អង្គភាពប្រឆាំងអំពើពុករលួយ ព្រមានពីការចាប់ខ្លួន មន្ត្រីពន្ធដារម្នាក់ទៀត ពីបទពុករលួយ
ភ្នំពេញ: លោក ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ នៅថ្ងៃទី៩ ខែតុលា ឆ្នាំ២០១៣នេះ បានប្រាប់ក្រុមអ្នករាយការណ៍ព័ត៌មានថា៖ អង្គភាពប្រឆាំងអំពើពុករលួយ មានភស្តុតាងរឹងមាំនៅក្នុងដៃ ដើម្បីឈានទៅដល់ការចាប់់ខ្លួនមន្ត្រីពន្ធដារម្នាក់ទៀត ពីបទប្រព្រឹត្ត អំពើពុករលួយដើម្បីនាំខ្លួន មកឲ្យស្ថាប័នតុលាការ ផ្តន្ទាទោសទៅតាមច្បាប់ប្រឆាំងអំពើពុករលួយ។ ការចាប់ខ្លួនមន្ត្រីពន្ធដារ ម្នាក់នោះ អាចនឹងធ្វើឡើង នៅពេលឆាប់ៗខាងមុខនេះ។
លោក ឱម យ៉ិនទៀង ក៏បានមានប្រសាសន៍ថា៖នាពេលថ្មីៗនេះ អង្គភាពបានចាប់ខ្លួនមន្ត្រីពន្ធដារម្នាក់ ឈ្មោះនឹម នារៈ បំរើការនៅអគ្គនាយកដ្ឋានពន្ធដារ របស់ក្រសួងសេដ្ឋកិច្ច និងហិរញ្ញវត្ថុ ពីបទប្រព្រឹត្ត អំពើពុករលួយក្នុងការប្រើល្បិចគាបជំរិត ប្រធានក្រុមហ៊ុនមួយ យកលុយច្រើនម៉ឺនដុលា្លរអាមេរិក។ មន្ត្រីពន្ធដាររូបនោះ បន្ទាប់ពីចាប់ខ្លួន ត្រូវបានអង្គភាពប្រឆាំងអំពើពុករលួយ បញ្ជូនទៅកាន់ស្ថាប័នតុលាការរាជធានីភ្នំពេញ ដើម្បីបន្តការស៊ើបអង្កេត និងផ្តន្ទាទោសតាមច្បាប់។
លោក ឱម យ៉ិនទៀង បានបញ្ជាក់ថា៖ នៅថ្ងៃភ្ជុំបិណ្ឌ នាថ្ងៃទី៤ ខែតុលា ឆ្នាំ២០១៣ អង្គភាពប្រឆាំងអំពើពុករលួយ បានចាប់ខ្លួន លោក សួង សុងហេង ក្រឡាបញ្ជីរបស់ព្រះរាជអាជ្ញារងមា្នក់ នៅតុលាការខេត្តបន្ទាយមានជ័យ។ ក្រឡាបញ្ជី សួង សុងហេង រូបនោះ ប្រឈមជាប់ពន្ធនាគារ រយៈពេល៧ឆ្នាំ តាមច្បាប់ប្រឆាំងអំពើពុករលួយ ត្រង់មាត្រា ៣៥ ស្តីពីបទរំលោភអំណាច និងបទព្រហ្មទណ្ឌ មាត្រា៥៩៨ នៅពេលដែលតុលាការរកឃើញភស្តុតាងដាក់បន្ទុកគ្រប់គ្រាន់នោះ ។ ករណីក្រឡាបញ្ជី សួងសុង ហេង កំពុងស្ថិតនៅក្នុងដៃតុលាការនៅឡើយ៕
Read more: http://www.cambodiapage.info/?p=18463#ixzz2hCpzpIVy
