យុវជន ៤ នាក់ត្រូវបាន ចោទប្រកាន់ និងឃុំនៅ ព្រៃ ស
ភ្នំពេញៈ យុវជន ៤ នាក់ត្រូវបានតុលាការចោទប្រកាន់ពីបទ «ញុះញង់ឲ្យប្រព្រឹត្ត បទឧក្រិដ្ឋ» កាលពីថ្ងៃសៅរ៍ទៅតាមអី្វដែលនគរបាលបានអះអាងថា ក្រុមនេះ មានចេតនាញុះញង់ឲ្យកងកម្លាំងប្រដាប់អាវុធ ធ្វើរដ្ឋប្រហារផ្តួលរំលំរដ្ឋាភិបាល និងបញ្ជូនទៅឃុំខ្លួននៅពន្ធនាគារព្រៃ ស។
យុវជនទាំង ៤ នាក់ ត្រូវបានសមត្ថកិច្ចចាប់ខ្លួនកាលពីល្ងាចថ្ងៃទី ១៥ ខែ សីហា ដែលក្នុងចំណោមនោះ មានពីរនាក់ ម្នាក់ឈ្មោះ ទុត ច័ន្ទបញ្ញា ប្រុស អាយុ ៣០ ឆ្នាំ និងសុខ ដាលីស ស្រី អាយុ ២៨ ឆ្នាំ ត្រូវបានចាប់ខ្លួននៅពេលដែលពួកគេទៅទទួលផ្កាកុលាប ១ ពាន់ទង ពីជនមិនស្គាល់មុខម្នាក់នៅផ្សារធំថ្មី ដើម្បីយកទៅចែកជូនកងកម្លាំងដែលត្រូវបានដាក់ពង្រាយនៅក្នុងទីក្រុងភ្នំពេញ បន្ទាប់ពីមានការទាក់ទងគ្នាជាមួយជនមិនស្គាល់មុខនោះតាម ហ្វេសប៊ុក។ ចំណែកពីរនាក់ផ្សេងទៀត ឈ្មោះ ហ៊ី បូរិន ប្រុសអាយុ ៣៣ ឆ្នាំ និង លី លីនផេង ត្រូវបានចាប់ខ្លួន នៅកន្លែងផ្សេង។
អ្នកទាំងបួន ត្រូវតុលាការរាជធានីភ្នំពេញ ចោទប្រកាន់កាលពីថ្ងៃសៅរ៍ ពីបទ «ញុះញង់ឲ្យប្រព្រឹត្តបទឧក្រិដ្ឋ» តាមមាត្រា ៤៩៥ នៃក្រមព្រហ្មទណ្ឌ ដែលអាចជាប់ពន្ធនាគារពី ៦ ខែដល់ ២ ឆ្នាំ និងពិន័យជាប្រាក់រហូតដល់ ៤ លានរៀល។ បន្ទាប់ពីចោទប្រកាន់ពួកគេ ត្រូវបានបញ្ជូនទៅឃុំខ្លួននៅពន្ធនាគារ ព្រៃ ស។ នេះបើតាមលោក អំ សំអាត មន្ត្រីស៊ើបអង្កេតជាន់ខ្ពស់អង្គការសិទ្ធិមនុស្ស លីកាដូ បានឲ្យដឹងកាលពីម្សិលមិញ។ បើតាមលោក អំ សំអាត មេធាវីនឹងដាក់ពាក្យស្នើសុំពួកគេនៅក្រៅឃុំ។
នគរបាល បានអះអាងតាមសេចក្តីប្រកាសព័ត៌មានមួយ កាលពីថ្ងៃសៅរ៍ថា យុវជនទាំងនោះបានធ្វើការផ្សព្វផ្សាយខិត្តប័ណ្ណ តាមបញ្ជារបស់ឈ្មោះ សួន សេរីរដ្ឋា ដែលជាប្រធានចលនាអំណាចពលរដ្ឋខ្មែរ ហើយជាអ្នកធ្លាប់បង្កើតកងកម្លាំងប្រដាប់អាវុធខុសច្បាប់ ប្រឆាំងរដ្ឋាភិបាល។
អ្នកនាំពាក្យនគរបាលជាតិ លោក គៀត ច័ន្ទថារិទ្ធ ថ្លែងតាមសេចក្តីប្រកាសនោះថា ការចាប់ខ្លួនជនសង្ស័យទាំងនេះ គឺក្នុងខណៈដែលពួកគេ «កំពុងធ្វើសកម្មភាពផលិត និងចែកចាយ ដោយរួមមានវត្ថុតាង ជាខិត្តប័ណ្ណច្រើនរយសន្លឹក»។
លោកបានបន្តថា៖ «ការផលិតចែកចាយខិត្តប័ណ្ណនេះ គឺជាសកម្មភាពចេតនា បង្កើតឲ្យមានអំពើហិង្សាប្រដាប់អាវុធ បង្កអស្ថិរភាពធ្ងន់ធ្ងរ ដល់សង្គមជាតិ ដែលត្រូវផ្តន្ទាទោសតាមច្បាប់ជាធរមាន»។
ប៉ុន្តែលោក អំ សំអាត ដែលអង្គការរបស់លោក និងមជ្ឈមណ្ឌលអប់រំច្បាប់សម្រាប់សហគមន៍ បានផ្តល់មេធាវីចំនួន ៤ រូប ដើម្បីការពារក្តី ដល់យុវជនពីររូប ក្នុងចំណោមយុវជនទាំងនេះ បាននិយាយថា កូនក្តីរបស់អង្គការលោក មិនមានពាក់ព័ន្ធនឹងការចែកចាយខិតប័ណ្ណ ដូចការចោទប្រកាន់នោះទេ ហើយក៏មិនមានជាប់ពាក់ព័ន្ធជាមួយនឹងក្រុមលោក សួន សេរីរដ្ឋានោះដែរ។
លោក អំ សំអាត បានគូសបញ្ជាក់ថា៖ «ពួកគាត់មិនមានពាក់ព័ន្ធសកម្មភាពណាមួយ ចែកចាយខិត្តប័ណ្ណ ដែលនគរបាលចោទនោះទេ គាត់គ្រាន់តែទៅយកផ្កា ហើយនេះជាសិទ្ធិរបស់គាត់»។
ចំណែក អ្នកស្រី ចាន់ សេដ្ឋា អាយុ ៥០ ឆ្នាំ ត្រូវជាម្តាយយុវជន ទុត ច័ន្ទបញ្ញា និយាយថា កូនរបស់អ្នកស្រី មិនបានដឹងពីខិត្តប័ណ្ណ មានរូបរាងយ៉ាងណា ឬមានអត្ថន័យយ៉ាងម៉េចនោះឡើយតែ បញ្ញា និង ដាលីស បានទៅយកផ្កា ដោយសារមានមនុស្សម្នាក់ ណាត់ឲ្យទៅយក ក៏ត្រូវចាប់ខ្លួនទាំងពីរនាក់ នៅពេលធ្វើដំណើរចេញពីហាងផ្កាកាលពីល្ងាចថ្ងៃព្រហស្បតិ៍សប្តាហ៍មុន។
អ្នកស្រីថ្លែងថា៖ «បញ្ញាជិះម៉ូតូ ឯ ដាលីសជិះតុក តុក ឱបផ្កាក្នុងដៃ ព្រោះផ្កាច្រើនពេក។ កូនខ្ញុំទៅយកផ្កា តែមិនមានសំបុត្រអីនៅក្នុងផ្កាទេ ហើយខ្ញុំជឿថា ពួកគេមិនទាក់ទងនឹងរឿងខិតប័ណ្ណប្រឆាំងរដ្ឋាភិបាលស្អីនោះឡើយ។ រឿងនេះពិតជាអយុត្តិធម៌ខ្លាំងណាស់»។
អ្នកស្រីបន្តថា បញ្ញា និងដាលីស ក៏មិនដែលស្គាល់បុរសនិងស្ត្រីពីររូបផ្សេងទៀត ដែលត្រូវបានចាប់ខ្លួនជាមួយគ្នានោះដែរ ហើយម្ចាស់កូពីនោះ ពួកគាត់ក៏គ្រាន់តែកូពីទៅតាមការកុម្ម៉ង់របស់អតិថិជនរបស់ពួកគាត់តែប៉ុណ្ណោះ។
អ្នកស្រីឲ្យដឹងថា ៖ «ស្ត្រីម្ចាស់ព្រីននោះប្រាប់ខ្ញុំថា គាត់ដឹងតែពីព្រីនឲ្យគេ ហើយមិនចង់ដឹងថា នៅក្នុងក្រដាសព្រីននោះ គេសរសេរពីអ្វីនោះទេ»។
ទោះយ៉ាងណា នគរបាល បានភ្ជាប់រឿងចាប់ខ្លួនយុវជនទាំងបួនរូបនេះ ទៅនឹងខិតប័ណ្ណមួយដែលមានរូបផ្កាកុលាបលឿង ហើយមានសរសេរអក្សរ ដោយមានដាក់ឈ្មោះ សួន សេរីរដ្ឋា ពីខាងក្រោមអត្ថន័យនេះថា ៖ «ផ្កាកុលាបពណ៌លឿង សម្រាប់ការផ្លាស់ប្តូរ ជូនមួយទងម្នាក់ ដល់វីរៈកងទ័ពគ្រប់រូប ដែលជាកូនចៅពលរដ្ឋខ្មែរ។ សូមបែរចុងអាវុធតម្រង់ជនផ្តាច់ការ ហើយយកជីវិតការពារពលរដ្ឋ ជាឈាមខ្មែរដូចគ្នា ព្រោះកងទ័ពខ្មែរ និងពលរដ្ឋខ្មែរ ជាខ្មែរតែមួយ ដែលត្រូវការពារគ្នាទៅវិញទៅមក»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានឲ្យដឹងថា ចំពោះមិត្តភក្តិរបស់យុវជនទាំងនេះនិយាយថា ខ្លឹមសាររបស់ក្រុមខ្លួន គឺគ្រាន់តែបង្ហាញថា បងប្អូននគរបាលជាជនរួមឈាមខ្មែរតែមួយនិងមិនមានខ្លឹមសារអ្វីខុស ច្បាប់ឡើយ។
លោកថ្លែងថា៖ «យើងកំពុងតាមដានករណីនេះ ព្រោះហាក់នៅស្រពិចស្រពិលច្រើន ដោយសារមានខ្លឹមសារពីរ ខ្លឹមសារនគរបាលចោទមានពាក់ព័ន្ធរឿងបង្វែរកាណុងមកជនផ្តាច់ការ តែមិត្តភកិ្តពួកគេថា ខ្លឹមសារពួកគេគឺ បងប្អូនប៉ូលិសជាជនរួមឈាមខ្មែរតែមួយ។ បើខ្លឹមសារនេះមែន គ្មានអ្វីខុសទេ»។
លោក សួន សេរីរដ្ឋា ប្រធានចលនាអំណាចពលរដ្ឋខ្មែរ ដែលរស់នៅក្រៅប្រទេស បានប្រាប់ភ្នំពេញ ប៉ុស្ដិ៍ ពីម្សិលមិញថា សកម្មភាពយុវជនចែកផ្កា ទឹកសុទ្ធ ដល់កងទ័ព គ្មានអ្វីខុសច្បាប់ឡើយ ហើយមិនមែនជាការញុះញង់ទេ តែ «គឺជាទឹកចិត្តសប្បុរសសុទ្ធសាធ ដែលយុវជន និងពលរដ្ឋខ្មែរគ្រប់គ្នា នរណាក៏អាចធ្វើបានដែរ»។
នៅពេលសួរថា តើក្រុមយុវជនទាំងបួនរូប ជាសមាជិករបស់លោកឬយ៉ាងណា លោក សេរីរដ្ឋា និយាយថា៖ «ក្រុមយុវជនទាំងនោះ ជាយុវជនខ្មែរ មិនមែនចាំបាច់ថា ជាសកម្មជនរបស់ចលនា អំណាចពលរដ្ឋខ្មែរ ឬអត់នោះទេ ពួកគេគ្រប់គ្នាមានសិទ្ធិ មានសេរីភាព មានអំណាចធ្វើអ្វី ដែលពួកគេគិតថាត្រូវ ពីព្រោះនេះ ជាសេរីភាពនៃការគិត ការនិយាយ និងការធ្វើ»។
កាលពីម្សិលមិញ គណបក្សសង្គ្រោះជាតិបានចេញសេចក្តីថ្លែងការណ៍មួយ ដោយបានធ្វើការថ្កោលទោសចំពោះការចាប់ខ្លួនយុវជនទាំង ៤ រូបនេះ និងបានហៅការចាប់ខ្លួននេះថា «ការរំលោភបំពានយ៉ាងធ្ងន់ធ្ងរដល់សិទ្ធិបុគ្គល និងសិទ្ធិសេរីភាពសម្តែងមតិ របស់ប្រជាពលរដ្ឋ» ដោយពួកគេគ្រាន់តែយកផ្កា និងទឹកសុទ្ធ មានបំណងចែកជូនកងទ័ព។ គណបក្សសង្គ្រោះជាតិ បានទាមទារឲ្យដោះលែងយុវជនទាំងនេះជាបន្ទាន់ដោយឥតលក្ខខណ្ឌ៕
ប្រភពពី ភ្នំពេញ ប៉ុស្តិ៍
