​អង្គការ​សិទ្ធិមនុស្ស​អន្តរជាតិ​(Human Rights Watch) ដែល​មាន​មូលដ្ឋាន​នៅ​ទីក្រុង​ញូយ៉ក សហរដ្ឋអាមេរិក អំពាវនាវ​ឲ្យ​រដ្ឋាភិបាល​កម្ពុជា គួរតែ​ចាប់ផ្តើម​ភ្លាមៗ​នូវ​ការស៊ើបអង្កេត​ឯករាជ្យ និង​តម្លាភាព​មួយ​ទៅ​លើ​ករណី​ប៉ះទង្គិច​រវាង​ប្រជាពលរដ្ឋ ក្រុមអ្នកតវ៉ា ជាមួយ​កម្លាំង​​សមត្ថកិច្ច រហូត​ធ្វើ​ឲ្យ​បុរស​ម្នាក់ បាន​ស្លាប់ និង​ធ្វើឲ្យ​រងរបួស​ពលរដ្ឋ យ៉ាងតិច​២៤​នាក់​ទៀត​។​

​កាល​ពី​ថ្ងៃ​ទី​១៥​ខែ​កញ្ញា ក្រុមបាតុករ ប្រជាពលរដ្ឋ និង​កម្លាំង​សមត្ថកិច្ច បាន​ប៉ះទង្គិច​ជាមួយ​កម្លាំង​សមត្ថកិច្ច រហូត​ធ្វើឲ្យ​មាន​ការបាញ់​គ្រាប់​ផ្សែង បាញ់ទឹក និង​គ្រាប់កាំភ្លើង​ពិត​ទៅ​លើ​បាតុករ​។ កាលពី​ថ្ងៃអាទិត្យ បុរស​ម្នាក់ បាន​ស្លាប់​នៅ​ក្នុង​ការ​ហេតុការណ៍​ប៉ះទង្គិច​គ្នា​ជាមួយ​កម្លាំង​​សមត្ថកិច្ច​នៅ​ម៉ោង​ជាង​១០​យប់ នៅ​រង្វង់​មូល​ក្បាលថ្នល់ ខណ្ឌមានជ័យ រាជធានី​ភ្នំពេញ​។ លោក ហូរ វ៉ាន់ អនុប្រធាន​គណៈ​​កម្មាធិកា​រ​វិន័យ​គណបក្ស​សង្គ្រោះ​ជាតិ ឲ្យដឹងថា មនុស្ស​ម្នាក់ បាន​ស្លាប់ ៨​នាក់ រងរបួស និង​៦​នាក់ ត្រូវបាន​ចាប់ខ្លួន​។

​សេចក្តីថ្លែងការណ៍​របស់​HRW ចេញផ្សាយ​នៅ​ថ្ងៃ​អង្គារ​នេះ បង្ហាញថា រដ្ឋាភិបាល​កម្ពុជា គួរតែ​បញ្ជា​ជា​សាធារណៈ​ទៅ​កម្លាំង​សមត្ថកិច្ច ក្នុងការ​គោរព​តាម​ស្តង់ដារ​អន្តរជាតិ នៅពេល​បើក​ការបាញ់ និង​វិធានការ​ហិង្សា​ផ្សេងៗ​។​

​នាយក​ប្រចាំ​តំបន់​របស់​អង្គការ​ឃ្លាំមើល សិទ្ធិមនុស្ស​អន្តរជាតិ​លោក ប្រេដ អាដាម (Brad Adams) មានប្រសាសន៍ថា​៖«​រដ្ឋាភិបាល​កម្ពុជា ព្យាយាម​កំណត់​បាតុកម្ម​របស់​គ​ណ​បក្ស​ប្រឆាំង​ជាមួយ​ការដាក់​រនាំង គ្រប់គ្រង​ចលនា​ចូល និង​ចេញ​ក្រៅ​រាជធានី​ភ្នំពេញ​»​។​លោក​​បន្តថា ការ​បាញ់កាំភ្លើង​ដោយ​ផ្ទាល់​នៅ​ពេលយប់​ទៅ​លើ​ប្រជាពលរដ្ឋ ដែល​មិន​មាន​ប្រដាប់អាវុធ បង្ហាញ​ពី​ការបំភិតបំភ័យ​ភ្លាមៗ ដែល​​ជា​និយមន័យ​នៃ​ការប្រើប្រាស់​កម្លាំង​ហួសហេតុ​។ លោក​បញ្ជាក់ថា ការស៊ើបអង្កេត​មួយ​ឯករាជ្យ គឺ​ត្រូវការ​ជា​បន្ទាន់ ដើម្បី​បង្ហាញ និង​​កាត់ទោស​អ្នក​ដែល​ត្រូវ​ទទួលខុសត្រូវ លើ​ការរំលោភបំពាន ដោយ​កម្លាំង​សមត្ថកិច្ច​។

​អង្គការ​សិទ្ធិមនុស្ស​អន្តរជាតិ ក៏​បាន​អំពាវនាវ​ឲ្យ​រដ្ឋាភិបាល បញ្ជា​សមត្ថកិច្ច ដោយ​គោរព​ទៅតាម​គោលការណ៍​នៃ​ច្បាប់​របស់​អង្គការ​សហ​ប្រជា​ជាតិ និង​ប្រើប្រាស់​វិធាន​គ្រប់​កម្រិត​ដោយ​អហិង្សា មុន​ការប្រើប្រាស់​ប្រដាប់អាវុធ​។​សេចក្តីថ្លែងការណ៍​បន្ត​ថា គណបក្សប្រឆាំង គួរតែ​ចាត់វិធានការ ដើម្បី​បញ្ច្រៀស​អ្នកគាំទ្រ​ពី​ការប្រព្រឹត្ត​អំពើហិង្សា​ប្រឆាំង​នឹង​មន្ត្រី​អនុវត្ត​ច្បាប់ ដោយសារតែ​រឿង​នយោបាយ​។​

​កាលពី​ថ្ងៃ​ចន្ទ មន្ត្រី​សហរដ្ឋអាមេរិក​ប្រចាំ​នៅ​កម្ពុជា បាន​អំពាវនាវ​ឲ្យមាន​ការស៊ើបអង្កេត​ប្រកបដោយ​តម្លាភាព ទៅ​លើ​ករណី​ប៉ះទង្គិច​ជាមួយ​កម្លាំង​សមត្ថកិច្ច រហូត​ធ្វើ​ឲ្យ​បុរស​ម្នាក់​ស្លាប់ នៅ​រង្វង់​មូល​ក្បាលថ្នល់ កាលពី​យប់​ថ្ងៃ​អាទិត្យ​។​

​អ្នកនាំពាក្យ​ស្ថានទូត​អាមេរិក ប្រចាំ​នៅ​កម្ពុជា លោក John Simmons ប្រាប់​VOD​តាមរយៈ​អ៊ីម៉េល​ថា ស្ថានទូត​អាមេរិក ដឹងថា រដ្ឋាភិបាល​កម្ពុជា កំពុងតែ​ស៊ើបអង្កេត​លើ​ករណី​នេះ តែ​ស្ថានទូត អំពាវនាវ​ឲ្យមាន​ការស៊ើបអង្កេត​ដោយ​តម្លាភាព ដែល​ជំហាន​មួយ​ក្នុង​ការការពារ​ព្រឹត្តិការណ៍​ដ៏​អាក្រក់​នេះ ទៅ​ថ្ងៃ​អនាគត​។ ស្ថានទូត​អាមេរិក ជំរុញ​ឲ្យ​គ្រប់​ភាគី ចៀសវាង​ពី​ហិង្សា និង​ធ្វើការ​ជាមួយគ្នា ដោយ​ដោះស្រាយ​ការខ្វែងគំនិត​គ្នា​ផ្សេងៗ​ទៀត​។​

​អ្នកនាំពាក្យ​ក្រសួង​មហាផ្ទៃ លោក ខៀវ សុភ័គ មានប្រសាសន៍ថា ក្រសួង​មហាផ្ទៃ​កំពុង​តែ​ស៊ើបអង្កេត​លើ​ករណី​បុរស​ម្នាក់ ដែល​បាន​ស្លាប់​​នោះ និង​កំពុង​ស្វែងរក​ចាប់ខ្លួន​ជនល្មើស​។​ចំណែក​គណបក្ស​សង្គ្រោះ​ជាតិ នៅតែ​បន្ត​មហា​បាតុកម្ម​នៅ​ថ្ងៃ​អង្គារ​នេះ ដើម្បី​បញ្ចប់​តាម​ការគ្រោងទុក​ចំនួន​បី​ថ្ងៃ បី​យប់​៕ប្រភព ពី វីអូឌី