អង្គការសហ ប្រជាជាតិលាត ត្រដាងការប្រើ អាវុធគីមីនៅស៊ីរី
ក្រុមអធិការកិច្ចរបស់អង្គការសហប្រជាជាតិ បានបង្ហាញរបាយការណ៍ និងភស្តុតាងដែលបង្ហាញថា រដ្ឋាភិបាលស៊ីរីរបស់ លោក បាសា អាល់អាសាដ ប្រើអាវុធគីមីសម្លាប់ប្រជាពលរដ្ឋខ្លួនឯងយ៉ាងឃោរឃៅ កាលពីខែសីហា។
នៅថ្ងៃចន្ទម្សិលមិញ អគ្គលេខាធិការអង្គការសហប្រជាជាតិ លោក បាន គីមូន បានធ្វើបទបង្ហាញ ពីរបាយការណ៍ដែលក្រុមអធិការកិច្ចនៃប្រទេសជាសមាជិកក្រុមប្រឹក្សាសន្តិសុខ ស្តីលទ្ធផលនៃការស៊ើបអង្កេតលើការប្រើអាវុធគីមីនៅស៊ីរី។ ក្នុងបទបង្ហាញនោះ លោក គីមូន ក៏បានបង្ហាញរបាយការណ៍របស់អ្នកជំនាញថា រដ្ឋាភិបាលរបស់ លោក អាសាដ បានប្រើអាវុធដែលមានសារធាតុគីមីឈ្មោះសារិន វាយប្រហារលើក្រុមប្រឆាំងកាលពីថ្ងៃទី២១ ខែសីហា នៅទីក្រុងដាម៉ាស។
មូលហេតុនៃការវាយប្រហារដោយអាវុធគីមីនេះ បានធ្វើឲ្យសហរដ្ឋអាមេរិក បារាំង និងប្រទេសលោកខាងលិចផ្សេងទៀត កំពុងត្រៀមលក្ខណៈយោធាវាយប្រហារលើរដ្ឋាភិបាលស៊ីរីរបស់ លោក អាសាដ ដើម្បីអន្តរាគមន៍បញ្ឈប់ការវាយប្រហារដោយអាវុធគីមីលើជនស៊ីវិល។
ការត្រៀមកម្លាំងជាលក្ខណៈអន្តរជាតិនេះ បន្ទាប់ពីសហរដ្ឋអាមេរិក និងរុស្ស៊ី ព្រមព្រៀងគ្នាដាក់បញ្ហាអាវុធគីមីនៅស៊ីរី ឲ្យស្ថិតនៅក្រោមការគ្រប់គ្រងរបស់អន្តរជាតិ ចំណែករបាយការណ៍ភស្តុតាងរបស់អង្គការសហប្រជាជាតិ កាន់តែមានឥទ្ធិពលលើចំណាត់ពីសហគមន៍អន្តរជាតិលើរដ្ឋាភិបាលរបស់ លោក អាសាដ ថែមទៀត៕ប្រភព ពីវីអូឌី
