យកកាំបិតប៉័ងតោគំរាម អាកប្អូនស្រីបង្កើតខ្លួងឯង យកលុយទៅទិញថ្នាំញៀន
ក្រុងប៉ោយប៉ែត ៖ បុរសម្នាក់ជាមនុស្សញៀនថ្នាំ ជាង ៩ ឆ្នាំបានប្រើអំពើហិង្សា និងយកកាំបិតប៉័ងតោ គំរាមអាកប្អូនស្រីបង្កើតខ្លួងឯង តែសំណាងល្អ នាងបានគេចខ្លួន និងស្រែកហៅគេឯងជួយ បង្កឲ្យមានការភ្ញាក់ផ្អើល កាលពីវេលាម៉ោង ៨និង២០ នាទីព្រឹក ថ្ងៃទី៦ ខែតុលា ឆ្នាំ២០១៣ នៅតាមកំណាត់ ផ្លូវជាតិលេខ៥ ក្នុងភូមិ គីឡូម៉ែត្រលេខ៤ សង្កាត់-ក្រុងប៉ោយប៉ែត ខេត្តបន្ទាយមានជ័យ។
បុរសសង្ស័យមានឈ្មោះ មឿង ចំរ៉ុង អាយុ ៣០ឆ្នាំ បានគំរាមកំហែង ប្អូនស្រីបង្កើតយកលុយ ចំនួនពីរដងមកហើយ គឺលើកទី១ នៅថ្ងៃទី០៣ ខែតុលា អស់ប្រាក់ចំនួន ៦.០០០ បាត យកទៅចាយវាយអស់។ លុះព្រឹកថ្ងៃទី០៤ ខែតុលា ឈ្មោះ មឿង ចំរ៉ុង បានគំរាមយកលុយអស់ ៨.០០០ បាតថែមទៀត ទៅទិញថ្នាំញៀនជក់អស់រលីង។
ស្ត្រីរងគ្រោះមានឈ្មោះ មឿន លក្ខិណា អាយុ ២៥ ឆ្នាំ បានរៀបរាប់ទៀតថា រហូតដល់លើកទី៣ គឺនៅព្រឹកថ្ងៃទី០៦ ខែតុលា ជនសង្ស័យបានយកកាំបិត មកគំរាមអារក របស់នាង តែនាងមិនមានលុយឲ្យ ក៏បានរត់គេចខ្លួន ហើយក៏ស្រែកឲ្យអ្នកជិតខាងជួយ និងរាយការណ៍ ទៅសមត្ថកិច្ចមកជួយ អន្តរាយគមន៍ភ្លាមៗ៕
________________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
