កម្មករ SL1 បន្តតវ៉ា ដោយឈាន ដល់ការបិទ ផ្លូវមួយសន្ទុះ
ភ្នំពេញៈ កម្មកររាប់ពាន់នាក់នៅរោងចក្រ SL1 ក្នុងខ័ណ្ឌមានជ័យ រាជធានីភ្នំពេញបានបិទផ្លូវលេខ ៣៧១ ប្រមាណជាមួយម៉ោង កាលពីព្រឹកមិញនេះ បន្ទាប់ពីកម្មករទាំងនេះបានធ្វើការតវ៉ាទាមទារលក្ខខណ្ឌការងារចំនួន ៩ ចំណុចពីរោងចក្រអស់ជាច្រើនថ្ងៃមកហើយ។
លោក ស៊ុត សៀម មន្ត្រីមកពីសហជីពស៊ីខៅឌូដែលបានចុះទៅជួយអន្តរាគមន៌នៅរោងចក្រនេះ បានឲ្យដឹងថា កម្មករបាននាំគ្នាឈរនៅលើផ្លូវលេខ ៣៧១ ដែលធ្វើឲ្យការធ្វើចរាចរណ៌មានការលំបាកបន្តិច។
លោកបានថ្លែងថា៖ «កម្មករខឹងនឹងឡានដឹកអុសរបស់រោងចក្រដែលបានចតនៅកន្លែងដែលពួកគេធ្លាប់ឈរតវ៉ារាល់ថ្ងៃ ហើយព្រឹកមិញនេះ នៅពេលដែលពួកគេមក ក៏ឃើញឡានដឹកអុសពីរឈប់នៅមុខរោងចក្រ នាំឲ្យពួកគេគ្មានកន្លែងឈរ ក៏នាំគ្នាទៅឈរនៅលើផ្លូវធំវិញ»។
កម្មករជាង ៤០០០ នាក់ បានធ្វើការតវ៉ាតាំងពីថ្ងៃអង្គារសប្តាហ៌មុនមកម្ល៉េះ ដោយបានទាមទារឲ្យដកកម្លាំងសមត្ថកិច្ចដែលក្រុមហ៊ុនបានស្នើរមកការពារសុវត្ថិភាពនៅក្នុងរោងចក្រ និងសុំឲ្យលោកឧញ៉ា មាស សុត្ថា ដែលជាម្ចាស់ភាគហ៊ុនមួយរូបនៅក្នុងក្រុមហ៊ុននេះចេញ សុំតម្លើងប្រាក់ឈ្នួលរហូតដល់ ១៥០ ដុល្លារ និងប្រាក់អត្ថប្រយោជន៌មួយចំនួនទៀត។
ភាគីរោងចក្របានធ្វើការបដិសេធនូវការទាមទាររបស់កម្មករ ហើយបានចោទថា ការតវ៉ានេះគឺជាការតវ៉ាខុសច្បាប់ និងជាការញុះញង់ និងគំរាមកំហែងពីសំណាក់សហជីពទៅលើកម្មករ។
ប្រភពពី ភ្នំពេញ ប៉ុស្តិ៍
