ស្ដ្រីម្នាក់វាយធ្វើបាប លើកូនឈ្នួលអាយុ១៥ឆ្នាំ ជាំពេញខ្លួន
ភ្នំពេញ ៖ ស្ដ្រីជាម្ចាស់ផ្ទះម្នាក់បានប្រើហិង្សាធ្វើទារុណកម្មទៅលើក្មេងប្រុសអាយុ១៥ឆ្នាំដែលជាអ្នកបម្រើជាំពេញខ្លួន រហូតធ្វើឱ្យរូបគេទ្រាំមិនបានរត់ចេញពីផ្ទះ កាលពី ព្រឹកថ្ងៃទី២៥ ខែតុលា ឆ្នាំ២០១៣ ។
ប្រភពព័ត៌មានពីសមត្ថកិច្ចបានឱ្យដឹងថា ស្ដ្រីដែលវាយដំនិងធ្វើទារុណកម្មលើកូនឈ្នួលរបស់ខ្លួនមានឈ្មោះ នុត សុភ័ក្ដ្រ អាយុ៣០ឆ្នាំ មុខរបរលក់ប្រហិតនៅផ្សារគីឡូលេខ៤ ស្នាក់នៅផ្ទះជួលលេខ១១៧ បន្ទប់លេខ១៤ ផ្លូវលេខ១៣៨ ក្រុម៨ ភូមិ២ សង្កាត់ទឹកល្អក់១ ខណ្ឌទួលគោក រីឯក្មេងប្រុសរងគ្រោះឈ្មោះ ឌួង សូរ អាយុ១៥ឆ្នាំ ស្នាក់នៅជាមួយស្ដ្រីខាងលើ ត្រូវជាបងប្អូនជីដូនមួយនឹងគ្នា។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុ បានឱ្យដឹងថា នៅព្រឹកថ្ងៃទី២៥ ខែតុលា ឆ្នាំ២០១៣ មានករណីប្រើហិង្សាទៅលើកូនឈ្នួលរបស់ ខ្លួននៅចំណុចផ្ទះរបស់ស្ដ្រីខាងលើ រហូតក្មេងប្រុសទ្រាំទ្រមិនបាន ក៏រត់ចេញពីផ្ទះមកប្រាប់ប្រជាពលរដ្ឋដែលនៅក្បែរនោះថា ម្ចាស់ផ្ទះប្រើអំពើហិង្សាមកលើខ្លួនដោយប្រើអំបោស រំពាត់ ខ្សែភ្លើងវាយមកលើដងខ្លួនជាញឹកញាប់រហូតជាំពេញខ្លួន ។ ប្រភពបន្ដថា បន្ទាប់ពីដឹងថាមានករណីប្រើហិង្សាលើកូនឈ្នួលខ្លួនឯងជាអនីតិជនបែបនេះ ពួកគាត់ក៏នាំក្មេងប្រុសរងគ្រោះមកដាក់ពាក្យបណ្ដឹងនៅសាលាសង្កាត់ទឹកល្អក់ទី១ ហើយសង្កាត់បានរាយការណ៍ទៅសមត្ថកិច្ចចុះឃាត់ខ្លួនស្ដ្រីខាងលើយកមកសួរនាំ ។
បច្ចុប្បន្នស្ដ្រីដែលប្រើអំពើហិង្សាលើក្មេងប្រុសខាងលើត្រូវឃាត់ខ្លួនសាកសួរនៅប៉ុស្ដិ៍ទឹកល្អក់ទី១ ដើម្បីកសាងសំណុំរឿងដើម្បីចាត់ការបន្ដតាមនីតិវធី ៕
__________________________
ប្រភពព័ត៌មានពី៖ norkorwat news
ប្រភពព័ត៌មានពី៖ norkorwat news
