិញខេត្តបាត់ដំបង។ ប្រជាជនប្រមាណមួយម៉ឺននាក់ត្រូវបានស្លាប់ នៅពេលសង់ទំនប់ប្រវត្តិសាស្ត្រនេះ ដោយការទទួលរបបអាហារមិនគ្រប់គ្រាន់ ជំងឺ ការធ្វើការហួសកម្លាំង ឬការធ្វើបាប។
អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា បានប្រាប់VODនៅរសៀលនេះថា ចំនួនអ្នកស្លាប់ដោយសារគ្រោះទឹកជំនន់ អាចលើសពី៨៣នាក់។ លោកបន្តថា ដើម្បីជួយកាត់បន្ថយគ្រោះថ្នាក់នេះ ប្រជាជនគ្រប់រូប គប្បីចេះប្រុងប្រយ័ត្ន និងប្រើប្រាស់ចំណេះដឹងមួយចំនួន ដែលធ្លាប់បានបណ្តុះបណ្តាល ក្នុងការការពារពីគ្រោះទឹកជំនន់ពីពេលមុនៗមក ៖ "អាស្រ័យទៅប្រជាពលរដ្ឋម្នាក់ៗដែរ មិនមែនរដ្ឋាភិបាលម្នាក់ឯងទេ ព្រោះសេចក្តីណែនាំ ការបណ្តុះបណ្តាល ធនធានមនុស្សគឺគ្រប់ទិសទីទៅហើយ"។
លោក ញឹម វណ្ណដា ឲ្យដឹងថា ទឹកជំនន់បានវាយលុករាជធានី-ខេត្ដចំនួន ១៥ ធ្វើឱ្យប៉ះពាល់ដីស្រែ ប្រមាណ១២ម៉ឺនហិកតា ប៉ះពាល់ប្រជាជន៨សែននាក់ ផ្ទះ១២ម៉ឺនខ្នង សាលារៀន ៦៧០កន្លែង វត្ដអារាម៣៧០កន្លែង មណ្ឌលសុខភាព ៤៧កន្លែង ស្មើនឹង៥០ភាគរយ នៃគ្រោះទឹកជំនន់ដែល បណ្ដាលមកពីព្យុះកេតសាណា កាលពីឆ្នាំ២០១១៕
អាងទីកកំពីងពួយ ខេត្តបាត់ដំបង (រូបថតពី CambodiaWatch-Australia blog)
