ឌុច សុភា បង្ហាញសញ្ញាណ មិនល្អ ក្រោយវិលចូលសិល្បះជាថ្មី
ភ្នំពេញ: អតីតតារាសម្តែងស្រី ដែលមានរូបសម្រស់ស្រស់ផូផង់នាង ឌុច សុភា ត្រូវបានគេមើលឃើញថា ហាក់នៅមិនទាន់ទទួលបាននូវភាពជោគជ័យខ្លាំងក្លា ដូចមុននៅឡើយទេ បន្ទាប់ពីបង្ហាញវត្តមានសាជាថ្មីនៅក្នុងពិភពសិល្បៈ។
នាង ឌុច សុភា គឺជាអតីតតារាសម្តែងស្រីមួយរូប ក្នុងចំណោមតារាសម្តែងស្រីល្បីៗជាច្រើន ដែលធ្លាប់ទទួលបាននូវការគាំទ្រយ៉ាងខ្លាំងពីសំណាក់ទស្សនិកជន។
តាមរយៈនៃការបង្ហាញសមត្ថភាពដ៏ប៉ិនប្រសព្វ ក្នុងការសម្តែងនៅក្នុងបទចម្រៀង ក៏ដូចជា នៅក្នុងវិស័យសិល្បៈភាពយន្ត បានធ្វើអោយកេរ្តិ៍ឈ្មោះរបស់នាង ឌុច សុភា កាន់តែល្បីល្បាញជាបន្តបន្ទាប់។
ប៉ុន្តែយ៉ាងណាក៏ដោយ ភាពល្បីល្បាញលើវិថីសិល្បៈរបស់នាង ឌុច សុភា ត្រូវបានរសាត់ទៅវិញបន្តិចម្តងៗ រហូតស្ងាត់សូន្យឈឹង ហៅលេងឮតែម្តង បន្ទាប់ពីនាងធ្វើការសម្រេចចិត្តបោះបង់អាជីពសិល្បៈ និងភាពយុវវ័យចូលរោងជ័យ ជាមួយមន្ត្រីប៉ូលីសអ្នកមានទ្រព្យសម្បត្តិស្តុកស្តម្ភម្នាក់។
ជីវិតគ្រួសាររវាងនាង ឌុច សុភា និងមន្ត្រីប៉ូលិសសំបូរទ្រព្យ បានជួបនូវភាពរង្គោះរង្គើរ រហូតឈានដល់ការលេងលះគ្នា ដោយបន្សល់ទុកនូវកូនប្រុសដ៏ស្រស់ស្អាតម្នាក់ សម្រាប់នាង ឌុច សុភា ជាចំណងដៃ។
យ៉ាងណាក៏ដោយបន្ទាប់ពីចែកផ្លូវគ្នា ជាមួយស្វាមី នាង ឌុច សុភា នៅតែបន្តអវត្តមាននៅក្នុងសកម្មភាពសិល្ប:ដដែល។
អ្នកមេម៉ាយកូនមួយ ឌុច សុភា ត្រូវបានទស្សនិកជនចាប់ផ្តើមឃើញមុខជាថ្មី នៅក្នុងអំឡុងដើមឆ្នាំ២០១៣ ជាមួយនឹងការបង្ហាញខ្លួន ជាតារាសម្តែងភាពយន្ត និងចម្រៀងខារ៉ាអូខេ អោយផលិតកម្មធំៗ ក្នុងស្រុក ថតស្ពតពាណិជ្ជកម្ម ព្រមទាំងឈោងកាន់តំណែងជាពិធីការិនីទៀតផង។
ខណៈពេលដែលមានការរំពឹងទុកថា ក្នុងដំណើរវិលចូលប្រឡូកក្នុងពិភពសិល្បៈសាជាថ្មីរបស់អ្នកមេម៉ាយសាច់សខ្ចី ឌុច សុភា ប្រាកដជា ទទួលបាននូវភាពជោគជ័យខ្លាំងជាងមុន មិនខាន តាមរយៈនៃការក្តោបបានតំណែងជាច្រើនក្នុងកម្មវិធីសិល្បៈ ជាពិសេសតំណែងពិធីការិនីនោះ។
ផ្ទុយទៅវិញ ពេលនេះ សកម្មភាពសិល្បៈរបស់នាង ឌុច សុភា ហាក់បង្ហាញនូវសញ្ញាណមិនសូវល្អទាល់តែសោះ ខណៈពេលដែលនាងបណ្តោយអោយរបូតតំណែងពិធីការិនី ប្រចាំកម្មវិធីមួយរបស់ទូរទស្សន៍អប្សរា ចេញពីដៃ ដោយសារតែហេតុផលខ្វះបទពិសោធន៍។ មិនតែប៉ុណ្ណោះ រូបសម្រស់ក៏ជាបញ្ហាចោទខ្លាំងផងដែរ សម្រាប់នាង ឌុច សុភា ក្នុងការអុកឡុកសង្វៀនសិល្បៈជាថ្មី៕
___________________________
ប្រភពពី CEN
