លក់ម៉ាស៊ីនត្រង់សឺន័រ យកលុយទៅស៊ីផឹក និងទិញទូរស័ព្ទ ត្រូវក្រុមចោរប្លន់ចាក់សម្លាប់
ខេត្តរតនគីរី ៖ ក្រុមចោរដាច់យ៉ៃចំនួនពីរនាក់ ជិះម៉ូតូចាស់មួយគ្រឿង បានធ្វើសកម្មភាពប្លន់ ចាក់បុរសពីរនាក់ បណ្តាលឲ្យស្លាប់ម្នាក់ និងម្នាក់ទៀតរងរបួស ហើយបានប្លន់យកម៉ូតូមួយគ្រឿង និងលុយ ៦០ ម៉ឺនរៀល ស្ថិតនៅតាមបណ្តោយផ្លូវ ស្ថិតក្នុងភូមិបី ឃុំត្រពាំងក្រហម ស្រុកកូនមុំ ខេត្តរតនគិរី កាលពីវេលាម៉ោងជាង ៧យប់ ថ្ងៃទី២៥ ខែតុលា ឆ្នាំ២០១៣ ដោយបានរត់គេចខ្លួន ដោយសុវត្ថិភាព។
ជនរងគ្រោះក្នុងអំពើប្លន់នេះមានឈ្មោះ សុខ ស្រី ភេទប្រុស អាយុ ២៩ឆ្នាំ រងរបួសស្រាល បានឲ្យដឹងថា ពួកគេមានគ្នាពីរនាក់ ហើយដៃគូដែលចោរចាក់សម្លាប់មានឈ្មោះ ណែម គោម ភេទប្រុស អាយុ ២៥ឆ្នាំ ជិះម៉ូតូមួយគ្រឿងម៉ាកស្មាស់រីវូ ពណ៌ក្រហមលាយខ្មៅ ធ្វើដំណើរពីផ្ទះ យកម៉ាស៊ីនត្រង់សឺន័រ យកមកលក់បានថវិកា ៦០ម៉ឺនរៀល រួមគ្នាទិញប៊ីយ៉ែមួយកេស រួចនាំគ្នាហូប។
ក្រោយមកជនរងគ្រោះ បានទៅទិញទូរស័ព្ទដៃ មួយគ្រឿងយកទៅប្រើ ហើយក៏បានវិលត្រឡប់មកវិញ ក្នុងបំណងធ្វើដំណើរទៅផ្ទះ ពេលជិះម៉ូតូបកក្រោយបានមួយសន្ទុះ ក៏មានម៉ូតូមួយគ្រឿងជិះគ្នាពីរនាក់ បានហៅជនរងគ្រោះឲ្យបកក្រោយ ក៏ត្រូវក្រុមចោរពីរនាក់នោះ ដកកាំបិតចាក់ជនរងគ្រោះ ឲ្យស្លាប់នៅក្នុងថ្លុកឈាម ឯម្នាក់ទៀតដែលរងរបួសស្រាល ត្រូវគេចាក់ចំពោះខាងឆ្វេង នឹងខ្នងដៃខាងស្តាំ ហើយម៉ូតូជនរងគ្រោះ និងថវិកា ៦០ ម៉ឺនរៀល ត្រូវក្រុមចោរប្លន់យក ដោយសុវត្ថិភាព៕
________________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
