រដ្ឋឲ្យដៃគូក្រុមហ៊ុន គិត ម៉េង ផ្អាកកាប់ឈើ
ជីវភាពរស់នៅរបស់អ្នកស្រុក នៅតាមដងទន្លេសេសាន ក្នុងខេត្តស្ទឹងត្រែង។ រូបថត ម៉ៃ វីរៈ
ភ្នំពេញៈ ការកាប់ឈើនៅតំបន់ទំនប់វារីអគ្គិសនីសេសានក្រោម ២ ដែលប្រតិបត្តិដោយក្រុមហ៊ុនជាដៃគូក្រុមហ៊ុន Royal Group របស់លោក ឧកញ៉ា គិត ម៉េង នឹងត្រូវផ្អាកបណ្តោះអាសន្នរហូតទាល់តែតំបន់សម្បទាននេះអាចត្រូវបានកំណត់ព្រំប្រទល់ត្រឹមត្រូវ ហើយគណៈកម្មការស៊ើបអង្កេតមួយត្រូវបានបង្កើតឡើង បន្ទាប់ពីរដ្ឋាភិបាលបានដាក់ការហាមឃាត់ដែលចូលជាធរមាន តាំងពីថ្ងៃ ទី១៦ ខែ តុលា។
លោក កុល សំអុល អភិបាលខេត្ត ស្ទឹងត្រែង ដែលបានចូលរួមកិច្ចប្រជុំកាលពីព្រឹកម្សិលមិញ ជាមួយលោក ទី សុគន្ធ រដ្ឋលេខាធិការក្រសួង កសិកម្ម និងលោក ឆេង គឹមស៊ុន ប្រធានរដ្ឋបាលព្រៃឈើបានថ្លែងថា បទបញ្ជានេះនឹងកាត់បន្ថយជាបណ្តោះអាសន្ន នូវការកាប់ឈើដែលសាខារបស់ក្រុមហ៊ុន Royal Group ឈ្មោះ Ang & Associates Lawyer Ltd ត្រូវបានអនុញ្ញាតឲ្យនាំចេញពីកន្លែងនោះ។
លោក កុល សំអុល បានថ្លែងថា៖ «បទបញ្ជានេះគឺដើម្បីកាត់បន្ថយការយកឈើគ្រប់ប្រភេទក្នុងតំបន់អាង។ ដូច្នេះកិច្ចប្រជុំនេះគឺដើម្បីអនុវត្តសេចក្តីជូនដំណឹងពីទីស្តីការគណៈរដ្ឋមន្រ្តី»។
លោកបន្តថា បទបញ្ជានេះត្រូវបានចុះហត្ថលេខាកាលពីថ្ងៃ ទី១៦ ខែ តុលា នឹងនៅតែមានប្រសិទ្ធភាពរហូតដល់ក្រុមហ៊ុនបានកំណត់ព្រំប្រទល់ តំបន់សម្បទាន ហើយរដ្ឋាភិបាលបានបង្កើតគណៈកម្មការមួយដើម្បីពិនិត្យឡើងវិញ ចំពោះការងារដែលកំពុងធ្វើនៅតំបន់នោះ។
លោក សៀក មេគង្គ មេឃុំ ស្រែគ ស្រុក សេសាន ខេត្ត ស្ទឹងត្រែង បានថ្លែងថា ប្រជាជនមូលដ្ឋានបានទទួលព័ត៌មានអំពីការហាមឃាត់នេះយ៉ាង ទូលំទូលាយ ខណៈពួកគេពឹងផ្អែកយ៉ាងខ្លាំងទៅលើព្រៃឈើសម្រាប់ជីវភាពរស់នៅរបស់ខ្លួន។
លោកបន្តថា៖ «យើងរីករាយណាស់នៅពេលយើងឮថា ក្រសួង កសិកម្ម រុក្ខាប្រមាញ់ និងនេសាទ នឹងបញ្ឈប់ការដឹកឈើនិងការកេងប្រវ័ញ្ចនៅតំបន់ទំនប់វារីអគ្គិសនី សេសានក្រោម ២ ពីព្រោះការកាប់ឈើដើម្បីធ្វើអាងនៅក្នុងតំបន់នេះនឹងមិនផ្តល់អត្ថប្រយោជន៍ដល់ប្រជាជនតំបន់នេះទេ»។
ក្រុមហ៊ុន Hydrolancang International Energy ដែលជាសាខាមួយរបស់ក្រុមហ៊ុន ចិន ឈ្មោះ Huaneng ដែលជាកម្មសិទ្ធិរបស់រដ្ឋបានចុះអនុស្សរណៈនៃការយោគយល់គ្នា ជាមួយក្រុមហ៊ុន Royal Group របស់លោក គិត ម៉េង កាលពីថ្ងៃ ទី២៦ ខែ វិច្ឆិកា ឆ្នាំ ២០១២ សម្រាប់ការផ្តល់ហិរញ្ញវត្ថុ រយៈពេលពីរឆ្នាំចូលមកក្នុងគម្រោងទំនប់វារីអគ្គិសនីនេះ។
កាលពីពេលមុនក្នុងឆ្នាំនេះ ក្រុមហ៊ុន Ang & Associates ត្រូវបានរាយការណ៍ថា បានចុះកិច្ចព្រមព្រៀងវិនិយោគរួមគ្នាជាមួយលោក សុខ វណ្ណា ដែលជាប្អូនប្រុសរបស់លោក សុខ គង់ ស្ថាបនិកក្រុមហ៊ុន សូគីម៉ិច (Sokimex) ដើម្បីឈូសឆាយតំបន់ដែលមានទំហំ ៣៦.០០០ ហិកតា ជាការរៀបចំសម្រាប់គម្រោងដែលមានទឹកប្រាក់ ៨១៦ លានដុល្លារអាមេរិក។
ក្រុមអ្នកបរិស្ថានបានព្រមានថា គម្រោងទំនប់វារីអគ្គិសនីជាច្រើននៅដៃទន្លេមេគង្គនឹងមាន លក្ខណៈបំផ្លិចបំផ្លាញបំផុត។
លោក គិត ម៉េង មិនអាចទាក់ទងសុំការអត្ថាធិប្បាយទាក់ទិនបញ្ហានេះបានទេ កាលពីម្សិលមិញ។
លោក មៀច មាន អ្នកសម្របសម្រួលនៃបណ្តាញការពារទន្លេ សេសាន ស្រែពក និងសេកុង ជាអង្គការតស៊ូមតិក្នុងស្រុក បានថ្លែងថា ក្រុមហ៊ុនបានប្រើប្រាស់អាជ្ញាប័ណ្ណ ដើម្បីជាការលាក់លៀមការកាប់ឈើនៅក្រៅតំបន់សម្បទានរបស់ខ្លួន។
លោកបន្តថា៖ «សហគមន៍នៅតែមិនដឹងថា តើអ្វីជាសំណង និងតំបន់សម្បទាន។ ក្រុមហ៊ុនតែងតែប្រើអាជ្ញាប័ណ្ណ ដើម្បីធ្វើការកាប់ឈើខុសច្បាប់នៅក្នុងនិងជុំវិញតំបន់នេះ»។ លោកបន្ថែមថា តំណាង Hydrolancang ត្រូវរំពឹងថា នឹងចុះទៅការដ្ឋានប៉ុន្មានសប្តាហ៍ទៀត។
ការកាប់ឈើបានចាប់ផ្តើមក្នុងខែ មេសា ដើម្បីត្រៀមរៀបចំការសាងសង់ទំនប់វារីអគ្គីសនីដ៏ធំ ដោយអាជ្ញាធរមូលដ្ឋាននិងអ្នកបរិស្ថានបានចោទថា ការឈូសឆាយព្រៃឈើពុំស្ថិតក្រោមការត្រួតពិនិត្យនៅក្រៅតំបន់សម្បទានផ្លូវការទេ។
លោក ផា តី អាយុ ៣០ ជាអ្នកភូមិនៅ ស្រែគ បានថ្លែងថា ចាប់តាំងពីក្រុមហ៊ុនបានចាប់ផ្តើមឈូសឆាយការដ្ឋាន ទាហានដែលក្រុមហ៊ុនបានជួលឲ្យយាមតំបន់នេះបានយាយី និងបំភិតបំភ័យអ្នកស្រុក និងរឹបអូសយកឈើរបស់ពួកគេដែលពួកគេកាប់ដើម្បីសាងសង់ផ្ទះ គ្រឿងសង្ហារិម និងទូក។
លោកបន្តថា៖ «យើងកាប់ព្រៃក្នុងសហគមន៍ព្រៃឈើយើង ដើម្បីសាងសង់ផ្ទះ ឬធ្វើទូក និងគ្រឿងសង្ហារិម ដើម្បីរកប្រាក់ចិញ្ចឹមជីវិតរាល់ថ្ងៃ។ សន្តិសុខក្រុមហ៊ុនបានចាប់យើង ហើយរឹបអូសឈើពីយើង ហើយបង្ខំឲ្យយើងបង់ប្រាក់ពី ១០០ ទៅ ៥០០ ដុល្លារអាមេរិក ដើម្បីបានឈើមកវិញ»។
លោក ទេព ប៊ុណ្ណារិទ្ធ នាយកប្រតិបតិ្តនៃសមាគមអភិរក្សបរិស្ថាន និងវប្បធម៌ ដែលបានទៅតំបន់សាងសង់ខេត្ត ស្ទឹងត្រែង ពីម្សិលមិញ ហៅការគូសប្លង់តំបន់នោះគឺជាអាទិភាពកំពូល។
លោកបន្តថា៖ «តំបន់នេះគ្របដណ្តប់លើផ្ទៃដី ៣៦ ពាន់ហិកតា ប៉ុន្តែមិនទាន់គូសផែនទីច្បាស់លាស់ទេ។ ប្រជាជនខឹងដែលគេគ្មានសេរីភាព ប្រើធនធានព្រៃឈើដើម្បីចិញ្ចឹមជីវិត ខណៈគាត់ផ្តោតលើព្រៃឈើជាសំខាន់ដើម្បីការរស់នៅ»៕ PS / TK
_______________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
